മനുഷ്യശരീരത്തിലെ നിരവധി അവയവങ്ങളില്‍ ഏറ്റവും പ്രധാനമായ ഒന്നാണ് കരൾ. രക്തത്തിലെ പഞ്ചസാര നിയന്ത്രിക്കുക, രോഗങ്ങളോടും അണുബാധയോടും പോരാടുക, ശരീരത്തിൽ നിന്ന് വിഷവസ്തുക്കളെ ഉൻമൂലനം ചെയ്യുക, ശരീരത്തിലെ കൊഴുപ്പ് നിയന്ത്രിക്കുക എന്നിവയാണ് കരളിന്റെ ചില പ്രധാന ജോലികൾ. കരളിന്റെ ആരോഗ്യത്തിനായി കഴിക്കേണ്ട ഭക്ഷണങ്ങൾ ഏതൊക്കെയാണെന്ന് അറിയാം.
ഫാറ്റി ലിവർ പ്രശ്നങ്ങൾ തടയുന്നതിന് ബ്രോക്കോളി മികച്ചൊരു പച്ചക്കറിയാണ്. പോഷകഗുണമുള്ള ബ്രോക്കോളി പുഴുങ്ങിയോ സാലഡിൽ ഉൾപ്പെടുത്തിയോ കഴിക്കാം. ഹൃദ്രോഗ സാധ്യത കുറയ്ക്കാനും ബ്രോക്കാളി സഹായിക്കും.
ഗ്രീൻ ടീയിലെ 'കാറ്റെച്ചിൻ' എന്ന ആന്റി ഓക്സിഡന്റ് കരളിലെ കൊഴുപ്പ് കുറയ്ക്കാൻ സഹായിക്കുന്നു. ഹൃദ്രോഗസാധ്യത കുറയ്ക്കാനും അമിതവണ്ണം അകറ്റാനുമെല്ലാം ഗ്രീൻ ടീ ഫലപ്രദമാണ്.
ബദാം വൈറ്റമിൻ ഇയുടെ കലവറയാണ്. ഫാറ്റി ലിവറിനെ പ്രതിരോധിക്കാൻ അവശ്യം വേണ്ടതാണ് വെെറ്റമിൻ ഇ. കരളിനു മാത്രമല്ല, കണ്ണിനും ഹൃദയത്തിനും നല്ലതാണ് ബദാം.
കാപ്പിയിൽ അടങ്ങിയിരിക്കുന്ന പോളിഫെനോളുകൾക്ക് ആന്റിഓക്‌സിഡന്റുകളും വീക്കം തടയുവാൻ സഹായിക്കുന്ന ആൻറി-ഇൻഫ്ലമേറ്ററി ഗുണങ്ങളും ഉണ്ട്. ഇത് സിറോസിസിന്റെ വളർച്ചയിൽ നിന്ന് കരളിനെ സംരക്ഷിക്കാൻ സഹായിക്കുന്നു.
കരള്‍ ആരോഗ്യത്തോടെയിരിക്കാന്‍ വളരെയധികം സഹായിക്കുന്ന ഒന്നാണ് വെളുത്തുള്ളി. ഇതിലുള്ള അലിസിന്‍ നല്ലൊരു ആന്റി ഓക്‌സിഡന്റാണ്. ഇത് ശരീരത്തില്‍ സംഭവിക്കുന്ന ഓക്‌സിഡേറ്റീവ് ഡാമേജ് ഇല്ലാതാക്കുന്നു.
കരളിന്റെ സുഹൃത്താണ് പോളിഫിനോൾസ് അടങ്ങിയ ബ്ലൂ ബെറി. നോണ്‍ ആല്‍ക്കഹോളിക്ക് ഫാറ്റി ലിവര്‍, ഹൈ കൊളസ്ട്രോള്‍, അമിതവണ്ണം ഇവയില്‍ നിന്നെല്ലാം സംരക്ഷിക്കാന്‍ ഇതിന് സാധിക്കും.