ദില്ലി: വമ്പിച്ച ഓഫറുകളുമായി ഇന്ന് മുതല്‍ മൂന്ന് ദിവസം ഷവോമി. ജൂലൈ 20 മുതല്‍ 22 വരെയാണ് ഷവോമിയുടെ ഈ പ്രത്യേക ഓഫറുകള്‍ ലഭിക്കുക. ഒരു രൂപയ്ക്ക് ഷവോമി ഫോണ്‍, വിവിധ ഫോണുകള്‍ക്ക് വിലക്കുറവ് എന്നിവയെല്ലാം ഈ ദിനങ്ങളില്‍ ലഭിക്കും. ഇന്ത്യന്‍ വിപണിയില്‍ എത്തിയതിന്‍റെ രണ്ടാം വാര്‍ഷികാഘോഷത്തിന്‍റെ ഭാഗമാണ് ഓഫറുകള്‍.
ഒരു രൂപയ്ക്ക് ഷവോമി ഫോണ്‍ എന്നതാണ് പ്രധാന ഓഫര്‍. പുതിയ ഓഫര്‍ ഫേസ്ബുക്കില്‍ ഷെയര്‍ ചെയ്യുന്നതിലൂടെ ആര്‍ക്കും ഈ ഡീലില്‍ പങ്കെടുക്കാം. എല്ലാ ദിവസവും ഉച്ചയ്ക്ക് രണ്ടു മണിയ്ക്കാണ് മത്സരം നടക്കുന്നത്. ഫ്‌ളാഷ് സെയിലിലൂടെ ആദ്യത്തെ ദിവസം ഷവോമി എം ഐ 5, രണ്ടാം ദിവസം ഷവോമി റെഡ്മി നോട്ട് 3, അവസാന ദിവസം ഷവോമി എം ഐ മാക്‌സ് എന്നിവയാണ് നേടാന്‍ കഴിയുക.
ഫ്ലിപ്പ്കാര്‍ട്ട്, എംഐ സ്റ്റോറുകളില്‍ ഇതിന് പുറമേ ഫോണുകള്‍ക്ക് വന്‍ ഓഫറാണ് നല്‍കുന്നത്. ഷവോമി എംഐ 5ന് 2000 രൂപ കുറച്ച് 22,999 രൂപയായി. എംഐ4ന് 4000 രൂപ കുറച്ചിട്ടുണ്ട്. 1999 രൂപയുടെ ബ്ലൂടൂത്ത് സ്പീക്കര്‍ 500 രൂപയ്ക്ക് ലഭിക്കും. മറ്റ് ഷവോമി ഗാഡ്ജറ്റുകള്‍ക്കും വിലക്കുറവുണ്ട്.