മുലയൂട്ടുന്നതിനെ ചുറ്റിപ്പറ്റിയുള്ള അബദ്ധധാരണകള്‍; വായിച്ചിരിക്കേണ്ട കുറിപ്പ്...
'2016ല്‍ കോഴിക്കോട് ഈ.എം.എസ് ആശുപത്രിയില്‍ നവജാതശിശുവിന് മുലപ്പാല്‍ നിഷേധിച്ച സംഭവമുണ്ടായിരുന്നു. നഴ്‌സിന്റെ പരാതിയെ തുടര്‍ന്ന് ആ അച്ഛനെയും അമ്മയെയും പോലീസ് അറസ്റ്റ് ചെയ്തിരുന്നു. ഒരു മതപണ്ഡിതന്റെയോ മറ്റോ ഉപദേശം പ്രകാരമാണ് അവര്‍ അത്തരം ഒരു തീരുമാനം എടുത്തത്...'
 )
Followമുലയൂട്ടുന്നതിനെ പറ്റി നിരവധി അബദ്ധധാരണകള്‍ നമ്മുടെ സമൂഹം വച്ചുപുലര്‍ത്തുന്നുണ്ട്. പലപ്പോഴും വേണ്ടവിധത്തില്‍ നമുക്ക്, അവയെ തിരുത്താന്‍ കഴിയാറില്ലെന്നതും വാസ്തവമാണ്. എന്നാല്‍ ആധികാരികമായി, ഒരു ഡോക്ടര്‍ തന്നെ അത്തരം മിഥ്യാധാരണകളെ മറികടക്കാന്‍ വേണ്ട നിര്‍ദേശങ്ങള്‍ മുന്നോട്ടുവച്ചാലോ?
ആഗസ്റ്റ് ഒന്ന് മുതല്‍ ഏഴ് വരെയുളള ദിവസങ്ങള്‍ ലോക മുലയൂട്ടല്‍ വാരമായി ആഘോഷിക്കുകയാണ്. ഈ സമയത്ത് നിര്‍ബന്ധമായും നമ്മള്‍ വായിച്ചിരിക്കേണ്ട ഒരു കുറിപ്പാണ് പങ്കുവയ്ക്കുന്നത്. മുലയൂട്ടലിനെ ചുറ്റിപ്പറ്റി നില്‍ക്കുന്ന അന്ധവിശ്വാസങ്ങളെ കുറിച്ച് ഡോ. ഷിനു ശ്യാമളന്‍ എഴുതിയ കുറിപ്പാണിത്.
കുറിപ്പ് വായിക്കാം...
'മുലപ്പാലും അന്ധവിശ്വാസങ്ങളും'
(ലോകമുലയൂട്ടല്‍ വാരം ആഗസ്റ്റ് 1-ആഗസ്റ്റ് 7)
ജനിച്ച് ഒരു മാസമേ ആ കുഞ്ഞിന് അമ്മ മുലപ്പാല്‍ കൊടുത്തിട്ടുള്ളൂ. അതിന്റെ കാരണമാണ് എന്നെ അതിശയിപ്പിച്ചത്.
അവര്‍ ഒരു ഉദ്യോഗസ്ഥയായിരുന്നു. അതിനാല്‍ ജോലിയ്ക്ക് പോകുമ്പോള്‍ മുലപ്പാല്‍ താനേ ചുരന്ന് വസ്ത്രത്തിലായി ബുദ്ധിമുട്ടാകും എന്നതായിരുന്നു അവരുടെ കാരണം. ഞാന്‍ ഈ സ്ത്രീയെ കണ്ടിട്ടില്ല. പക്ഷെ എന്റെ സുഹൃത്തിന്റെ സുഹൃത്താണവര്‍. അങ്ങനെ മുലപ്പാല്‍ താനേ ചുരന്ന് പോകുമ്പോള്‍ ഉപയോഗിക്കുവാന്‍ സ്തനങ്ങളുടെ മുകളില്‍ വെയ്ക്കുന്ന പാഡ് ഇന്ന് ഓണ്‍ലൈനായും, മാര്‍ക്കറ്റിലും സുലഭമായി ലഭ്യമാണ്. കൂടാതെ മുലപ്പാല്‍ പിഴിഞ്ഞ് സൂക്ഷിക്കാവുന്നതാണ്.എന്നിരുന്നാലും ആ അമ്മയുടെ ഈ 'കാരണം' മുലയൂട്ടാതെയിരിക്കുവാന്‍ ഒരു കാരണമേയല്ല.
മുലപ്പാല്‍ പിഴിഞ്ഞ് സാധാരണ ഗതിയില്‍ 6 മണിക്കൂര്‍ വരെ സൂക്ഷിക്കാം(അന്തരീക്ഷ താപനില 25°c). ഫ്രിഡ്ജിലാണെങ്കില്‍ 5 ദിവസം വരെ സൂക്ഷിക്കാം (താപനില 4°c ), ഫ്രിഡ്ജിന്റെ ഫ്രീസറില്‍ 2 ആഴ്ച്ച വരെ സൂക്ഷിക്കാം(-15°c). പ്രത്യേകതരം ഫ്രീസറില്‍ 6 മാസം മുതല്‍ 12 മാസം വരെയും സൂക്ഷിക്കാം.
ഫ്രിഡ്ജില്‍ നിന്നും എടുത്ത ശേഷം മുലപ്പാല്‍ തിളപ്പിക്കുവാനോ ഓവനില്‍ വെക്കുവാനോ പാടില്ല. ആവശ്യമെങ്കില്‍ ചെറുചൂട് വെള്ളത്തിലോട്ടു ഒരു പാത്രത്തില്‍ ഇറക്കി വെച്ചു തണുപ്പ് മാറ്റാം.
2016ല്‍ കോഴിക്കോട് ഈ.എം.എസ് ആശുപത്രിയില്‍ നവജാതശിശുവിന് മുലപ്പാല്‍ നിഷേധിച്ച സംഭവമുണ്ടായിരുന്നു. നഴ്‌സിന്റെ പരാതിയെ തുടര്‍ന്ന് ആ അച്ഛനെയും അമ്മയെയും പോലീസ് അറസ്റ്റ് ചെയ്തിരുന്നു. ഒരു മതപണ്ഡിതന്റെയോ മറ്റോ ഉപദേശം പ്രകാരമാണ് അവര്‍ അത്തരം ഒരു തീരുമാനം എടുത്തത്.
പല അന്ധവിശ്വാസങ്ങളും ഇതിനെ ചുറ്റിപ്പറ്റിയുണ്ട്. ഈ കാലത്തും പ്രസവിച്ചാല്‍ തന്റെ സൗന്ദര്യം നശിക്കും, ശരീരമാകെ ഭാരം കൂടി തന്റെ ശരീരഭംഗി നഷ്ടപ്പെടും എന്ന് വിശ്വസിക്കുന്ന ചില സ്ത്രീകളുമുണ്ട്. ആ കാരണം കൊണ്ട് അബോര്‍ഷന്‍ ചെയ്ത ഭാര്യയേയും മനസ്സില്ലാമനസോടെ ആ അബോര്‍ഷനു സമ്മതിച്ച ഭര്‍ത്താവിനേയും എനിക്ക് അറിയാം. വളരെ വിരളമാണ് അത്തരം സ്ത്രീകളെങ്കിലും ഈ കേരളത്തിലും ഇത്തരം സ്ത്രീകളുണ്ട് എന്നത് നിരാശാജനകമാണ്.
ആദ്യത്തെ മുലപ്പാല്‍(colostrum) പിഴിഞ്ഞു കളയണം എന്ന് വിശ്വസിക്കുന്ന അമ്മമാരെയും ഈ കേരളത്തില്‍ കണ്ടിട്ടുണ്ട്. അതും തെറ്റാണ്. കൊളസ്ട്രം പിഴിഞ്ഞു കളയേണ്ട ആവശ്യം ഇല്ല. അതില്‍ ധാരാളമായി പ്രതിരോധശേഷി കൂടുവാനുള്ള ഇമ്മ്യൂണോഗ്ലോബുലിന്‍സ്(immunoglobulins) ,അതൊടപ്പം കുട്ടിയ്ക്ക് ആവശ്യമായ എല്ലാ പോഷകങ്ങളും അടങ്ങിയിട്ടുണ്ട്.
അതുപോലെ ജനിക്കുന്ന കുട്ടികള്‍ക്ക് തേന്‍, ചന്ദനം,വെള്ളം കൊടുക്കുന്നത് ധാരാളം കണ്ടിട്ടുണ്ട്. 6 മാസത്തേയ്ക്ക് കുട്ടിയ്ക്ക്, മുലപ്പാലല്ലാതെ മറ്റൊന്നും കൊടുക്കേണ്ട ആവശ്യം ഇല്ല. വെള്ളംപോലും കുട്ടിയ്ക്ക് 6 മാസം വരെ കൊടുക്കേണ്ട. മുലപ്പാലില്‍ കുട്ടിയ്ക്ക് ആവശ്യമായ വെള്ളം അടങ്ങിയിട്ടുണ്ട്.
മുലയൂട്ടുമ്പോള്‍ അമ്മയുടെയും കുട്ടിയുടെയും ശരീരത്തില്‍ ഓക്സിടോസിന്(oxytocin) എന്ന ഹോര്‍മോണ് ഉല്‍പ്പാദിപ്പിക്കുന്നു. ഓക്സിടോസിന് ഒരു 'happy hormone ' ആണ്. കൂടാതെ മുലയൂട്ടുമ്പോള്‍ endorphins ഉല്‍പ്പാദിപ്പിക്കുന്നു. ഇവ രണ്ടും അമ്മയെ റിലാക്‌സ് ചെയ്യുവാന്‍ സഹായിക്കുന്നു. മാനസിക പിരിമുറുക്കങ്ങളും നിരാശയും വരാതെ ഇവ സഹായിക്കുന്നു. PPD(പോസ്റ്റ് പാര്‍ട്ടം ഡിപ്രഷന്‍) വരാതെ ഒരു പരിധി വരെ സഹായിക്കുന്നു. PPD മുലയൂട്ടുന്ന അമ്മമാരില്‍ നിരാശയുണ്ടാക്കുന്ന ഒരു തരം അസുഖമാണ്.
മുലയൂട്ടുമ്പോള്‍ അമ്മയ്ക്ക് അസുഖം വന്നാല്‍ മരുന്നുകള്‍ ഒന്നും കഴിക്കാതെ രോഗം മൂര്‍ച്ഛിച്ചു ആശുപത്രിയില്‍ വരുന്നവരെ കാണാറുണ്ട്. അതും തെറ്റാണ്. മുലയൂട്ടുന്ന അമ്മമാര്‍ക്ക് കഴിക്കാവുന്ന ചില മരുന്നുകള്‍ ഉണ്ട്. അതു കൊണ്ട് രോഗം വന്നാല്‍, അസുഖം മൂര്‍ച്ഛിക്കാതെ ഡോക്ടറെ കണ്ടു മരുന്ന് വാങ്ങി കഴിക്കുക. സ്വയം ചികില്‍സിച്ചു എന്തെങ്കിലും ഗുളികകള്‍ ആ സമയത്തു അമ്മയ്ക്ക് കൊടുക്കരുത്. കാരണം ചില ഗുളികകള്‍ മുലയൂട്ടുന്ന അമ്മമാര്‍ കഴിക്കുവാന്‍ പാടില്ല. ഡോക്ടറുടെ നിര്‍ദ്ദേശം അനുസരിച്ചുള്ള ഗുളികകള്‍ മാത്രം കഴിക്കുക. മുലപ്പാലിലൂടെ കുട്ടിയിലേയ്ക്ക് ആ മരുന്നിന്റെ അംശം ചെല്ലുന്നതിനാലാണ് അത്തരമൊരു നിദ്ദേശം.
ചിലര്‍ കുട്ടികളുടെ സ്തനം ഞെക്കി പിഴിയും.പാവം കുഞ്ഞുങ്ങള്‍. അവരുടെ സ്തനങ്ങളില്‍ കെട്ടി നില്‍ക്കുന്ന മുലപ്പാല്‍ കളയാനാണത്രേ ഇത്തരം ഒരു ആചാരം. വെറുതെ ഞെക്കി കുട്ടിയെ കരയിപ്പിക്കാം. ഇതും ഇപ്പോഴും കണ്ടുവരുന്ന ഒരു അന്ധവിശ്വാസമാണ്.
ഇതില്‍ പലതും കേരളത്തിലും ഞാന്‍ കണ്ടിട്ടുണ്ട്. അതിനാല്‍ ഇരുട്ട് മൂടിയ നമ്മുടെ വിശ്വാസങ്ങളില്‍ നിന്നും പുറത്ത് വന്ന് ശരിയായ രീതിയില്‍ മുലയൂട്ടി, അന്ധവിശ്വാസങ്ങള്‍ മറന്ന്, 6 മാസം വരെ കുട്ടിയ്ക്ക് മുലപ്പാല്‍ മാത്രം കൊടുക്കുക.
മാസം തികയാതെ ഉണ്ടാകുന്ന കുട്ടികള്‍ക്കു ചില സന്ദര്‍ഭങ്ങളില്‍ മറ്റു വിറ്റാമിനുകള്‍, ഫോര്‍മുല ഇവ ഡോക്ടര്‍ പറഞ്ഞാല്‍ മാത്രം കൊടുക്കുക. ഉദാഹരണത്തിന് അവര്‍ക്ക് മതിയായ ശരീരഭാരം കൂടുന്നില്ലെന്നുണ്ടെങ്കില്‍ ഒരു പക്ഷെ ഡോക്ടര്‍ ഫോര്‍മുല പോലെയുള്ള പാല്‍ പൊടി. കൊടുക്കാന്‍ നിര്‍ദേശിക്കാം.
കുട്ടിയുടെ അവകാശമാണ് മുലപ്പാല്‍. അത് നിഷേധിച്ചാല്‍ നിയമപരമായും ശിക്ഷാര്‍ഹമാണ്. കുഞ്ഞിന് മുലപ്പാലിലൂടെ ലഭിക്കേണ്ട പ്രതിരോധശേഷിയ്ക്ക് വളരെയധികം പ്രാധാന്യമുണ്ട്. കുട്ടിയ്ക്ക് അതുമൂലം അസുഖങ്ങള്‍ വരാതെയിരിക്കുവാന്‍ മുലപ്പാല്‍ സഹായിക്കുന്നു.
കൂടാതെ അമ്മയും കുഞ്ഞും തമ്മിലുള്ള മാനസികമായ അടുപ്പത്തിനും മുലയൂട്ടല്‍ അവര്‍ തമ്മില്‍ 'ബോണ്ട്' ഉണ്ടാകുവാന്‍ സഹായിക്കുന്നു.
കൂടാതെ മുലയൂട്ടുന്നത് മൂലം സ്ത്രീകളില്‍ ബ്രേസ്‌റ് ക്യാന്‍സര്‍, അണ്ഡാശയ ക്യാന്‍സര്‍ ഇവ വരാതെയിരിക്കുവാന്‍ സഹായിക്കുന്നുവെന്നും പറയുന്നു. എത്രയുമധികനാള്‍ മുലയൂട്ടുന്നുവോ അത്രയുമേറെ അമ്മയ്ക്ക് ഈ രോഗങ്ങള്‍ വരാനുള്ള സാധ്യത കുറയുന്നു. മുലയൂട്ടുന്നതിന്നാല്‍ അമ്മയുടെ ശരീരഭാരം കൂടാതെയിരിക്കുവാനും,ഒരു പരിധിവരെ കുറയുവാനും സഹായിക്കുന്നു.
മുലയൂട്ടിയ കുട്ടികള്‍ക്ക് മറ്റു കുട്ടികളെക്കാള്‍ IQ കൂടുതലാണെന്ന് പഠനങ്ങള്‍ പറയുന്നു.
മുലപ്പാല്‍ ഗര്‍ഭിണിയായിരിക്കുമ്പോള്‍ 24 ആഴ്ച്ച മുതല്‍ തന്നെ സ്തനങ്ങളില്‍ ഉല്‍പ്പാദിപ്പിക്കുന്നു. സ്തനങ്ങളുടെ വലിപ്പം കൂടും തോറും മുലപ്പാല്‍ കൂടും എന്നതും ശെരിയല്ല.
ഇനിയും ഒരു കുഞ്ഞുപ്പോലും മുലപ്പാല്‍ കിട്ടാതെ കരയാതിരിക്കട്ടെ. ഓര്‍ക്കുക : കുട്ടിയുടെ അവകാശമാണ് മുലപ്പാല്‍.
