'ലൈബ്രറിയിലാണ് ജീവിക്കുന്നത്'; യുവാവ് പുസ്തകശേഖരം ട്വീറ്റ് ചെയ്തു; വിവാഹം കഴിക്കട്ടെയെന്ന് യുവതി
അറിയാത്തവർക്കായി, ഞാനൊരു ലൈബ്രറിയിലാണ് ജീവിക്കുന്നത് എന്നായിരുന്നു ഷൗമിക് തന്റെ ഫോട്ടോയ്ക്ക് അടിക്കുറിപ്പ് നൽകിയത്.
 )
Followദില്ലി: ഹോബി എന്താണെന്ന് ചോദിച്ചാൽ വായന എന്നായിരിക്കും മിക്ക ആളുകളുടെയും മറുപടി. പുസ്തകങ്ങൾ വാങ്ങി വായിച്ച് സൂക്ഷിച്ചു വെക്കുന്നതിൽ ആനന്ദം കണ്ടെത്തുന്നവരാണ് വായനപ്രേമികൾ. അത്തരത്തിൽ വായനപ്രേമിയായ ഒരു യുവാവ് തന്റെ വിപുലമായ പുസ്തക ശേഖരത്തിന്റെ ഫോട്ടോ ട്വിറ്ററിൽ പോസ്റ്റ് ചെയ്തു. നിരവധി പേർ ഇദ്ദേഹത്തിന്റെ പുസ്തകങ്ങൾ കണ്ട് അത്ഭുതം പ്രകടിപ്പിക്കുകയും അഭിനന്ദിക്കുകയും ചെയ്തു. എന്നാൽ ആരും പ്രതീക്ഷിക്കാത്ത ഒന്നു കൂടി സംഭവിച്ചു. പുസ്തകങ്ങൾ കണ്ട ചിലർ ചോദിച്ചത് വിവാഹം കഴിക്കാമോ എന്നായിരുന്നു.
അങ്ങനെ പുസ്തക ശേഖരം ട്വീറ്റ് ചെയ്ത യുവാവിനിപ്പോൾ കല്യാണാലോചനകളുടെ പ്രളയമാണ്. ഷൗമിക് എന്നയാളാണ് തന്റെ പുസ്തക ശേഖരം ട്വീറ്റ് ചെയ്തത്. 'അറിയാത്തവർക്കായി, ഞാനൊരു ലൈബ്രറിയിലാണ് ജീവിക്കുന്നത്' എന്നായിരുന്നു ഷൗമിക് തന്റെ ഫോട്ടോയ്ക്ക് അടിക്കുറിപ്പ് നൽകിയത്. ചിലർ ചോദിച്ചത് താങ്കളുടെ റൂം മേറ്റ് ആക്കുമോ എന്നാണ്. ഇതാണ് ഭൂമിയിലെ സ്വർഗം എന്നായിരുന്നു ചിലരുടെ പ്രതികരണം. ഞാൻ നിങ്ങളെ വിവാഹം കഴിക്കട്ടെ എന്ന് ഒരു യുവതി ചോദിച്ചപ്പോഴാണ് ഷൗമിക് അമ്പരന്നത്. പിന്നീട് സമാനമായ ചോദ്യം പല യുവതികളും ചോദിച്ചു.
ചിലർ ഈ ഫോട്ടോയിൽ നിന്ന് തങ്ങൾക്ക് പ്രിയപ്പെട്ട പുസ്തകം തെരഞ്ഞെടുത്തു. 8000ത്തിലേറെ ആളുകളാണ് ട്വീറ്റ് ലൈക്ക് ചെയ്തിരിക്കുന്നത്. എണ്ണായിരത്തിലധികം പുസ്തകങ്ങൾ തനിക്കുണ്ടെന്നും ആകെ പുസ്തകങ്ങളുടെ 75 ശതമാനം മാത്രമേയുള്ളൂവെന്നും ഷൗമിക് ട്വീറ്റിൽ കൂട്ടിച്ചേർത്തിട്ടുണ്ട്.
