Hey Sinamika song : 'ഹേ സിനാമിക' പുതിയ ഗാനവും ഹിറ്റ്, ദുല്‍ഖര്‍ ചിത്രം നാളെ തിയറ്ററുകളില്‍
ദുല്‍ഖര്‍ നായകനായ ചിത്രം 'ഹേ സിനാമിക' (Hey Sinamika) നാളെ തിയറ്ററുകളിലെത്തും.
 )
Followദുല്‍ഖര്‍ നായകനാകുന്ന പുതിയ ചിത്രം 'ഹേ സിനാമിക' നാളെ റിലീസ് ചെയ്യുകയാണ്. ഇന്ത്യയിലെ തന്നെ ഏറ്റവും പ്രഗദ്ഭയായ നൃത്ത സംവിധായകരിൽ ഒരാളായ ബ്രിന്ദ മാസ്റ്റർ ആണ് 'ഹേ സിനാമിക' സംവിധാനം ചെയ്യുന്നത്. 'ഹേ സിനാമിക'യുടെ ഫോട്ടോകളൊക്കെ ഓണ്‍ലൈനില്‍ തരംഗമായി മാറിയിരുന്നു. 'ഹേ സിനാമിക' ചിത്രത്തിന്റെ പുതിയ ഗാനം കഴിഞ്ഞ ദിവസം പുറത്തുവിട്ടതും വൻ ഹിറ്റായിരിക്കുകയാണ് (Hey Sinamika song).
'ഹേയ് സിനാമിക' ചിത്രത്തില്‍ നായികമാരായ അദിതി റാവുവും കാജല്‍ അഗര്‍വാളുമാണ് ഗാനരംഗത്ത് ഉള്ളത്. ഇവരുടെ നൃത്തമാണ് ചിത്രത്തിന്റെ ഗാന രംഗത്ത് ദൃശ്യവത്‍കരിച്ചിരിക്കുന്നത്. ഗോവിന്ദ് വസന്തയാണ് ചിത്രത്തിന്റെ സംഗീത സംവിധാനം നിര്‍വഹിച്ചിരിക്കുന്നത്. മദൻ കർക്കി തിരക്കഥയെഴുതിയ ചിത്രത്തിൽ സംഗീതത്തിനും നൃത്തത്തിനും പ്രാധാന്യമുണ്ട്.
ബോളിവുഡിലും നൃത്ത സംവിധാനം ചെയ്‍തിട്ടുള്ള ബ്രിന്ദ മാസ്റ്റർ 2000ൽ റിലീസ് ചെയ്‍ത 'മുഖവരി; എന്ന ചിത്രത്തിലൂടെയാണ് തന്റെ ആദ്യ തമിഴ്‍നാട് സംസ്ഥാന അവാർഡ് സ്വന്തമാക്കുന്നത്. എന്നാൽ അതിനും മുൻപ് 'ദയ' എന്ന മലയാള ചിത്രത്തിലൂടെ ബ്രിന്ദ മാസ്റ്റർ ആദ്യത്തെ ദേശീയ പുരസ്‍കാരം നേടിയിരുന്നു. 'ദീപാവലി' എന്ന ചിത്രത്തിലൂടെ രണ്ടാം തമിഴ്‍നാട് സ്റ്റേറ്റ് അവാർഡ് നേടിയ ബൃന്ദ മാസ്റ്റര്‍ 'ഉദയനാണു താരം', 'വിനോദയാത്ര', 'കൽക്കട്ട ന്യൂസ്', 'മരക്കാർ അറബിക്കടലിന്റെ സിംഹം' എന്നീ ചിത്രങ്ങളിലൂടെ ആണ് നാല് കേരളാ സംസ്ഥാന അവാർഡ് നേടിയത്.
'പ്രേമിഞ്ചുകുണ്ഡം രാ', 'കാക്ക കാക്ക' ഏന്നീ ചിത്രങ്ങളിലൂടെ രണ്ടു ഫിലിം ഫെയർ അവാർഡുകളും ബ്രിന്ദ മാസ്റ്റർ നേടി. 'മധുരൈ', ടവാരണം ആയിരം', 'കടൽ', ബോളിവുഡ് ചിത്രം 'പി കെ', വിജയ് ചിത്രം 'തെരി' എന്നിവ ബ്രിന്ദ മാസ്റ്റർ നൃത്ത സംവിധാനം ചെയ്‍തതില്‍ ശ്രദ്ധേയമായവയാണ്. 'ഗാന്ധാരി'യെന്ന തെലുങ്കു മ്യൂസിക് വീഡിയോ സംവിധാനം ചെയ്‍തതും ബ്രിന്ദ മാസ്റ്റർ ആണ്. കീർത്തി സുരേഷ് അഭിനയിച്ച വീഡിയോ വൻ ഹിറ്റായിരുന്നു. മലയാളം, തമിഴ്, തെലുങ്കു, കന്നഡ, ഹിന്ദി ഭാഷകളിൽ ആയി ഒട്ടേറെ ചിത്രങ്ങളിൽ നൃത്ത സംവിധാനം ചെയ്‍ത ബൃന്ദ മാസ്റ്ററിന്റെ സംവിധായികയായുള്ള അരങ്ങേറ്റം വലിയ വിജയം നേടുമെന്ന പ്രതീക്ഷയിലാണ് ആരാധകർ. ദുല്‍ഖര്‍ നായകനാകുന്ന ചിത്രമായ 'ഹേ സിനാമി'കയിലൂടെ ഒരു മികച്ച സംവിധായികയെയും കൂടി ബ്രിന്ദ മാസ്റ്ററില്‍ നിന്ന് ലഭിക്കുമെന്നുള്ള പ്രതീക്ഷയിലാണ് എല്ലാവരും തിയറ്ററുകളിലേക്ക് പോകാൻ കാത്തിരിക്കുന്നത്.
ദുല്‍ഖര്‍ 'ഹേ സിനാമിക' ചിത്രത്തിന് വേണ്ടി ആലപിച്ച ഗാനം വൻ ഹിറ്റായിരുന്നു. 'അച്ചമില്ലൈ' എന്ന് തുടങ്ങുന്ന ഒരു ഗാനമായിരുന്നു ദുല്‍ഖര്‍ ആലപിച്ചത്. പ്രീത ജയരാമനാണ് ചിത്രത്തിന്റെ ഛായാഗ്രാഹണം നിര്‍വഹിക്കുന്നത്. അദിതി റാവു, കാജല്‍ അഗര്‍വാള്‍, നക്ഷത്ര നാഗേഷ്, മിർച്ചി വിജയ്, താപ്പ, കൗശിക്, അഭിഷേക് കുമാർ, പ്രദീപ് വിജയൻ കോതണ്ഡ രാമൻ, ഫ്രാങ്ക്, സൗന്ദര്യ, ജെയിൻ തോംപ്‍സൺ, രഘു, സംഗീത, ധനഞ്‍ജയൻ എന്നിവരും വേഷമിടുന്നു.
