ആദ്യ വാരം എത്ര നേടി? 'വോയ്സ് ഓഫ് സത്യനാഥന്‍' ഇതുവരെ നേടിയ കളക്ഷന്‍
യുഎഇ, ജിസിസി, ഓസ്ട്രേലിയ എന്നിവിടങ്ങളിലും ചിത്രം ഈ വാരാന്ത്യത്തില്‍ റിലീസ് ചെയ്‍തിട്ടുണ്ട്
 )
Followമലയാള സിനിമയിലെ ഹിറ്റ് കൂട്ടുകെട്ട് ആയ റാഫി- ദിലീപ് ടീം നീണ്ട ഒന്‍പത് വര്‍ഷങ്ങള്‍ക്കിപ്പുറം ഒന്നിക്കുന്നു എന്നതായിരുന്നു വോയ്സ് ഓഫ് സത്യനാഥന്‍ എന്ന പ്രോജക്റ്റ് റിലീസിന് മുന്‍പ് നേടിയ പ്രേക്ഷകശ്രദ്ധയുടെ ഒരു പ്രധാന കാരണം. 2014 ല്‍ പുറത്തെത്തിയ റിംഗ് മാസ്റ്ററിന് ശേഷം ഇരുവരും ഒന്നിച്ച് ഒരു ചിത്രം ഇപ്പോഴാണ്. കോമഡി ത്രില്ലര്‍ വിഭാഗത്തില്‍ പെടുന്ന ചിത്രം തിയറ്ററുകളിലെത്തിയത് ജൂലൈ 28 ന് ആയിരുന്നു. ആദ്യ ദിനങ്ങളില്‍ പോസിറ്റീന് അഭിപ്രായവും മികച്ച ഓപണിംഗും നേടിയിരുന്ന ചിത്രത്തിന് രണ്ടാം വാരത്തിലും മികച്ച സ്ക്രീന്‍ കൌണ്ട് ഉണ്ട്. ഇപ്പോഴിതാ ചിത്രം ആദ്യ വാരം നേടിയ കളക്ഷന്‍ സംബന്ധിച്ച റിപ്പോര്‍ട്ടുകള്‍ പുറത്ത് വരുന്നുണ്ട്.
റിലീസ് ദിനത്തില്‍ 1.8 കോടിയും രണ്ടാം ദിവസമായ ശനിയാഴ്ച 2.05 കോടിയും നേടിയ ചിത്രത്തിന്‍റെ ഒരാഴ്ചത്തെ നേട്ടം 9 കോടിക്ക് മുകളിലാണെന്നാണ് പ്രമുഖ ബോക്സ് ഓഫീസ് ട്രാക്കര്‍മാര്‍ റിപ്പോര്‍ട്ട് ചെയ്യുന്നത്. ഇന്നലെ വരെയുള്ള (എട്ട് ദിവസം) കണക്ക് അനുസരിച്ച് ചിത്രം നേടിയിരിക്കുന്നത് 9.5 കോടിയാണെന്ന് ചിത്രവുമായി അടുത്ത വൃത്തങ്ങള്‍ അറിയിക്കുന്നു. മലയാള സിനിമയുടെ നിലവിലെ സ്ഥിതിയില്‍ മികച്ച കളക്ഷനാണ് ഇത്. ഈ വര്‍ഷത്തെ മലയാളം റിലീസുകളില്‍ മികച്ച മൂന്നാമത്തെ ആദ്യവാര കളക്ഷനാണ് ഇതെന്നാണ് റിപ്പോര്‍ട്ട്. രണ്ടാം വാരാന്ത്യത്തില്‍ ചിത്രം എത്തരത്തില്‍ കളക്റ്റ് ചെയ്യും എന്ന ആകാംക്ഷയിലാണ് ട്രേഡ് അനലിസ്റ്റുകള്‍. അതേസമയം യുഎഇ, ജിസിസി, ഓസ്ട്രേലിയ എന്നിവിടങ്ങളിലും ചിത്രം ഈ വാരാന്ത്യത്തില്‍ തിയറ്ററുകളില്‍ എത്തിയിട്ടുണ്ട്.
ജോജു ജോർജ്, അനുപം ഖേർ, മകരന്ദ് ദേശ്പാണ്ഡെ, അലൻസിയർ ലോപ്പസ്, ജഗപതി ബാബു, ജാഫർ സാദ്ദിഖ് (വിക്രം ഫൈയിം), സിദ്ദിഖ്, ജോണി ആന്റണി, രമേശ് പിഷാരടി, ജനാർദ്ദനൻ, ബോബൻ സാമുവൽ, ബെന്നി പി നായരമ്പലം, ഫൈസൽ, ഉണ്ണിരാജ, വീണ നന്ദകുമാർ, സ്മിനു സിജോ, അംബിക മോഹൻ, അതിഥി താരമായി അനുശ്രീ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ബാദുഷ സിനിമാസിന്റെയും ഗ്രാന്റ് പ്രൊഡക്ഷൻസിന്‍റെയും ബാനറിൽ എൻ എം ബാദുഷ, ഷിനോയ് മാത്യു, ദിലീപ്, രാജൻ ചിറയിൽ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.
ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക്ക് ചെയ്യുക
