കുടിക്കാൻ വെള്ളമില്ല, കല്ല്യാണം കഴിക്കാൻ പെണ്ണുമില്ല, നാടുവിടാനൊരുങ്ങി യുവാക്കൾ

കുടിക്കാൻ വെള്ളവുമില്ല, കല്ല്യാണം കഴിക്കാൻ പെണ്ണുമില്ല എന്ന അവസ്ഥയിലാണ് മധ്യപ്രദേശിലെ ജറുവ ഗ്രാമത്തിലെ നിവാസികൾ. ചൂട് കനത്തതോടെ കുടിവെള്ളത്തിനായി നെട്ടോടം ഓടുകയാണ് ഇവിടുത്തെ ജനങ്ങൾ. 1200 നിവാസികൾ താമസിക്കുന്ന ഈ ​ഗ്രാമത്തിൽ വെള്ളമുള്ള ഒരു കുടിവെള്ള സ്രോതസ്സ് പോലുമില്ല. ആകെയുള്ളതാക‌ട്ടെ ​ഗ്രാമത്തിൽ നിന്ന് ഒരു കിലോമീറ്റർ അകലെയുള്ള അഴുക്കുചാലുകളിൽ സ്ഥിതി ചെയ്യുന്ന ഒരു കുളം മാത്രം. മറ്റ് മാർ​ഗങ്ങളൊന്നുമില്ലാത്തിനാൽ അഴുക്കുജലം കെട്ടിക്കിടക്കുന്ന ഈ കുളത്തിനെയാണ് ഇവിടുത്തെ ജനങ്ങളും ആടുമാടുകളുമെല്ലാം ദാഹമകറ്റാൻ ആശ്രയിക്കുന്നത്. 

കാര്യങ്ങൾ ഇങ്ങനെയൊക്കെ ആയതുകൊണ്ട് തന്നെ മറ്റൊരു വെല്ലുവിളി കൂടി നേരിടേണ്ട അവസ്ഥയിലാണ് ഈ ​ഗ്രാമത്തിലെ യുവാക്കൾ. കാര്യം മറ്റൊന്നുമല്ല ഇവിടുത്തെ അവിവാഹിതരായ പുരുഷന്മാർക്ക് ഇപ്പോൾ വിവാഹാലോചനകൾ നടക്കുന്നതേ ഇല്ല. കുടിവെള്ളമില്ലാത്ത ഒരു ​ഗ്രാമത്തിലേക്ക് വിവാഹം കഴിച്ചുവരാൻ ആരും തയ്യാറല്ല എന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്. ഈ ​ഗ്രാമത്തിലെ യുവതികളാകട്ടെ മറ്റ് ​ഗ്രാമങ്ങളിലേക്ക് വിവാഹം കഴിച്ച് പോവുകയും ചെയ്യുന്നു.

ആദിവാസികൾ കുടുതലുള്ള പ്രദേശമാണ് ജറുവ. ഗ്രാമത്തിലെ ആളുകൾ ഈ ദുരിതം അനുഭവിക്കാൻ തുടങ്ങിയിട്ട് 15 വർഷത്തിലധികമായതായാണ് ​ഗ്രാമവാസികൾ തന്നെ പറയുന്നത്.  ഗ്രാമവാസികൾ അവരുടെ ഒരു ദിവസത്തിൻ്റെ  പ്രധാനഭാഗം വെള്ളം ശേഖരിക്കുന്നതിനായി കിലോമീറ്ററുകൾ താണ്ടി നടത്തുന്ന യാത്രകൾക്കാണ് ഉപയോ​ഗിക്കുന്നത്. കാലങ്ങളായി തുടരുന്ന ജലക്ഷാമം പരിഹരിക്കാൻ കാര്യമായ നടപടികൾ സ്വീകരിക്കാത്തത് എന്തുകൊണ്ടാണെന്ന ചോദ്യമാണ് ​ഗ്രാമവാസികളിൽ നിന്നും ഉയരുന്നത്. 

എന്നാൽ, കുഴൽക്കിണറുകൾ, ഹാൻഡ് പമ്പുകൾ തുടങ്ങിയവ പോലുള്ള മണ്ണിനടിയിൽ നിന്ന് വെള്ളം വലിച്ചെടുക്കുന്നതിനുള്ള പദ്ധതികൾ ന‌ടത്താനുള്ള ശ്രമം പാറക്കെട്ടുകളുള്ള മണ്ണിൻ്റെ സാന്നിധ്യം മൂലം ആവർത്തിച്ച് പരാജയപ്പെടുന്നതായാണ് ജില്ലാ സിഇഒ മനീഷ് ബാഗ്രി പറയുന്നത്. എങ്ങനെയും ​ഗ്രാമവാസികളുടെ ദുരിതം അവസാനിപ്പിക്കാനുള്ള മാർ​ഗം കണ്ടെത്താനുള്ള ശ്രമത്തിലാണെന്നും അദ്ദേഹം കൂട്ടിച്ചേർത്തു.

ഏഷ്യാനെറ്റ് ന്യൂസ് ലൈവ് കാണാം: 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം

• water
• water crisis