തെലുങ്ക് സംസാരിക്കുന്നവരെക്കുറിച്ചുള്ള വിവാദ പരാമർശത്തിന് പിന്നാലെ നടി കസ്തൂരി ഒളിവില്‍ പോയി. പോലീസ് സമൻസ് അയച്ചതിന് പിന്നാലെയാണ് നടി ഒളിവില്‍ പോയത്.
ചെന്നൈ: തമിഴ് നടി കസ്തൂരിക്കായി പോലീസ് സംഘം തിരച്ചില്‍. തെലുങ്ക് സംസാരിക്കുന്ന ആളുകളെ കുറിച്ച് അപകീർത്തികരമായ പരാമർശങ്ങൾ നടത്തിയെന്ന പരാതിയെ തുടർന്നാണ് നടിക്ക് സമൻസ് അയച്ചത്. എന്നാല്‍ കസ്തൂരി പോയസ് ഗാർഡനിലെ തന്‍റെ വീട് പൂട്ടി ഒളിവില്‍ പോയെന്നാണ് വിവരം. നടിയുടെ ഫോൺ സ്വിച്ച് ഓഫാണ് എന്നും റിപ്പോര്‍ട്ടുണ്ട്.
ബ്രാഹ്മണ സമുദായത്തിനെതിരെ തുടർച്ചയായി നടത്തുന്ന അപകീർത്തികരമായ പ്രസ്താവനകളിൽ അപലപിച്ച് ചെന്നൈയിലെ എഗ്മോറിലെ രാജരത്നം സ്റ്റേഡിയത്തിൽ ഒക്ടോബര്‍ 3ന് ഒരു പ്രതിഷേധ സംഗമം നടത്തിയിരുന്നു. ബിജെപി നേതാവ് കരു നാഗരാജൻ, ഹിന്ദു മക്കൾ പാർട്ടി നേതാവ് അർജുൻ സമ്പത്ത്, നടി കസ്തൂരി, മധുവന്തി എന്നിവർ ഇതില്‍ പങ്കെടുത്തിരുന്നു. ഇവിടെ പ്രസംഗിക്കുന്ന വേളയിലാണ് കസ്തൂരി വിവാദ പ്രസ്താവന നടത്തിയത്.
undefined
അമരൻ എന്ന സിനിമയിൽ മേജർ മുകുന്ദ് ത്യാഗരാജൻ ബ്രാഹ്മണ സമുദായത്തിൽ പെട്ട ആളെന്ന് കാണിച്ചില്ലെന്ന് ഈ യോഗത്തില്‍ കസ്തൂരി നടത്തിയ പ്രസ്താവന ഏറെ വിവാദമായിരുന്നു. കൂടാതെ ദ്രാവിഡ പ്രത്യയശാസ്ത്രത്തെക്കുറിച്ചും ഡിഎംകെയെക്കുറിച്ചും കസ്തൂരി വിമർശനങ്ങൾ നടത്തി. ഒപ്പം ഇതേ പ്രസംഗത്തില്‍ തെലുങ്ക് സംസാരിക്കുന്നവരെക്കുറിച്ച് നടത്തിയ പരാമര്‍ശമാണ് കേസിലേക്ക് നയിച്ചത്. തുടര്‍ന്ന് കസ്തൂരി സോഷ്യല്‍ മീഡിയയില്‍ വിശദീകരണം നല്‍കിയെങ്കിലും വിവാദം കെട്ടടങ്ങിയില്ല.
തുടര്‍ന്ന് പ്രശ്‌നം പരിഹരിക്കാൻ കസ്തൂരി വീട്ടിൽ ഒരു പത്രസമ്മേളനം സംഘടിപ്പിച്ചിരുന്നു. അതില്‍ കസ്തൂരി വിവാദത്തെക്കുറിച്ച് പറഞ്ഞത് ഇതാണ് "ഞാൻ തെലുങ്ക് സംസാരിക്കുന്ന ആളുകളെ മോശമാക്കിയിട്ടില്ല. എന്‍റെ പ്രസ്താവനകൾ വളച്ചൊടിക്കപ്പെട്ടു. ഞാനും എന്‍റെ മക്കളും തമിഴിനെയും തെലുങ്കിനെയും രണ്ട് കണ്ണുകളായി കാണുന്നു. അമ്മായിയമ്മയുടെ കുടുംബം തെലുങ്ക് സംസാരിക്കുന്നവരാണ്, അവർ എന്നെ അവരിൽ ഒരാളായി അംഗീകരിച്ചിട്ടുണ്ട്.
അതിനാൽ എന്നെക്കുറിച്ച് തെറ്റായ വിവരങ്ങൾ പ്രചരിപ്പിക്കരുത്. എന്നാല്‍ വാര്‍ത്ത സമ്മേളനത്തില്‍ മാധ്യമപ്രവർത്തകർ അവളുടെ പ്രസംഗത്തിന്‍റെ വീഡിയോ പ്ലേ ചെയ്യുകയും അവൾ അപമാനകരമായ രീതിയിൽ സംസാരിച്ചുവെന്ന് പറയുകയും ചെയ്തു. കസ്തൂരി വീഡിയോ കാണാൻ വിസമ്മതിക്കുകയും വാദിക്കുകയും ചെയ്തു, ഞാൻ എന്താണ് പറഞ്ഞതെന്ന് എനിക്കറിയാം, ഞാൻ തെറ്റായി സംസാരിച്ചിട്ടില്ലെന്ന് ഉറച്ചുനില്‍ക്കുകയും ചെയ്തു.
ഇതിന് പിന്നാലെ തന്‍റെ പരാമർശത്തിൽ ഖേദം പ്രകടിപ്പിച്ച് നടി കസ്തൂരി പ്രസ്താവന ഇറക്കി. എന്നാല്‍ അഖിലേന്ത്യ തെലുങ്ക് ഫെഡറേഷൻ ജനറൽ സെക്രട്ടറി നന്ദഗോപാൽ എഗ്മോർ പോലീസ് സ്റ്റേഷനിൽ പരാതി നൽകി. തെലുങ്ക് സംസാരിക്കുന്ന ആളുകളെ അപകീർത്തികരമായ പരാമർശം നടത്തിയെന്നാരോപിച്ച് നടി കസ്തൂരിക്കെതിരെ നടപടിയെടുക്കണമെന്നായിരുന്നു പരാതി.
ഇതേ തുടർന്ന് ഈ മാസം അഞ്ചിന് നടി കസ്തൂരിക്കെതിരെ നാല് വകുപ്പുകൾ പ്രകാരം എഗ്മോർ പൊലീസ് കേസെടുത്തു. ഈ കേസുമായി ബന്ധപ്പെട്ട് അവളെ ചോദ്യം ചെയ്യാൻ സമൻസുമായി പൊലീസ് കസ്തൂരിയുടെ വസതിയിലെത്തി. എന്നാല്‍ കസ്തൂരിയുടെ വീട് പൂട്ടിയ നിലയിൽ കണ്ടെത്തി. ഇവരുടെ മൊബൈലിൽ ബന്ധപ്പെടാൻ ശ്രമിച്ചപ്പോൾ സ്വിച്ച് ഓഫ് ആയിരുന്നു. കസ്തൂരി ഒളിവിലാണ് എന്നാണ് പൊലീസ് പറയുന്നത്. ഇവര്‍ക്കായി തിരച്ചില്‍ ആരംഭിച്ചതായി പൊലീസ് പറഞ്ഞു.