സുസുക്കി മോട്ടോർസൈക്കിൾ ഇന്ത്യയ്ക്ക് വൻ വില്‍പ്പന വളര്‍ച്ച. 2022 ഓഗസ്റ്റിനെ അപേക്ഷിച്ച് കമ്പനി കഴിഞ്ഞ മാസം 30 ശതമാനം വിൽപ്പന വളർച്ച രേഖപ്പെടുത്തി.
ജാപ്പനീസ് ഇരുചക്ര വാഹന ബ്രാൻഡായ സുസുക്കി മോട്ടോർ കോർപ്പറേഷന്റെ ഇരുചക്രവാഹന ഉപസ്ഥാപനമായ സുസുക്കി മോട്ടോർസൈക്കിൾ ഇന്ത്യയ്ക്ക് വൻ വില്‍പ്പന വളര്‍ച്ച. 2022 ഓഗസ്റ്റിനെ അപേക്ഷിച്ച് കമ്പനി കഴിഞ്ഞ മാസം 30 ശതമാനം വിൽപ്പന വളർച്ച രേഖപ്പെടുത്തി. മൊത്തത്തിൽ 103,336 യൂണിറ്റ് വിൽപ്പന രേഖപ്പെടുത്തി. ആഭ്യന്തര വിപണിയിൽ വിറ്റ 83,045 യൂണിറ്റുകളും ആഗോളതലത്തിൽ കയറ്റുമതി ചെയ്ത 20,291 യൂണിറ്റുകളും ഇതിൽ ഉൾപ്പെടുന്നു. ഇത് കമ്പനിയുടെ എക്കാലത്തെയും ഉയർന്ന പ്രതിമാസ ആഭ്യന്തര വിൽപ്പന കണക്കായി മാറി.
ആക്സസ് 125ന്റെ ഉല്‍പ്പാദനം അമ്പത് ലക്ഷം തികിഞ്ഞു എന്ന നാഴികക്കല്ലും കമ്പനി അടുത്തിടെ സ്വന്തമാക്കിയിരുന്നു. അഞ്ച് ദശലക്ഷം യൂണിറ്റ് എന്ന സുപ്രധാന ഉൽപ്പാദന നാഴികക്കല്ല് രേഖപ്പെടുത്തിയതിന് ശേഷം, ആക്സസ് 125 - പേൾ ഷൈനിംഗ് ബീജ് / പേൾ മിറാഷ് വൈറ്റിൽ കമ്പനി പുതിയ കളർ ഓപ്ഷനുകളും അവതരിപ്പിച്ചു . 85,300 രൂപയും 90,000 രൂപയും വിലയുള്ള പ്രത്യേക പതിപ്പിലും റൈഡ് കണക്ട് എഡിഷൻ വേരിയന്റുകളിലും പുതിയ നിറം ലഭിക്കും . രണ്ട് വിലകളും ഡൽഹി എക്സ്ഷോറൂം ആണ്.
undefined
പരമാവധി 8.58 bhp കരുത്തും 10 Nm ന്റെ പീക്ക് ടോർക്കും ഉൽപ്പാദിപ്പിക്കുന്ന ഫ്യൂവൽ-ഇഞ്ചക്‌റ്റഡ് എഞ്ചിനിലാണ് ആക്സസ് 125 വരുന്നത്. മുൻവശത്ത് ടെലിസ്‌കോപിക് ഫോർക്കുകളും പിന്നിൽ ഒരൊറ്റ ഷോക്ക് അബ്‌സോർബറുമാണ് സസ്പെൻഷൻ ചുമതലകൾ നിർവഹിക്കുന്നത്. വേരിയന്റിനെ ആശ്രയിച്ച്, മുൻ ചക്രത്തിൽ ഒരു ഡിസ്ക് അല്ലെങ്കിൽ ഡ്രം ബ്രേക്കുമായി സ്കൂട്ടർ വരുന്നു. പിൻ ചക്രത്തിന് ഡ്രം ബ്രേക്ക് മാത്രമേ ലഭിക്കൂ. സിബിഎസ് സ്റ്റാൻഡേർഡായി സ്കൂട്ടർ വരുന്നു. ഹോണ്ട ആക്ടിവ 125 , ഹീറോ മാസ്‌ട്രോ 125, യമഹ ഫാസിനോ 125, ടിവിഎസ് ജൂപ്പിറ്റർ 125 എന്നിവയ്‌ക്കെതിരെയാണ് ഇത് മത്സരിക്കുന്നത്.
2023 ജൂലൈയിലും സുസുക്കി മോട്ടോർസൈക്കിൾ ഇന്ത്യ മികച്ച വില്‍പ്പന നേടിയിരുന്നു. 1,07,836 യൂണിറ്റുകളുടെ വിൽപ്പനയാണ് കമ്പനിക്ക് 2023 ജൂലായില്‍ ലഭിച്ചത്. ഒരു ലക്ഷത്തിലധികം പ്രതിമാസ വിൽപ്പന രേഖപ്പെടുത്തുന്നത് ഇതാദ്യമായിരുന്നു. ഈ കണക്കിൽ ആഭ്യന്തര വിപണിയിൽ വിറ്റ 80,309 യൂണിറ്റുകളും 2023 ജൂലൈയിൽ അന്താരാഷ്ട്ര വിപണികളിലേക്ക് കയറ്റുമതി ചെയ്ത 27,527 യൂണിറ്റുകളും ഉൾപ്പെടുന്നു. 2022 ജൂലൈയെ അപേക്ഷിച്ച് ഏകദേശം 41.5 ശതമാനം വാര്‍ഷിക വിൽപ്പന വളർച്ച കമ്പനിക്ക് ലഭിച്ചു.