'ഗാര്‍ഗി' കണ്ടിരിക്കവെ തിയറ്ററിന്‍റെ വാതില്‍ തുറന്ന് സായ് പല്ലവി; അമ്പരന്ന് ആരാധകര്‍: വീഡിയോ
ചെന്നൈയിലും ഹൈദരാബാദിലുമുള്ള തിയറ്ററുകളിലാണ് സായ് പല്ലവി എത്തിയത്
 )
Followറിലീസിനു മുന്‍പെത്തിയ പ്രൊമോഷണല്‍ മെറ്റീരിയലുകളിലൂടെത്തന്നെ വലിയ പ്രതീക്ഷ ഉണര്‍ത്തിയ തമിഴ് ചിത്രമായിരുന്നു ഗാര്‍ഗി (Gargi). സായ് പല്ലവി (Sai Pallavi) ടൈറ്റില്‍ കഥാപാത്രമായ ചിത്രത്തിന്റെ സംവിധാനം ഗൌതം രാമചന്ദ്രനാണ്. ഈ മാസം 15ന് തിയറ്ററുകളിലെത്തിയ ചിത്രത്തിന് മികച്ച പ്രതികരണങ്ങളാണ് ലഭിക്കുന്നത്. ഇപ്പോഴിതാ ചിത്രത്തിന്റെ പ്രൊമോഷന്റെ ഭാഗമായി പ്രദര്‍ശിപ്പിക്കുന്ന തിയറ്ററുകളില്‍ നേരിട്ടെത്തി പ്രേക്ഷകരെ കാണുകയാണ് സായ് പല്ലവി. ഇതിന്‍റെ വീഡിയോകള്‍ സോഷ്യല്‍ മീഡിയയില്‍ തരംഗമാവുന്നുണ്ട്.
ചെന്നൈയിലും ഹൈദരാബാദിലുമുള്ള തിയറ്ററുകളിലാണ് സായ് പല്ലവി എത്തിയത്. ചെന്നൈയില്‍ എസ്‍പിഐ എസ്കേപ്പ്, പിവിആര്‍ ഗ്രാന്‍ഡ് ഗലാഡ, വേളച്ചേരിയിലുള്ള ലൂക്സ്, പിവിആര്‍ എന്നീ തിയറ്ററുകളില്‍ സായ് പല്ലവി എത്തിയതിന്‍റെ വീഡിയോ നിര്‍മ്മാതാക്കള്‍ തന്നെ സോഷ്യല്‍ മീഡിയയിലൂടെ പുറത്തിറക്കിയിട്ടുണ്ട്. ചിത്രം കണ്ടിരിക്കെ ചിത്രത്തിലെ നായിക അപ്രതീക്ഷിതമായി മുന്നിലെത്തുമ്പോഴുള്ള സിനിമാപ്രേമികളുടെ ആഹ്ലാദം വീഡിയോയില്‍ കാണാം. ആരാധകരോട് ചിത്രത്തെക്കുറിച്ച് സംസാരിച്ചും ഒപ്പം നിന്ന് സെല്‍ഫിയെടുത്തുമാണ് സായ് പല്ലവി മടങ്ങിയത്.
സംവിധായകനൊപ്പം ഹരിഹരന്‍ രാജുവും ചേര്‍ന്നാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്. സായ് പല്ലവിക്കൊപ്പം ഐശ്വര്യ ലക്ഷ്മിയും ഒരു പ്രധാന കഥാപാത്രത്തെ അവതരിപ്പിച്ചിരിക്കുന്നു. ആര്‍ എസ് ശിവജി, കലൈമാമണി ശരവണന്‍, ജയപ്രകാശ്, പ്രതാപ്, സുധ, ലിവിങ്സ്റ്റണ്‍, കവിതാലയ കൃഷ്ണന്‍, കലേഷ് രമാനന്ദ് തുടങ്ങിയവരാണ് മറ്റു കഥാപാത്രങ്ങളെ അവതരിപ്പിച്ചിരിക്കുന്നത്. രവിചന്ദ്രന്‍ രാമചന്ദ്രന്‍, തോമസ് ജോര്‍ജ്, ഗൌതം രാമചന്ദ്രന്‍ എന്നിര്‍ക്കൊപ്പം ഐശ്വര്യ ലക്ഷ്മിയും നിര്‍മ്മാണ പങ്കാളിയാണ്. ശ്രൈയന്തിയും പ്രേംകൃഷ്ണ അക്കാട്ടുവും ചേര്‍ന്നാണ് ചിത്രത്തിന്റെ ഛായാഗ്രഹണം നിര്‍വ്വഹിച്ചിരിക്കുന്നത്. എഡിറ്റിംഗ് ഷഫീഖ് മുഹമ്മദ് അലി. ചിത്രത്തിന്റെ പ്രൊമോഷണല്‍ വേദിയില്‍ സംസാരിക്കവെ ഐശ്വര്യ ലക്ഷ്മി വിതുമ്പിയത് വാര്‍ത്തയായിരുന്നു.
