വിജയ് സേതുപതിയുടെ മഹാരാജ ചൈനീസ് ബോക്സ് ഓഫീസിൽ മികച്ച പ്രകടനം തുടരുന്നു. ഹോളിവുഡ് ചിത്രങ്ങളുമായി മത്സരിച്ച് ചൈനയിൽ മികച്ച പ്രതികരണം നേടുന്നു.
ചെന്നൈ: വിജയ് സേതുപതി നായകനായി എത്തിയ മഹാരാജ ചൈനീസ് ബോക്സ് ഓഫീസിൽ മുന്നേറ്റം തുടരുന്നു നാല് ദിവസത്തിനുള്ളിൽ, കോളിവുഡിൽ നിന്നുള്ള സസ്‌പെൻസ് ത്രില്ലർ ചൈന ബോക്സ് ഓഫീസിൽ 29.50 കോടി നേടി കഴിഞ്ഞു. ഇതോടെ ചിത്രത്തില്‍ ആഗോള ബോക്സോഫീസ് കളക്ഷന്‍ 138.63 കോടിയായി. നാലാം ദിവസമായ തിങ്കളാഴ്ച ചൈനയിൽ നിഥിലന്‍ സ്വാമിനാഥന്‍ സംവിധാനം നിര്‍വഹിച്ച ചിത്രം 3 കോടിയോളം നേടി. ഞായറാഴ്ചത്തെ 7.2 കോടിയിൽ നിന്ന് ഏകദേശം 58% വൻ ഇടിവുണ്ടായെങ്കിലും മോന 2 പോലുള്ള ഹോളിവുഡ് റിലീസുകളുമായി ചൈനീസ് വിപണിയില്‍ മത്സരിക്കുന്ന മഹാരാജയ്ക്ക് ഇത് വന്‍ നേട്ടമാണ്. ചൈനയിലെ മണ്‍ഡേ ടെസ്റ്റ് വിജയ് സേതുപതി പടം പാസായി എന്ന് തന്നെ പറയാം.
വിജയ് സേതുപതി നായകനായ തമിഴ് സസ്‌പെൻസ് ത്രില്ലർ ചൈനയിൽ 40,000 സ്‌ക്രീനുകളിൽ റിലീസ് ചെയ്തിട്ടുണ്ട്. ഹോളിവുഡ് ബിഗ് ബജറ്റ് ആനിമേഷന്‍ ചിത്രം മോന 2 വിൽ നിന്ന് നേരിട്ടുള്ള മത്സരം നേരിടുകയാണ് ചിത്രം. എന്നാല്‍ തിങ്കളാഴ്ച ഇത് മോന 2 വിനെ ചൈന ബോക്സ് ഓഫീസ് തകർത്തതായി റിപ്പോർട്ടുകൾ വരുന്നുണ്ട്. ആദ്യത്തെ കണക്കുകള്‍ പ്രകാരം മോന 2 തിങ്കളാഴ്ച 0.23 മില്ല്യണ്‍ നേടിയപ്പോൾ സേതുപതിയുടെ ചിത്രം 0.35 മില്ല്യണ്‍ നേടി.
ചൈനയിൽ ഏറ്റവും കൂടുതല്‍ കളക്ഷന്‍ നേടുന്ന തമിഴ് ചിത്രമായി ഇതിനകം മഹാരാജ മാറിയിട്ടുണ്ട്. രജനികാന്തിന്‍റെ 2.0യുടെ ലൈഫ് ടൈം കളക്ഷൻ 22 കോടിയാണ് മഹാരാജ മറികടന്നത്. നിലവിൽ നാല് ദിവസം കൊണ്ട് 29.50 കോടിയാണ് മഹാരാജ നേടിയത്.
2018-ൽ ചൈന ബോക്സ് ഓഫീസിൽ 80.56 കോടി നേടിയ ബാഹുബലി 2 - ചൈനയിൽ ഏറ്റവും കൂടുതൽ കളക്ഷൻ നേടിയ പത്താമത്തെ ഇന്ത്യൻ ചിത്രത്തെ മറികടക്കാൻ നിലവിൽ മഹാരാജയ്ക്ക് ബോക്സ് ഓഫീസിൽ കൃത്യം 51.5 കോടി ആവശ്യമാണ്. അതായത് ഈ ആഴ്ച ഈ തുക നേടിയാല്‍ ചൈനീസ് ബോക്സോഫീസിലെ ടോപ്പ് 10 ഇന്ത്യന്‍ ചിത്രങ്ങളില്‍ മഹാരാജ ഇടം പിടിക്കും.
undefined
മഹാരാജയിൽ അനുരാഗ് കശ്യപ്, മംമ്ത മോഹൻദാസ്, നടരാജൻ സുബ്രഹ്മണ്യം എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. സുധൻ സുന്ദരവും ജഗദീഷ് പളനിസാമിയും ചേർന്നാണ് ഇത് നിർമ്മിച്ചിരിക്കുന്നത്. ഈ വര്‍ഷം തമിഴില്‍ ബോക്സോഫീസ് വിജയവും നിരൂപ പ്രശംസയും ഒരു പോലെ നേടിയ ചിത്രമാണ് മഹാരാജ. ഇന്ത്യൻ ബോക്സ് ഓഫീസിൽ 71.30 കോടിയുടെ ആജീവനാന്ത കളക്ഷനാണ് ചിത്രം നേടിയത്. ആഗോളതലത്തിൽ ഇത് 109.13 കോടി ഗ്രോസ് നേടി. കൊരങ്ങ് ബൊമ്മെ എന്ന ചിത്രത്തിന് ശേഷം നിഥിലൻ സാമിനാഥൻ ഒരുക്കിയ ചിത്രമാണ് ഇത്.
'ചൈനീസ് മഹാരാജ' : 20 കോടി ബജറ്റിലെടുത്ത വിജയ് സേതുപതി ചിത്രം ചൈനയില്‍ കാണിക്കുന്നത് മഹാത്ഭുതം !