'വ്യത്യസ്തമായ ഓംലെറ്റ്'; ആരും വീട്ടിൽ തയ്യാറാക്കല്ലേ എന്ന് വീഡിയോ കണ്ടവർ
അൽപം അസാധാരണമായിട്ടുള്ള, വിചിത്രമെന്ന് പോലും പറയാൻ സാധിക്കുന്നൊരു ഓംലെറ്റ് പരീക്ഷണമാണ് ഈ വീഡിയോയിൽ കാണിക്കുന്നത്. ലേയ്സ് ചിപ്സ് ചേർത്താണ് ഇതിൽ കുക്ക് ഓംലെറ്റ് തയ്യാറാക്കുന്നത്.
 )
Followഓരോ ദിവസവും വ്യത്യസ്തമായ എത്രയോ വീഡിയോകളാണ് നാം സോഷ്യൽ മീഡിയ വഴി കാണുന്നത്. ഇവയിൽ ഭക്ഷണവുമായി ബന്ധപ്പെട്ടുള്ള വീഡിയോകളാണെങ്കിൽ എന്തായാലും ഇവയ്ക്ക് കാഴ്ചക്കാരെ ഏറെ ലഭിക്കും. മുൻകാലങ്ങളിൽ വിവിധ വിഭവങ്ങളുടെ റെസിപി പരിചയപ്പെടുത്തുന്ന വീഡിയോകളായിരുന്നു അധികവും ഫുഡ് വീഡിയോകളുടെ ഉള്ളടക്കമായി വരാറെങ്കിൽ ഇപ്പോൾ പാചകത്തിലെ പുത്തൻ പരീക്ഷണങ്ങളാണ് കാര്യമായും സോഷ്യൽ മീഡിയയിൽ ശ്രദ്ധിക്കപ്പെട്ടുകൊണ്ടിരിക്കുന്നത്.
എപ്പോഴും ഭക്ഷണപ്രേമികളുടെ മനസ് നിറയ്ക്കും വിധത്തിലോ കൊതിപ്പിക്കും വിധത്തിലോ തന്നെയുള്ള പാചക പരീക്ഷണങ്ങളൊന്നുമായിരിക്കില്ല ഇത്തരം വീഡിയോകളിൽ കാണുന്നത്. മറ്റൊരു രീതിയിൽ പറഞ്ഞാൽ അൽപം വിചിത്രമായ പാചക പീരക്ഷണങ്ങളാണ് അധികവും വൈറലാകാറ്.
ഇത്തരത്തിലൊരു വീഡിയോയെ കുറിച്ചാണിനി പങ്കുവയ്ക്കുന്നത്. നമ്മൾ ഏറ്റവുമധികം വീട്ടിൽ തയ്യാറാക്കുന്നൊരു വിഭവമാണ് ഓംലെറ്റ്. ഓംലെറ്റ് വ്യത്യസ്തമായ രീതികളിൽ തയ്യാറാക്കാവുന്നതാണ്. ഓരോരുത്തരുടെയും അഭിരുചിക്ക് അനുസരിച്ച് ഇത്രമാത്രം വ്യത്യസ്തതകൾ കൊണ്ടുവരാൻ സാധിക്കുന്ന മറ്റേതെങ്കിലും വിഭവമുണ്ടോയെന്ന് തന്നെ സംശയം തോന്നാം. അത്രയും വൈവിധ്യങ്ങൾ ഓംലെറ്റിലുണ്ടാക്കാം.
എന്നാൽ അൽപം അസാധാരണമായിട്ടുള്ള, വിചിത്രമെന്ന് പോലും പറയാൻ സാധിക്കുന്നൊരു ഓംലെറ്റ് പരീക്ഷണമാണ് ഈ വീഡിയോയിൽ കാണിക്കുന്നത്. ലേയ്സ് ചിപ്സ് ചേർത്താണ് ഇതിൽ കുക്ക് ഓംലെറ്റ് തയ്യാറാക്കുന്നത്. അതും ലേയ്സ് ചിപ്സ് പാക്കറ്റിൽ വച്ച് തന്നെയാണ് ഓംലെറ്റ് പാകം ചെയ്തെടുക്കുന്നതും.
ആദ്യം ഒരു മസാല ലെയ്സ് പാക്കറ്റെടുത്ത് ചിപ്സ് ഇതിനകത്ത് വച്ചുതന്നെ പൊടിക്കുന്നു. എന്നിട്ട് ഇതിലേക്ക് മുട്ട പൊട്ടിച്ചൊഴിച്ച് ഉള്ളിയും തക്കാളിയും ഉപ്പും ചേർക്കുന്നു. എല്ലാം യോജിപ്പിച്ച ശേഷം പാക്കറ്റ് നന്നായി അടച്ചുവയ്ക്കുന്നു. പിന്നീട് ഒരു പാനിൽ വെള്ളം ചൂടാക്കി പാക്കറ്റോടെ ഇത് വെള്ളത്തിലേക്ക് ഇറക്കിവയ്ക്കുകയാണ്. ഇതിനകത്ത് വച്ച് തന്നെയാണ് ഓംലെറ്റ് തയ്യാറാക്കുന്നത്.
പാകമായിക്കഴിയുമ്പോൾ മറ്റൊരു പാത്രത്തിലേക്ക് പകർന്ന് മുറിച്ചെടുക്കുകയാണ് ചെയ്യുന്നത്. എന്നാൽ പാക്കറ്റിൽ വച്ച് തന്നെ ഓംലെറ്റ് ഉണ്ടാക്കിയതാണ് വീഡിയോ കണ്ട മിക്കവരിലും അഭിപ്രായവ്യത്യാസമുണ്ടാക്കിയത്. ഇത് ആരോഗ്യത്തിന് വെല്ലുവിളിയാണെന്നും ആരും ഇത് പരീക്ഷിക്കരുതെന്നും അധികപേരും പറയുന്നു. ലെയ്സ് ചേർത്ത് ഓംലെറ്റ് ഉണ്ടാക്കണമെങ്കിൽ ഓംലെറ്റ് തയ്യാറാക്കുമ്പോൾ മുകളിലായി ലെയ്സ് ചേർത്താൽ പോരെ എന്നാണ് ഏവരും ചോദിക്കുന്നത്. എന്തായാലും വ്യത്യസ്തമായ ഓംലെറ്റ് പരീക്ഷണത്തിന്‍റെ വീഡിയോ വലിയ രീതിയിൽ ശ്രദ്ധേയമായിരിക്കുകയാണ്.
വീഡിയോ കണ്ടുനോക്കൂ...
Also Read:- 'രാത്രി വിശക്കുമ്പോള്‍ കാണാം ഈ വീഡിയോ'; പരിഹാസവുമായി ഫുഡ് ലവേഴ്സ്
