ടോസ് നഷ്ടമായി ബാറ്റിംഗിനിറങ്ങിയ രാജസ്ഥാൻ റോയല്‍സിന് ഡല്‍ഹി ക്യാപിറ്റല്‍സിനെതിരെ മിന്നുന്ന തുടക്കമാണ് ലഭിച്ചത്. റോയല്‍സ് പവര്‍പ്ലേയില്‍ തകര്‍പ്പൻ അടിയുമായി കുതിച്ചു. പവര്‍ പ്ലേയിലെ ആറ് ഓവര്‍ അവസാനിച്ചപ്പോള്‍ വിക്കറ്റ് നഷ്ടം കൂടാതെ 68 റണ്‍സ് എന്ന നിലയിലായിരുന്നു രാജസ്ഥാൻ
ഗുവാഹത്തി: ഐപിഎല്ലില്‍ ഡല്‍ഹി ക്യാപിറ്റല്‍സിനെതിരെ മികച്ച സ്കോര്‍ പടുത്തുയര്‍ത്തി രാജസ്ഥാൻ റോയല്‍സ്. ആദ്യം ബാറ്റ് ചെയ്ത രാജസ്ഥാൻ നിശ്ചിത ഓവറില്‍ നാല് വിക്കറ്റ് നഷ്ടത്തില്‍ 199 റണ്‍സാണ് എടുത്തത്. റോയല്‍സിന് വേണ്ടി ജോസ് ബട്‍ലറും (79) യശ്വസി ജയ്സ്‍വാളും (60) അര്‍ധ സെഞ്ചുറി നേടി. അവസാന ഓവറുകളില്‍ തകര്‍ത്തടിച്ച ഷിമ്രോണ്‍ ഹെറ്റ്‍മെയറിന്‍റെ (39*) പ്രകടനവും നിര്‍ണായകമായി. ഡല്‍ഹി ക്യാപിറ്റല്‍സിന് വേണ്ടി മുകേഷ് കുമാര്‍ രണ്ട് വിക്കറ്റുകള്‍ വീഴ്ത്തി.
ടോസ് നഷ്ടമായി ബാറ്റിംഗിനിറങ്ങിയ രാജസ്ഥാൻ റോയല്‍സിന് ഡല്‍ഹി ക്യാപിറ്റല്‍സിനെതിരെ മിന്നുന്ന തുടക്കമാണ് ലഭിച്ചത്. റോയല്‍സ് പവര്‍പ്ലേയില്‍ തകര്‍പ്പൻ അടിയുമായി കുതിച്ചു. പവര്‍ പ്ലേയിലെ ആറ് ഓവര്‍ അവസാനിച്ചപ്പോള്‍ വിക്കറ്റ് നഷ്ടം കൂടാതെ 68 റണ്‍സ് എന്ന നിലയിലായിരുന്നു രാജസ്ഥാൻ. പരിക്ക് മൂലം കളിക്കാൻ സാധ്യതയില്ലെന്ന് വിലയിരുത്തപ്പെട്ടിരുന്ന ബട്‍ലര്‍ ടീമിലുണ്ടെന്ന് അറിഞ്ഞപ്പോള്‍ തന്നെ രാജസ്ഥാൻ ആരാധകര്‍ ആവേശത്തിലായിരുന്നു. അതിന് ചേര്‍ന്ന തുടക്കമാണ് ടീമിന് ലഭിച്ചതും. ഖലീല്‍ അഹമ്മദ്, ആന്‍‍റിച്ച് നോര്‍ജെ എന്നിവരെ തലങ്ങും വിലങ്ങും പായിച്ച് കൊണ്ടായിരുന്നു രാജസ്ഥാന്‍റെ തുടക്കം.
undefined
ജയ്സ്‍വാളായിരുന്നു കൂടുതല്‍ അപകടകാരി. നാലാമത്തെ ഓവറില്‍ തന്നെ ടീം സ്കോര്‍ 50ല്‍ എത്തി. എന്നാല്‍, എട്ടാം ഓവറില്‍ ജയ്സ്‍വാളിനെ മുകേഷ് കുമാര്‍ പുറത്താക്കി. 31 പന്തില്‍ 60 റണ്‍സാണ് താരം അടിച്ചുകൂട്ടിയത്. പിന്നാലെ എത്തിയ സഞ്ജവിനും (0) റിയാൻ പരാഗിനും (7) കാര്യമായി ഒന്നും ചെയ്യാനായില്ല. യശ്വസി ജയ്സ്‍വാള്‍ പുറത്തായതോടെ ക്രീസിലെത്തിയ സഞ്ജുവിന് മുകേഷ് കുമാറിന്‍റെ നേരിട്ട ആദ്യ മൂന്ന് പന്തുകളില്‍ റണ്‍സൊന്നും എടുക്കാൻ സാധിച്ചിരുന്നില്ല. തൊട്ടടുത്ത ഓവറില്‍ കുല്‍ദീപ് യാദവിനെ സിക്സ് അടിക്കാനുള്ള ശ്രമമാണ് പുറത്താകലില്‍ കലാശിച്ചത്.
ആന്‍‍റിച്ച് നോര്‍ജെയാണ് ലോംഗ് ഓണില്‍ ക്യാച്ച് എടുത്തത്. റോവ്‍മാൻ പവല്‍ പരാഗിന്‍റെ വിക്കറ്റ് തെറിപ്പിക്കുകയായിരുന്നു. എന്നാല്‍, ഒരറ്റത്ത് പിടിച്ച നിന്ന് ജോസ് ബട്‍ലറിലായിരുന്നു രാജസ്ഥാന്‍റെ പ്രതീക്ഷകള്‍. തുടരെ മൂന്ന് വിക്കറ്റുകള്‍ പോയതോടെ ഡല്‍ഹി അധികം റണ്‍സ് വിട്ടുകൊടുക്കാതെ മത്സരത്തിലേക്ക് തിരികെ വന്നു. അവസാന ഓവറുകളായതോടെ ബട്‍ലറും ഷിമ്രോണ്‍ ഹെറ്റ്‍മെയറും തകര്‍ത്തടിച്ചതോടെയാണ് രാജസ്ഥാൻ വീണ്ടും ട്രാക്കിലായത്. 18-ാം ഓവറില്‍ മുകേഷ് കുമാറിന്‍റെ കിടലിൻ ത്രോയില്‍ അപ്രതീക്ഷിതമായി ബട്‍ലര്‍ റണ്‍ ഔട്ടാവുകയായിരുന്നു.
പിന്നാലെയെത്തിയ ധ്രുവ് ജുറല്‍ ആദ്യ പന്തില്‍ തന്നെ സിക്സ് അടിച്ചാണ് തുടങ്ങിയത്. അവസാന ഓവറില്‍ ഹെറ്റ്‍മെയറിന്‍റെ സിക്സുകളും വന്നതോടെ രാജസ്ഥാൻ അനായാസം 200 കടക്കുമെന്ന് തോന്നിച്ചെങ്കിലും നോര്‍ജെ 199ല്‍ പിടിച്ച് നിര്‍ത്തി. കഴിഞ്ഞ മത്സരത്തില്‍ നിന്ന് രണ്ട് മാറ്റങ്ങള്‍ വരുത്തിയാണ് രാജസ്ഥാൻ കളത്തിലിറങ്ങിയത്. പഞ്ചാബിനെതിരെ മോശം പ്രകടനം പുറത്തെടുത്ത ദേവ്ദത്ത് പടിക്കല്‍, പേസര്‍ കെ എം ആസിഫ് എന്നിവര്‍ പുറത്തായി. പകരം ധ്രുവ് ജുറലും സന്ദീപ് ശര്‍മയും ടീമിലെത്തി. ഡല്‍ഹി ടീമിലും മാറ്റമുണ്ട്. പൃഥ്വി ഷായ്ക്ക് പകരം മനീഷ് പാണ്ഡെയെ ഉള്‍പ്പെടുത്തി. മിച്ചല്‍ മാര്‍ഷിന് പകരം ലളിത് യാദവും സര്‍ഫറാസ് ഖാന് പകരം അഭിഷേക് പോറലും ടീമിലുള്‍പ്പെട്ടു.
അതിര്‍ത്തി കടത്താനുള്ള ആവേശം ഒന്ന് പിഴച്ചു; ഡല്‍ഹിക്കെതിരെ തിളങ്ങാതെ സഞ്ജു, പൂജ്യത്തിന് പുറത്ത്