ഇത് വെറുക്കപ്പെട്ടവന് കിട്ടിയ സ്നേഹം: സാബുമോന്
ബിഗ് ബോസ് എനിക്കൊരു പരീക്ഷമായിരുന്നു. അതിലൂടെ ഞാന് എന്നെ തന്നെ കടത്തി വിടുകയായിരുന്നു. കടന്നു പോയ പല അവസ്ഥകളും എന്തൊക്കെ ആയിരുന്നുവെന്ന് വാക്കുകള് കൊണ്ടു പോലും പറഞ്ഞറിയിക്കാന് എനിക്കാവില്ല.
ബിഗ് ബോസില് നിന്നും പുറത്തു വന്നിട്ടും നടന്ന കാര്യങ്ങളുമായിട്ടൊന്നും പൊരുതപ്പെടാനാവാത്ത അവസ്ഥയിലാണ് സാബുമോന് അബ്ദു സമദ്. ബിഗ് ബോസിനകത്ത് ഒരു ഓളത്തില് പറഞ്ഞതും നേരം പോക്കിന് ചെയ്തതുമായ കാര്യങ്ങളൊക്കെ പുറത്തുണ്ടാക്കിയ ഓളം കണ്ട് തരിച്ചിരിക്കുകയാണ് ബിഗ് ബോസ് ടൈറ്റില് വിന്നര്. ബിഗ് ബോസില് നിന്നും പുറത്തു വന്ന സാബു ഏഷ്യാനെറ്റ് ന്യൂസ് ഓണ്ലൈനിനോട് സംസാരിക്കുന്നു...
ഞാന് വളരെ വെറുക്കപ്പെട്ട ഒരുത്തനാണ്. എന്റെ പേരില് ഒരുപാട് ഇഷ്യൂസ് വന്നിട്ടുണ്ട്. സോഷ്യല്മീഡിയയിലൊക്കെ വളരെ വെറുപ്പ് എനിക്ക് നേരെയുണ്ടെങ്കിലും എന്റെ സുഹൃദ് വലയത്തില് ഹൃദയം കൊണ്ട് സംസാരിക്കുന്ന ഒരാളാണ് ഞാന്. എന്നെ അറിയുന്നവര്ക്ക് എന്നെ അറിയാം ബാക്കിയുള്ളവര് വേണമെങ്കില്അംഗീകരിച്ചാല് മതി എന്നതായിരുന്നു എന്റെ നിലപാട്.
ബിഗ് ബോസിലേക്ക് ക്ഷണം ലഭിച്ചപ്പോള് ഞാന് വളരെ കണ്ഫ്യൂസ്ഡ്ഡ് ആയിരുന്നു. അനൂപ്,സ്റ്റീഫന് തുടങ്ങിയ സുഹൃത്തുകളോടൊക്കെ ഞാന് ബിഗ് ബോസില് പങ്കെടുക്കുന്നതിനെക്കുറിച്ച് ചോദിച്ചു. നിങ്ങള് നമ്മളോടൊക്കെ ഇടപെടുന്ന പോലെ അവിടെയും പെരുമാറിയാല് മതിയെന്നായിരുന്നു അവരുടെ അഭിപ്രായം. വേറെ ഒരുപാട് പേര് എന്നോട് ബിഗ്ബോസിന് പോകരുതെന്നാണ് പറഞ്ഞത്. കോളേജില് എന്റെ ജൂനിയറാണ് രാഹുല് ഈശ്വര് അവന് എന്നെ വിളിച്ചു പറഞ്ഞത് നിര്ബന്ധമായും ഷോയ്ക്ക് പോണം എന്നായിരുന്നു. നിങ്ങള്ക്ക് നിങ്ങളാരാണ് എന്ന് കാണിക്കാനുള്ള അവസരമാണിതെന്നാണ് രാഹുല് പറഞ്ഞത്.
എന്തായാലും പിന്നെ കൂടുതല് പേരോടൊന്നും അഭിപ്രായം ചോദിക്കാന് നിന്നില്ല ഉമ്മയോട് പറഞ്ഞു നേരെ ബിഗ് ബോസിലേക്ക് ഇറങ്ങി. രണ്ടാഴ്ച്ച കൊണ്ട് തിരിച്ചു വരാം എന്നായിരുന്നു എന്റെ കണക്കുകൂട്ടല്. എന്നോട് ആളുകള്ക്കുള്ള ഒരു പൊതുവികാരം വച്ചായിരുന്നു അങ്ങനെ വിചാരിച്ചത്. കാരണം ആളുകള്ക്ക് പൊതുവേ എന്നോടൊരു വെറുപ്പാണല്ലോ.
ഞാന് ഭയങ്കരമായി പേടിച്ചിട്ടുണ്ട്. എന്നെക്കുറിച്ച് ഓര്ത്തല്ല. എന്റെ കുടുംബത്തിന് ഞാനൊരു ബാധ്യതയാവുമോ എന്നോര്ത്ത്. ഞാന് എന്റെ കുടുംബത്തെ പൊതുവെ പബ്ലിക് പ്ലാറ്റ്ഫോമിലേക്ക് കൊണ്ടു വരാറില്ല. എനിക്ക് രണ്ട് ചെറിയ പെണ്കുട്ടികളാണ് നേരത്തെ ഒരു വിഷയത്തില് എന്റെ കുടുംബത്തിന്റെ ഫോട്ടോയൊക്കെ വച്ച് എനിക്കൊരു ഭീഷണിയൊക്കെ വന്നിരുന്നു. സാധാരണ രീതിയില് അതൊക്കെ വാ നോക്കാം എന്ന മട്ടില് എടുക്കുന്ന ആളാണ് ഞാന് പക്ഷേ കുടുംബത്തെയൊക്കെ വലിച്ചിടുന്പോള് ഞാന് അവര്ക്കൊരു ബാധ്യതയായി മാറുമോ എന്ന് ഞാന് ചിന്തിച്ചിട്ടുണ്ട്.
ബിഗ് ബോസിലെ സാബു ആരാണെന്ന് ചോദിച്ചാല് ഞാന് തന്നെയാണ്... ഒരുപാട് സുഹൃത്തുകള് എനിക്കുണ്ട് എന്നെ അറിയുന്നവര്ക്ക് എന്നെ ഇഷ്ടമാണ്. എന്റെ സുഹൃത്തുകള് ആരും എന്നെ വിട്ടു പോയിട്ടില്ല. പക്ഷേ എന്നെ വെറുക്കുന്നവര്ക്ക് അങ്ങനെ തന്നെ നില്ക്കും ഞാനത് മാറ്റാന് മെനക്കെടാറില്ല. ഞാന് എല്ലാവരുടെ അടുത്തും സംസാരിക്കും കൂട്ടുകാരെ പറ്റിക്കുന്നതും വട്ടം കറക്കുന്നതുമൊക്കെ കുട്ടിക്കാലം തൊട്ടേ എന്റെ സ്ഥിരം പരിപാടിയാണ്.
ഞാന് എല്ലാവരേയും നന്നായി വിശ്വസിക്കുന്ന ഒരാളാണ്. ഒരിക്കല് ഒരു ട്രെയിന് യാത്രയില് ഒരാളെ പരിചയപ്പെട്ടു. അയാള് അയാളുടെ അച്ഛന് മരിച്ചിട്ട് നാട്ടിലേക്ക് പോകുകയാണ്. അത്യാവശ്യം പ്രായമുള്ള ആളാണ് കക്ഷി ചോദിച്ചപ്പോള് പുള്ളി ആറ്റോമിക് റിസര്ച്ച് സെന്ററില് സീനിയര് സയന്റിസ്റ്റ് ആണ്. ഞാന് പുള്ളിയോട് ചോദിച്ചു നിങ്ങള് എന്താണ് ഈ റിയാക്ടറില് കാണിക്കുന്നതെന്ന്. പിന്നെ അങ്ങോട്ട് ആ രാത്രി മുഴുവന് ട്രെയിന്റ ടോയ്ലറ്റിന്റെ സൈഡില് നിന്നും ആറ്റോമിക് റിയാക്ടറിന്റെ അകത്ത് യുറേനിയം നിറയ്ക്കുന്നത് എങ്ങനെ എന്ന് പുള്ളി എനിക്ക് പറഞ്ഞു തരികയായിരുന്നു.
അങ്ങനെ ഒരു മനുഷ്യനാണ് ഞാന് . എനിക്കിഷ്ടമാണ് ആളുകളെ പഠിക്കാനും അവരില് നിന്നും കാര്യങ്ങള് അറിയാനുമൊക്കെ എനിക്ക് ഇഷ്ടമാണ്. ഇപ്പോള് ഞാന് നിങ്ങളോട് സംസാരിക്കുന്പോള് എനിക്കറിയാതെ കാര്യം നിങ്ങള് പറഞ്ഞാല് അതു മുഴുവന് ഞാന് തോണ്ടിയെടുക്കും.
എനിക്ക് തോന്നുന്നത് എന്നെ ബിഗ് ബോസ് വിളിച്ചത് രഞ്ജിനി ഹരിദാസ് ഉള്ളത് കൊണ്ടാണ്. രഞ്ജിനിയെ ഞാന് മുന്പ് കണ്ടിട്ടില്ല.ബിഗ് ബോസ് പോലൊരു ഷോയ്ക്ക് അകത്ത് രഞ്ജിനി ഹരിദാസുണ്ടെങ്കില് സാബുവിനെ കൂടിയിട്ടാല് കിട്ടുന്ന ആ കണ്ടന്റ് അത് ബിഗ് ബോസ് കണക്കിലെടുത്തിട്ടുണ്ടാവും. ഞാന് വഴക്കിടുന്നതൊക്കെ ഫണ് ആയിട്ടാണ്. രഞ്ജിനി ബിഗ് ബോസിലോട്ട് കേറി വരുന്നത് കണ്ടപ്പോള് ഞാന് പറഞ്ഞു.. ഞാനില്ല ഞാന് പോയ്ക്കോള്ളാം എന്ന്.
ആദ്യത്തെ കുറേ ആഴ്ച്ചകളില് ഞാന് കുറേ അലന്പാണ്. പിന്നെ എപ്പോഴോ ലാലേട്ടന് എന്നോട് ചോദിക്കുന്നത് സാബു നിനക്ക് നന്നായിക്കൂടെ എന്നാണ്.. ഇങ്ങനെയെല്ല ചോദിച്ചത് പക്ഷേ ഞാന് അത് കേട്ടത് അങ്ങനെയാണ്. ഞാന് പറഞ്ഞല്ലോ മറ്റുള്ളവര് എന്നെപ്പറ്റി എന്തു വിചാരിക്കും എന്ന് ചിന്തിക്കാത്ത ആളാണ് ഞാന്.
ആദ്യത്തെ കുറേ എപ്പിസോഡിലൊക്കെ നോമിനേഷന് വരുന്പോ ഞാന് നേരത്തെ എണീച്ചു നില്ക്കുമായിരുന്നു എനിക്കാര് വോട്ടു ചെയ്യും എന്നാണ് എന്റെ ചിന്ത. പക്ഷേ എല്ലാ കണക്കുകൂട്ടലും തെറ്റിപ്പോയി. പേളി നല്ലൊരു വ്യക്തിയാണ് എല്ലാവര്ക്കും ഇഷ്ടപ്പെടുന്ന ആളാണ് പേളി അവളുടെ മുന്നില് ചെന്നുനിന്നാല് ഞാന് ജയിക്കില്ല. ബിഗ് ബോസ് എനിക്കൊരു പരീക്ഷമായിരുന്നു. അതിലൂടെ ഞാന് എന്നെ തന്നെ കടത്തി വിടുകയായിരുന്നു. കടന്നു പോയ പല അവസ്ഥകളും എന്തൊക്കെ ആയിരുന്നുവെന്ന് വാക്കുകള് കൊണ്ടു പോലും പറഞ്ഞറിയിക്കാന് എനിക്കാവില്ല.
ബിഗ് ബോസ് പ്രിസണ് എക്സപിരിമെന്റ ആയിരുന്നു അതില് നിന്നും പുറത്തു വരാന് എനിക്ക് സമയമെടുക്കും. ബിഗ് ബോസില് നിന്നും പുറത്തേക്ക് വരുന്ന സമയത്ത് സാബു എന്ത് തോന്നുന്നു എന്ന് ലാലേട്ടന് ചോദിച്ചു എനിക്കൊരക്ഷരം വായില് വന്നില്ല പേളി എന്തൊക്കെയോ പറയുന്നത് കണ്ട് ഞാന് അന്തം വിട്ടു. കാരണം ആകെ അന്തം വിട്ടു മരവിച്ച ഒരവസ്ഥയിലായിരുന്നു ഞാന്. കുട്ടികളെ കൊണ്ടു പോകുന്ന പോലെ കൈ പിടിച്ചു കൊണ്ടു പോകുകയായിരുന്നു ലാലേട്ടന്.
ബിഗ് ബോസ് വിജയിക്കണം എന്ന് ഞാന് ആഗ്രഹിച്ചിട്ടില്ല. എന്റെ മക്കളെ സത്യമിട്ടു പറയുകയാണ്. വായിച്ചു നോക്കാതെയാണ് കരാര് ഒപ്പിട്ടത് എന്താണ് പ്രൈസ് മണി എന്നു പോലും ഞാന് നോക്കിയിട്ടില്ല. ബിഗ് ബോസ് വീട്ടില് വന്ന് കുറേ കഴിഞ്ഞ ശേഷം ആണ് അതിനകത്ത് നിന്ന് ആരോ പറയുന്നത് കേള്ക്കുന്നത് ജയിക്കുന്ന ആള്ക്ക് ഒരു കോടിയുടെ സമ്മാനം ഉണ്ടെന്നൊക്കെ. അങ്ങനെയുള്ള എനിക്ക് ഒന്നാം സമ്മാനം കിട്ടിയാല് ഉണ്ടാവുന്ന അവസ്ഥ ഊഹിക്കാമല്ലോ.
പുറത്തു വന്ന് ഇത്ര മണിക്കൂറായിട്ടും എനിക്ക് നോര്മല് ആവാന് പറ്റിയിട്ടില്ല. സിനിമയിലേക്ക് അവസരം ലഭിച്ചിട്ടുണ്ടെങ്കിലും അതൊന്നും എനിക്ക് തലയില് കയറിയിട്ടില്ല. എന്തൊക്കെ നടന്നുവെന്ന് അറിയാന് തന്നെ എനിക്ക് കുറച്ചു സമയം വേണം എന്നിട്ട് എല്ലാത്തിനെക്കുറിച്ചും സംസാരിക്കാം.