ഹൃത്വിക് റോഷൻ നായകനാകുന്ന ഫൈറ്ററിന്റെ ട്രെയിലര് പുറത്ത്.
ഹൃത്വിക് റോഷൻ നായകനായി വരാനിരിക്കുന്ന ചിത്രമാണ് ഫൈറ്റര്. ഫൈറ്ററിന്റെ പ്രധാന പ്രത്യേകത ആകാശ ദൃശ്യങ്ങള് ആയിരിക്കും എന്നാണ് റിപ്പോര്ട്ട്. ഹൃത്വികിന്റെ ഫൈറ്റര് ഒരു വിസ്മയ ചിത്രമായിരിക്കും എന്നാണ് പ്രതീക്ഷിക്കപ്പെടുന്നത്. പ്രതീക്ഷകള് ശരിവയ്ക്കും വിധം ഫൈറ്ററിന്റെ ട്രെയിലറും പുറത്തുവിട്ടിരിക്കുകയാണ്.
യുദ്ധം ഇനി ആകാശത്തായിരിക്കുമെന്ന് വ്യക്തമാക്കിയാണ് ട്രെയിലര് പുറത്തുവിട്ടിരിക്കുന്നത്. സംവിധായകൻ സിദ്ധാര്ഥ് ആനന്ദിന്റെ പുതിയ ചിത്രത്തില് ദീപിക പദുക്കോണാണ് നായികയായി എത്തുന്നത്. ഛായാഗ്രാഹണം സത്ചിത് പൗലോസാണ്. അനില് കപൂറും ഒരു പ്രധാനപ്പെട്ട കഥാപാത്രത്തെ അവതരിപ്പിക്കുന്ന ഫൈറ്ററില് സഞ്ജീദ ഷെയ്ക്കും നിര്ണായക വേഷത്തില് ഉണ്ടെന്നാണ് റിപ്പോര്ട്ട്.
ഹൃത്വിക് റോഷൻ നായകനായി വേഷമിട്ടതില് ഒടുവില് പ്രദര്ശനത്തിന് എത്തിയത് വിക്രം വേദയാണ്. തമിഴ് പ്രേക്ഷകരെ അമ്പരപ്പിച്ചു ഒരു ചിത്രമായ വിക്രം വേദയുടെ അതേ പേരിലുള്ള ഹിന്ദി റീമേക്കിലായിരുന്നു ഹൃത്വിക് റോഷൻ നായകനായി എത്തിയത്. സംവിധാനം പുഷ്കര്- ഗായത്രി ദമ്പതിമാരാണ്. ഹൃത്വിക് റോഷൻ നായകനായ ബോളിവുഡ് ചിത്രം ഭുഷൻ കുമാര്, കൃഷൻ കുമാര്, എസ് ശശികാന്ത് എന്നിവരാണ് നിര്മിച്ചത്.
ഹൃത്വിക് റോഷനു പുറമേ ഹിന്ദി ചിത്രത്തില് സെയ്ഫ് അലിഖാൻ, രാധിക ആംപ്തെ, രോഹിത്ത് സറഫ്, യോഗിത ബിഹാനി, ഷരീബ് ഷാഷ്മി തുടങ്ങിയവരും കഥാപാത്രങ്ങളെ അവതരിപ്പിച്ചിരുന്നു. പി എസ് വിനോദാണ് ഛായാഗ്രാഹണം. സാം സി എസ് പശ്ചാത്തല സംഗീതം നിര്വഹിച്ച വിക്രം വേദയുടെ പാട്ടുകള് വിശാല് ദദ്ലാനി, ശേഖര് രവ്ജിയാനി എന്നിവര് ഒരുക്കിയപ്പോള് റിലീസിനു മുന്നേ ഹിറ്റായിരുന്നു. ഇന്ത്യക്ക് പുറമേ 104 രാജ്യങ്ങളിലായിട്ട് ചിത്രം റിലീസ് ചെയ്തപ്പോള് മോശമല്ലാത്ത പ്രതികരണം ലഭിച്ചിരുന്നുവെന്നാണ് ബോക്സ് ഓഫീസ് റിപ്പോര്ട്ട്.
Read More: തമിഴിലേക്കും തെലുങ്കിലേക്കും കന്നഡയിലേക്കും നേര്, ആരൊക്കെയാകും മോഹൻലാലിന്റെ പകരക്കാരൻ?
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക