ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര് ആണ് ചിത്രത്തിന്റെ നിര്മ്മാണം
തുടര്ച്ചയായി മൂന്നാം വര്ഷവും ജീത്തു ജോസഫ്- മോഹന്ലാല് കൂട്ടുകെട്ടില് ഒരു ചിത്രം വരികയാണ്. വലിയ ഇടവേളയ്ക്ക് ശേഷം മോഹന്ലാല് അഭിഭാഷകന്റെ കുപ്പായമണിയുന്ന നേര് ആണ് ആ ചിത്രം. ക്രിസ്മസ് റിലീസ് ആയി ഡിസംബര് 21 നാണ് ചിത്രം എത്തുന്നത്. സിനിമാപ്രേമികള് ആകാംക്ഷയോടെ കാത്തിരിക്കുന്ന ചിത്രത്തെക്കുറിച്ച് കാര്യമായി ഒരു വിവരവും അണിയറക്കാര് പങ്കുവച്ചിട്ടില്ല. ചിത്രം ഒരു കോര്ട്ട് റൂം ഡ്രാമയാണ് എന്നത് മാത്രമാണ് ചിത്രത്തെക്കുറിച്ച് പ്രേക്ഷകര് അറിഞ്ഞ ഒരു പ്രധാന വിവരം. ഇപ്പോഴിതാ റിലീസിന് 12 ദിനങ്ങള് ശേഷിക്കെ ചിത്രത്തിന്റെ ട്രെയ്ലര് റിലീസ് സംബന്ധിച്ച അപ്ഡേറ്റ് പുറത്തുവിട്ടിരിക്കുകയാണ് നിര്മ്മാതാക്കള്.
നേര് ട്രെയ്ലര് നാളെ (9) വൈകിട്ട് 5 ന് പുറത്തെത്തും. ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര് ആണ് ചിത്രത്തിന്റെ നിര്മ്മാണം. എലോണിന് ശേഷം ആശിര്വാദ് നിര്മ്മിക്കുന്ന ചിത്രമാണിത്. ദൃശ്യം 2 ല് അഭിഭാഷകയുടെ കഥാപാത്രത്തെ അവതരിപ്പിച്ച ശാന്തി മായാദേവിയാണ് നേരിന്റെ തിരക്കഥ രചിച്ചിരിക്കുന്നത്. യഥാര്ഥ ജീവിതത്തിലും അഭിഭാഷകയായ ശാന്തി ജീത്തുവിന്റെ ആവശ്യപ്രകാരമാണ് ചിത്രത്തിന്റെ രചന നിര്വ്വഹിച്ചത്.
ദൃശ്യം 2 ന്റെ സെറ്റില് വച്ച് ശാന്തി പല കേസുകളെക്കുറിച്ചും പറയുമായിരുന്നു. ഞാനൊരു സാഹചര്യത്തക്കുറിച്ച് പറഞ്ഞു. അതില് നിന്ന് ഒരു ആശയമുണ്ടായി. ഈ സിനിമയിലെ പല കാര്യങ്ങള് നമ്മള് ചുറ്റുവട്ടത്ത് കണ്ടിട്ടുള്ളതാണ്. ഒരു യഥാര്ഥ സംഭവം എന്ന് പറയാന് പറ്റില്ല. മറിച്ച് പല ചെറിയ ചെറിയ സംഭവങ്ങളില് നിന്ന് പ്രചോദനം ഉള്ക്കൊണ്ട ചിത്രമെന്ന് പറയാം. ശാന്തിയോട് ഇത് എഴുതാന് ആവശ്യപ്പെട്ടതും ഞാനാണ്, ജീത്തു ജോസഫ് പറഞ്ഞിരുന്നു. ചിത്രത്തിന്റെ ഛായാഗ്രഹണം സതീഷ് കുറുപ്പ് ആണ്. എഡിറ്റിംഗ് വി എസ് വിനായക്, സംഗീതം വിഷ്ണു ശ്യാം, കലാസംവിധാനം ബോബന്, ചീഫ് അസോസിയേറ്റ് ഡയറക്ടര് സുധീഷ് രാമചന്ദ്രന്, ഡിസൈന് സേതു ശിവാനന്ദന്.
ഏഷ്യാനെറ്റ് ന്യൂസ് ലൈവ് യുട്യൂബില് കാണാം