ഒടിടി പ്ലാറ്റ്‌ഫോമിൽ ഏറ്റവും കൂടുതൽ പ്രതിഫലം വാങ്ങുന്ന നടിയായി സാമന്ത മാറി. സിറ്റാഡൽ: ഹണ്ണി ബണ്ണി എന്ന ആമസോൺ പ്രൈം സീരീസിലെ വേഷത്തിന് സാമന്തയ്ക്ക് ലഭിച്ച പ്രതിഫലം
മുംബൈ: ഒടിടി പ്ലാറ്റ്‌ഫോമുകൾ ഇന്ത്യയിൽ അതിവേഗം വളരുകയാണ്. ഡിജിറ്റൽ സ്‌പേസിനായി കണ്ടന്‍റുകള്‍ സൃഷ്ടിക്കാന്‍ മുന്‍നിര നിര്‍മ്മാതാക്കളും സംവിധായകരും രംഗത്ത് എത്തിയിണ്ട്. ഈ വലിയ മാറ്റം സംഭവിക്കുമ്പോൾ ബിഗ് സ്ക്രീനിലെ താരങ്ങള്‍ ഇത്തരം ഒടിടി പ്രൊഡക്ഷനുകളുടെ ഭാഗമാകാനും സമയം കണ്ടെത്തുന്നുണ്ട്.
ഇത്തരത്തില്‍ ഒരു നടി ബോളിവുഡിലെ ചില വലിയ താരങ്ങളെ മറികടക്കുന്ന പ്രതിഫലമാണ് സമീപകാല പ്രൊജക്ടില്‍ നേടിയത്. ഇന്ത്യയിലെ ഒടിടിയില്‍ ഏറ്റവും കൂടുതൽ പ്രതിഫലം വാങ്ങുന്ന നടിയായി മാറിയിരിക്കുകയാണ് സാമന്ത.
വ്യക്തിപരവും ആരോഗ്യപരവുമായ കാരണങ്ങളാല്‍ വലിയ ഹിറ്റുകള്‍ ഒന്നും തന്നെ രണ്ട് വര്‍ഷത്തോളമായി സാമന്തയ്ക്ക് ഇല്ല. എന്നാല്‍ രാജ് ഡികെയുടെ സ്‌പൈ-ത്രില്ലർ സീരിസ് സിറ്റാഡൽ: ഹണ്ണി ബണ്ണിയിലൂടെ വന്‍ തിരിച്ചുവരവാണ് സാമന്ത നടത്തിയത്. കഴിഞ്ഞ നവംബര്‍ 7നാണ് സീരിസ് ആമസോണ്‍ പ്രൈം വീ‍ഡിയോയില്‍ റിലീസായത്.
പരമ്പരയിലെ സാമന്തയുടെ ആക്ഷന്‍ ഹീറോയിന്‍ റോളിന് ലഭിച്ച പ്രതിഫലം 10 കോടി രൂപയാണ് എന്നാണ് വിവരം. ഇതോടെ ഇന്ത്യയിൽ ഒരു ഒടിടി സീരിസില്‍ ഏറ്റവും കൂടുതൽ പ്രതിഫലം വാങ്ങുന്ന നടിയാക്കി സാമന്ത മാറി. വരുൺ ധവാൻ , കെ കെ മേനോൻ, കാഷ്വി മജ്മുണ്ടർ, സിമ്രാൻ, സാഖിബ് സലീം എന്നിവരും സിറ്റാഡൽ: ഹണ്ണി ബണ്ണി വെബ് സീരീസിൽ പ്രധാന വേഷങ്ങളിൽ എത്തുന്നുണ്ട്.
സാമന്തയുടെ സീരിസിലെ വേഷം വന്‍ പ്രേക്ഷക പ്രീതി നേടുന്നുണ്ട് 'സാമന്ത റൂത്ത്ലെസ് പ്രഭു' എന്നാണ് ചില വിശേഷണങ്ങള്‍ ഈ റോളിന് ലഭിക്കുന്നത്. അത്രയും ഗംഭീര ആക്ഷന്‍ സാമന്ത സീരിസില്‍ ചെയ്തുവെന്നാണ് റിവ്യൂകള്‍ പറയുന്നത്.
ഒടിടി മേഖലയിലേക്ക് എത്തും മുന്‍പ് തമിഴ്, തെലുങ്ക് സിനിമകളിൽ ഏറ്റവും കൂടുതൽ പ്രതിഫലം വാങ്ങുന്ന നടിമാരിൽ ഒരാളായിരുന്നു സാമന്ത. കരിയറിന്‍റെ ഏറ്റവും പീക്ക് സ്ഥിതിയില്‍ ഒരു ചിത്രത്തിന് 1.5-2 കോടി രൂപ വരെ സാമന്ത വാങ്ങിയിരുന്നു.
പേശികളെ ബാധിക്കുന്ന സ്വയം രോഗമായ മയോസിറ്റിസ് രോഗനിർണയം നടത്തിയ സാമന്ത കുറച്ചുകാലം സിനിമ രംഗത്ത് നിന്നും മാറി നിന്നിരുന്നു. അതിനിടയില്‍ ഇറങ്ങിയ ശാകുന്തളം, ഖുഷി എന്നിവ വലിയ വിജയങ്ങളും നേടിയിരുന്നില്ല. നേരത്തെ രാജ് ഡികെയുടെ തന്നെ ഫാമിലിമാന്‍ സീരിസ് രണ്ടാം സീസണില്‍ സാമന്ത അഭിനയിച്ചിരുന്നു.
ഷാരൂഖിന് വധഭീഷണി: പ്രതി റായിപ്പൂരില്‍ പിടിയില്‍; 'ഹിന്ദുസ്ഥാനിയെ' കണ്ട് മുംബൈ പൊലീസ് ഞെട്ടി !