2025-ൽ ഈ രണ്ട് സെഗ്‌മെൻ്റുകളിലേക്ക് മൂന്ന് പുതിയ മോഡലുകൾ സ്കോഡ, കിയ, ഹ്യുണ്ടായ് തുടങ്ങിയ കമ്പനികളിൽ നിന്നും ലോഞ്ച് ചെയ്യും. വരാനിരിക്കുന്ന ഈ കോംപാക്ട് എസ്‌യുവികളുടെ പ്രധാന വിശദാംശങ്ങൾ നമുക്ക് പരിശോധിക്കാം.
ഇന്ത്യൻ വാഹന വിപണിയിൽ കോംപാക്ട് (സബ്-4 മീറ്റർ), മൈക്രോ എസ്‌യുവികൾക്ക് എക്കാലത്തെയും ഉയർന്ന ഡിമാൻഡാണ്. അതേസമയം മിനി എസ്‌യുവി വിഭാഗത്തിൽ ഹ്യുണ്ടായ് എക്‌സ്‌റ്റർ, ടാറ്റ പഞ്ച്, മാരുതി സുസുക്കി ഫ്രോങ്ക്സ് എന്നിവയുണ്ട്. 2025-ൽ ഈ രണ്ട് സെഗ്‌മെൻ്റുകളിലേക്ക് മൂന്ന് പുതിയ മോഡലുകൾ സ്കോഡ, കിയ, ഹ്യുണ്ടായ് തുടങ്ങിയ കമ്പനികളിൽ നിന്നും ലോഞ്ച് ചെയ്യും. വരാനിരിക്കുന്ന ഈ കോംപാക്ട് എസ്‌യുവികളുടെ പ്രധാന വിശദാംശങ്ങൾ നമുക്ക് പരിശോധിക്കാം.
സ്കോഡ-കൈലാക്ക്
സ്കോഡ-കൈലാക്ക് കോംപാക്റ്റ് എസ്‍യുവിയുടെ വേൾഡ് പ്രീമിയർ 2024 നവംബർ 6-ന് നടക്കും. അതിൻ്റെ വിപണി ലോഞ്ച് 2025-ൻ്റെ തുടക്കത്തിൽ നടക്കും. കുഷാക്കും സ്ലാവിയയ്ക്കും ശേഷം, MQB-A0-IN പ്ലാറ്റ്‌ഫോം ഉപയോഗിക്കുന്ന മൂന്നാമത്തെ സ്കോഡ മോഡലായിരിക്കും ഇത്. കുഷാക്കിനെ അപേക്ഷിച്ച് ലംബ സ്ലാറ്റുകൾ, സ്പ്ലിറ്റ് ഹെഡ്‌ലാമ്പുകൾ, ചെറിയ ഫ്രണ്ട് ആൻഡ് റിയർ ഓവർഹാംഗുകൾ എന്നിവയുള്ള പരിചിതമായ ഗ്രിൽ ഫീച്ചർ ചെയ്യുന്ന ഈ മോഡലിന് സ്കോഡയുടെ 'മോഡേൺ സോളിഡ്' ഡിസൈൻ ഭാഷ ലഭിക്കും. ഇൻ്റീരിയർ കുഷാക്കുമായി സമാനതകൾ പങ്കുവെച്ചേക്കാം. ഒരു ADAS സ്യൂട്ടും 360-ഡിഗ്രി ക്യാമറയും പോലുള്ള സവിശേഷതകളോടെ ഇത് സജ്ജീകരിച്ചേക്കാം. 115 bhp കരുത്തും 178 Nm ടോർക്കും ഉത്പാദിപ്പിക്കുന്ന 1.0L, 3-സിലിണ്ടർ ടർബോ പെട്രോൾ എഞ്ചിൻ കൈലാക്കിൽ അവതരിപ്പിക്കാൻ സാധ്യതയുണ്ട്. ഈ കാറിൽ മാനുവൽ, ഓട്ടോമാറ്റിക് ട്രാൻസ്മിഷനുകൾ ലഭ്യമാകും.
കിയ സിറോസ്
ഇന്ത്യയിലെ ദക്ഷിണ കൊറിയൻ വാഹന നിർമ്മാതാക്കളിൽ നിന്നുള്ള പുതിയ സബ്-4 മീറ്റർ ലൈഫ്‌സ്‌റ്റൈൽ എസ്‌യുവി ആയിരിക്കും കിയ സിറോസ്. ഇതിൻ്റെ ചില ഡിസൈൻ ഘടകങ്ങൾ K4 സെഡാനിൽ നിന്ന് പ്രചോദനം ഉൾക്കൊണ്ടിരിക്കാമെന്ന് സ്പൈ ചിത്രങ്ങൾ സൂചിപ്പിക്കുന്നു. കിയയുടെ പുതിയ ടു-സ്‌പോക്ക് ഫ്ലാറ്റ്-ബോട്ടം സ്റ്റിയറിംഗ് വീൽ, ഡ്യുവൽ ഡിസ്‌പ്ലേകൾ, ബോസ് ഓഡിയോ സിസ്റ്റം, ക്ലൈമറ്റ് കൺട്രോൾ സിസ്റ്റം, വെൻ്റിലേറ്റഡ്, പവർഡ് ഫ്രണ്ട് സീറ്റുകൾ, ലെതറെറ്റ് അപ്‌ഹോൾസ്റ്ററി തുടങ്ങിയവ ഇതിൽ ഫീച്ചർ ചെയ്യും. തുടക്കത്തിൽ, കിയ സിറോസ് പെട്രോൾ എഞ്ചിനിൽ മാത്രമേ വാഗ്ദാനം ചെയ്യൂ. 2025 മധ്യത്തോടെ കമ്പനി അതിൻ്റെ ഇലക്ട്രിക് പതിപ്പ് അവതരിപ്പിക്കുമെന്ന് പ്രതീക്ഷിക്കുന്നു.
ന്യൂ-ജെൻ ഹ്യുണ്ടായ് വെന്യു
പുതുതലമുറ ഹ്യുണ്ടായ് വെന്യു 2025-ൽ ലോഞ്ച് ആസൂത്രണം ചെയ്തിട്ടുണ്ട്. ഒരുപക്ഷേ വർഷത്തിൻ്റെ ആദ്യ പകുതിയിൽ ലോഞ്ച് ചെയ്യാൻ സാധ്യതയുണ്ട്. കഴിഞ്ഞ വർഷം ജനറൽ മോട്ടോഴ്‌സിൽ നിന്ന് ഏറ്റെടുത്ത ഹ്യുണ്ടായിയുടെ പുതിയ തലേഗാവ് ഫെസിലിറ്റിയിൽ നിർമ്മിക്കുന്ന ബ്രാൻഡിൻ്റെ ആദ്യത്തെ മോഡലാണിത്. പുതിയ വെന്യു ഉടൻ നിർമ്മാണത്തിലേക്ക് പ്രവേശിക്കുമെന്ന് പ്രതീക്ഷിക്കുന്നു. അടുത്തിടെ ഇന്ത്യയിൽ വിൽപ്പനയ്‌ക്ക് എത്തിയ അൽകാസറിൽ നിന്ന് പ്രചോദനം ഉൾക്കൊണ്ട ചില ഡിസൈൻ അപ്‌ഡേറ്റുകൾ ഇതിൽ ഉൾപ്പെടുത്താൻ സാധ്യതയുണ്ട്. നിലവിലെ എഞ്ചിൻ സജ്ജീകരണം നിലനിർത്തിക്കൊണ്ടുതന്നെ കമ്പനി വെന്യുവിൽ അധിക ഫീച്ചറുകൾ സജ്ജീകരിച്ചേക്കാം എന്നും റിപ്പോര്‍ട്ടുകൾ ഉണ്ട്.