ഹാരിസ് റൗഫിനേയും അഫ്രീദിയേയും തൂക്കിയടിച്ച് സ്റ്റോയിനിസ്! പാകിസ്ഥാനെതിരെ ടി20 പരമ്പര ഓസീസ് തൂത്തുവാരി
മോശം തുടക്കമായിരുന്നു ഓസീസിന്. 30 റണ്‍സിനിടെ അവര്‍ക്ക് ഓപ്പണര്‍മാരായ മാത്യൂ ഷോര്‍ട്ട് (2), ജേക്ക് ഫ്രേസര്‍ മക്ഗുര്‍ക് (18) എന്നിവരുടെ വിക്കറ്റുകള്‍ നഷ്ടമായി.
 )
Followഹൊബാര്‍ട്ട്: പാകിസ്ഥാനെതിരെ ടി20 പരമ്പര തൂത്തുവാരി ഓസ്‌ട്രേലിയ. മൂന്നാം മത്സരത്തില്‍ ഏഴ് വിക്കറ്റിനായിരുന്നു ഓസീസിന്റെ ജയം. ടോസ് നേടി ബാറ്റിംഗ് തിരഞ്ഞെടുത്ത പാകിസ്ഥാന് 18.1 ഓവറില്‍ 117 റണ്‍സെടുക്കാന്‍ മാത്രമാണ് സാധിച്ചത്. 41 റണ്‍സ് നേടിയ ബാബര്‍ അസമാണ് ടോപ് സ്‌കോറര്‍. ആരോണ്‍ ഹാര്‍ഡി ഓസീസിന് വേണ്ടി മൂന്ന് വിക്കറ്റ് നേടി. മറുപടി ബാറ്റിംഗില്‍ ഓസീസ് 11.2 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ ലക്ഷ്യം മറികടന്നു. 27 പന്തില്‍ 61 റണ്‍സുമായി പുറത്താവാതെ നിന്ന മാര്‍കസ് സ്‌റ്റോയിനിസാണ് വിജയശില്‍പി.
മോശം തുടക്കമായിരുന്നു ഓസീസിന്. 30 റണ്‍സിനിടെ അവര്‍ക്ക് ഓപ്പണര്‍മാരായ മാത്യൂ ഷോര്‍ട്ട് (2), ജേക്ക് ഫ്രേസര്‍ മക്ഗുര്‍ക് (18) എന്നിവരുടെ വിക്കറ്റുകള്‍ നഷ്ടമായി. പിന്നീടായിരുന്നു സ്റ്റോയിനിസ് ഷോ. ജോഷ് ഇന്‍ഗ്ലിസ് (27) കട്ടയ്ക്ക് പിന്തുണ നല്‍കി. 55 റണ്‍സ് കൂട്ടിചേര്‍ത്ത ശേഷമാണ് ഇരുവരും പിരിഞ്ഞത്. ഇന്‍ഗ്ലിസിനെ, അബ്ബാസ് അഫ്രീദി പുറത്താക്കുകയായിരുന്നു. എങ്കിലും ടിം ഡേവിഡിനെ (7) കൂട്ടുപിടിച്ച് സ്റ്റോയിനിസ് ഓസീസിനെ വിജയത്തിലേക്ക് നയിച്ചു.
27 പന്തുകള്‍ മാത്രം നേരിട്ട സ്റ്റോയിനിസ് അഞ്ച് വീതം സിക്‌സും ഫോറും നേടി. ഹാരിസ് റൗഫ് എറിഞ്ഞ ഒമ്പതാം ഓവറില്‍ രണ്ട് വീതം സിക്‌സും ഫോറുമാണ് സ്റ്റോയിനിസ് നേടിയത്. 22 റണ്‍സാണ് ഓവറില്‍ പിറന്നത്. ഷഹീന്‍ അഫ്രീദിയെറിഞ്ഞ 11-ാ ഓവറില്‍ മൂന്ന് സിക്‌സുകള്‍ വന്നു. അതില്‍ മൂന്നും രണ്ടും സ്‌റ്റോയിനിസിന്റെ വക. കൂടെ ഒരു ഫോറും. മറ്റൊരു സിക്‌സ് ഡേവിഡും നേടിയതോടെ ഓവറില്‍ ഒന്നാകെ 25 റണ്‍സാണ് വന്നത്. ഇതോടെ കളിയും തീരുമാനമായി. 52 പന്തുകള്‍ ബാക്കി നില്‍ക്കെയാണ് ഓസീസ് ജയിക്കുന്നത്. പന്ത് അടിസ്ഥാനത്തില്‍ പാകിസ്ഥാനെതിരെ ഏതൊരും ടീമും നേടുന്ന ഏറ്റവും മികച്ച രണ്ടാമത്തെ ജയമാണിത്. 55 ബാക്കി നില്‍ക്കെ ജയിച്ച ഓസീസ് തന്നെയാണ് ഒന്നാമത്.
നേരത്തെ ബാബര്‍ ഒഴികെ ഹസീബുള്ള ഖാന്‍ (24), ഇര്‍ഫാന്‍ ഖാന്‍ (10), ഷഹീന്‍ അഫ്രീദി (16) എന്നിവര്‍ മാത്രമാണ് പാകിസ്ഥാന് നിരയില്‍ രണ്ടക്കം കണ്ടത്. സാഹിബ്‌സദ ഫര്‍ഹാന്‍ (9), ഉസ്മാന്‍ ഖാന്‍ (3), അഗ സല്‍മാന്‍ (1), അബ്ബാസ് അഫ്രീദി (1), ജഹന്ദാദ് ഖാന്‍ (5), സുഫിയാന്‍ മുഖീം (1) എന്നിവരാണ് പുറത്തായ മറ്റുതാരങ്ങള്‍. ഹാര്‍ഡിക്ക് പുറമെ സ്‌പെന്‍സര്‍ ജോണ്‍സണ്‍, ആഡം സാംപ എന്നിവര്‍ ഓസീസിന് വേണ്ടി രണ്ട് വിക്കറ്റ് വീതം വീഴ്ത്തി.
