ലോക്കൽ മുറുക്കാനല്ല, 1 ലക്ഷം രൂപ വിലയുള്ള വെറൈറ്റി പാൻ, വിവാഹദിനത്തിലെ സ്പെഷ്യൽ
നവദമ്പതികളാണ് മിക്കവാറും ഈ പാൻ വാങ്ങുന്നത്. അവർക്ക് ഈ പാൻ പ്രിയപ്പെട്ടതാവാൻ കാരണം അതിന്റെ വില മാത്രമല്ല. ഈ പാൻ പൊതിഞ്ഞിരിക്കുന്നത് സ്വർണ ഫോയിൽ കൊണ്ടാണ്. ഒപ്പം പ്രിൻസ് ആൻഡ് പ്രിൻസസ് എന്നിങ്ങനെ രണ്ട് ബോക്സുകളിലായിട്ടാണ് കിട്ടുക.
 )
മുറുക്കാൻ ഇഷ്ടപ്പെടുന്നവർ ഒരുപാടുണ്ട്. ഇന്ത്യൻ സംസ്കാരത്തിൽ പാനിന് വലിയ സ്ഥാനം തന്നെയാണ്. വെറുതെ വീട്ടിലിരിക്കുമ്പോൾ മുതൽ വലിയ വലിയ ചടങ്ങുകളിൽ വരെ പ്രധാന ഘടകം തന്നെയാണ് ഈ പാൻ. പ്രത്യേകിച്ചും ഉത്തരേന്ത്യൻ സംസ്ഥാനങ്ങളിൽ. എന്തായാലും ഇപ്പോൾ വൈറലാവുന്നത് ഒരു വില കൂടിയ പാനാണ്. വില കൂടിയത് എന്ന് പറയുമ്പോൾ ആയിരമോ പതിനായിരമോ ഒന്നുമല്ല, ഈ പാനിന്റെ വില ഒരുലക്ഷം രൂപയാണ്.
മുംബൈയിലെ മാഹിമിലുള്ള ദി പാൻ സ്റ്റോറി എന്ന കടയിലാണ് ഈ വ്യത്യസ്തമായ പാൻ ലഭിക്കുക. എംബിഎ ബിരുദധാരിയായ നൗഷാദ് ഷെയ്ഖിന്റേതാണ് ഈ കട. കുടുംബത്തിൽ നിന്നും കൈമാറി വന്ന ഈ കട നടത്താൻ വേണ്ടിയാണത്രെ നൗഷാദ് കോർപറേറ്റ് ജോലികൾക്കൊന്നും പോവാതിരുന്നത്. എന്തായാലും, നൗഷാദിന്റെ കടയിലെ ഈ പാൻ വലിയ ചർച്ചയാണ്.
നവദമ്പതികളാണ് മിക്കവാറും ഈ പാൻ വാങ്ങുന്നത്. അവർക്ക് ഈ പാൻ പ്രിയപ്പെട്ടതാവാൻ കാരണം അതിന്റെ വില മാത്രമല്ല. ഈ പാൻ പൊതിഞ്ഞിരിക്കുന്നത് സ്വർണ ഫോയിൽ കൊണ്ടാണ്. ഒപ്പം പ്രിൻസ് ആൻഡ് പ്രിൻസസ് എന്നിങ്ങനെ രണ്ട് ബോക്സുകളിലായിട്ടാണ് കിട്ടുക. അതിൽ കുങ്കുമപ്പൂവും, മനോഹരമായ സെന്റും ഒക്കെയുണ്ടാവും. ഇത് കൂടാതെ താജ്‍മഹലിന്റെ ഒരു ചെറിയ രൂപവും ഇതിനൊപ്പമുണ്ടാകും. ഇതൊക്കെ കൊണ്ടാണ് വിവാഹരാത്രികളിലേക്ക് വേണ്ടി ആളുകൾ ഈ പാൻ ഓർഡർ ചെയ്യുന്നത്.
അടുത്തിടെ ഇന്ത്യ ഈറ്റ് മാനിയ എന്ന ഇൻസ്റ്റഗ്രാം പേജിലും ഈ പാനിന്റെ ചിത്രം പങ്കുവച്ചിരുന്നു. നിരവധിപ്പേരാണ് അതിന് കമന്റുകളുമായി എത്തിയത്. സംഗതി പാൻ വെറൈറ്റിയാണ് എങ്കിലും ആളുകൾ എന്തായാലും അതിന്റെ വില കേട്ട് ഞെട്ടിയിട്ടുണ്ട്.
