ബോളിവുഡിന് ആശ്വാസജയവുമായി 'സര ഹട്കെ'; രണ്ടാഴ്ചത്തെ കളക്ഷന്‍
ജൂണ്‍ 2 ന് തിയറ്ററുകളില്‍ എത്തിയ ചിത്രം
 )
Followവലിയ വിജയങ്ങള്‍ അപൂര്‍വ്വമാണ് ഇപ്പോള്‍ ബോളിവുഡില്‍. സൂപ്പര്‍താര ചിത്രങ്ങള്‍ പോലും പ്രതീക്ഷിക്കുന്ന വിജയം നേടാത്ത സാഹചര്യത്തില്‍ ചില ചിത്രങ്ങള്‍ മാത്രമാണ് തിയറ്ററുകളില്‍ നന്നായി ഓടിയത്. അതിലൊന്നായിരുന്നു ഷാരൂഖ് ഖാന്‍ ചിത്രം പഠാന്‍. ആഗോള ബോക്സ് ഓഫീസില്‍ നിന്ന് 1000 കോടി ക്ലബ്ബില്‍ ഇടംപിടിച്ച പഠാന്‍റെ ഇന്ത്യന്‍ ബോക്സ് ഓഫീസ് ഗ്രോസ് 500 കോടിയിലേറെ ആയിരുന്നു. എന്നാല്‍ ഈ വിജയത്തിന് കാര്യമായ തുടര്‍ച്ച ലഭിക്കാതിരുന്നത് ഹിന്ദി സിനിമാലോകത്തെ ചിന്തിപ്പിച്ച വിഷയമായിരുന്നു. അതിനാല്‍ത്തന്നെ ചെറിയ വിജയങ്ങളെപ്പോലും ബോളിവുഡ് ഇന്ന് കാര്യമായാണ് എടുക്കുന്നത്. ഇപ്പോഴിതാ ഈ മാസാദ്യം തിയറ്ററുകളിലെത്തിയ വിക്കി കൌശല്‍ ചിത്രം സര ഹട്കെ സര ബച്ച്കെ മികച്ച പ്രതികരണവും കളക്ഷനുമായി തിയറ്ററുകളില്‍ തുടരുകയാണ്.
ജൂണ്‍ 2 ന് തിയറ്ററുകളില്‍ എത്തിയ ചിത്രം ഇതിനകം നേടിയിരിക്കുന്നത് 58.77 കോടിയാണെന്ന് പ്രമുഖ ട്രേഡ് അനലിസ്റ്റ് തരണ്‍ ആദര്‍ശ് ട്വീറ്റ് ചെയ്തു. മികച്ച മൌത്ത് പബ്ലിസിറ്റിയുമായി തുടരുന്ന ചിത്രത്തിന് ഇക്കഴിഞ്ഞ വാരാന്ത്യത്തിലും തിയറ്ററുകളില്‍ മികച്ച പ്രതികരണമാണ് ലഭിച്ചത്. ഞായറാഴ്ച മാത്രം 7.02 കോടിയാണ് ചിത്രം നേടിയത്. ഇന്ത്യന്‍ ബോക്സ് ഓഫീസില്‍ നിന്നുള്ള കണക്കുകളാണ് ഇതൊക്കെ.
ലുക്കാ ചുപ്പി, മിമി ഉള്‍പ്പെടെയുള്ള ചിത്രങ്ങള്‍ ഒരുക്കിയ ലക്ഷ്മണ്‍ ഉടേകര്‍ സംവിധാനം ചെയ്തിരിക്കുന്ന ചിത്രം റൊമാന്‍റിക് കോമഡി വിഭാഗത്തില്‍ പെടുന്ന ഒന്നാണ്. ഇനാമുള്‍ഹഖ്, സുസ്മിത മുഖര്‍ജി, നീരജ് സൂദ്, രാകേഷ് ബേദി, ഷരീബ് ഹാഷ്മി, ആകാശ് ഖുറാന, കാനുപ്രിയ പണ്ഡിറ്റ്, അനുഭ ഫത്തേപുര, ഹിമാന്‍ഷു കോലി തുടങ്ങിയവരാണ് ചിത്രത്തില്‍ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. വിക്കി കൌശല്‍ നായകനായി എത്തുന്ന ഈ വര്‍ഷത്തെ ആദ്യ റിലീസ് ആണ് സര ഹട്കെ സര ബച്ച്കെ.
ALSO READ : വിദഗ്‍ധ ചികിത്സയ്ക്ക് ആശുപത്രിയിലേക്ക്? ബിഗ് ബോസിനെ തീരുമാനം അറിയിച്ച് വിഷ്‍ണു
WATCH : 'ഇതാണ് ഒറിജിനലെങ്കിൽ അത് ഭൂമിക്കുതന്നെ ഭാരം'; ഫിറോസ് ഖാനുമായുള്ള അഭിമുഖം: വീഡിയോ
