ലോകമെമ്പാടുമുള്ള ശക്തമായ പ്രതിരോധ സംവിധാനങ്ങളുമായി ഇതിനെ താരതമ്യം ചെയ്‍താല്‍ നമ്മുടെ ഈ പ്രതിരോധ സംവിധാനം എല്ലാത്തിലും ഒരുപടി കടന്നു നില്‍ക്കും എന്നാണ് റിപ്പോര്‍ട്ടുകള്‍.
ഇന്ത്യയുടെ പ്രതിരോധ സംവിധാനത്തിന്‍റെ കരുത്ത് ഇനിയും കൂടാൻ പോകുന്നു. 2028-29 ഓടെ അതിർത്തിയിൽ പുതിയൊരു പ്രതിരോധ സംവിധാനം വിന്യസിക്കാൻ ഒരുങ്ങുകയാണ് രാജ്യം. 350 കിലോമീറ്റർ ദൂരത്ത് വച്ചുപോലും ശത്രുവിനെ തുരത്താൻ കഴിയുന്ന ഒരു തദ്ദേശീയ ലോംഗ് റേഞ്ച് സർഫേസ് ടു എയർ (എൽആർ-എസ്എഎം) സംവിധാനം ഒരുങ്ങുകയാണ്. ഇന്ത്യൻ പ്രതിരോധ ഗവേഷണ വികസന സംഘടനയായ 'ഡിഫൻസ് റിസർച്ച് ആൻഡ് ഡെവലപ്‌മെന്റ് ഓർഗനൈസേഷൻ' (ഡിആർഡിഒ) ആണ് പദ്ധതിയുടെ ചുക്കാൻ പിടിക്കുന്നത്. സർക്കാർ, സ്വകാര്യ പങ്കാളിത്തത്തോടെയാണ് ഈ പദ്ധതി വികസിപ്പിക്കുക. 'പ്രോജക്ട് കുഷ' പദ്ധതിക്ക് വേണ്ടി ഡിആർഡിഒ 21,700 കോടി രൂപ അനുവദിച്ചിട്ടുണ്ട്.
വികസിപ്പിച്ച ശേഷം, ശത്രുവിന്റെ ദീർഘദൂര ക്രൂയിസ് മിസൈലുകൾ, സ്റ്റെൽത്ത് ഫൈറ്റർ ജെറ്റുകൾ, ഡ്രോൺ ആക്രമണങ്ങൾ എന്നിവ തടയാൻ ഇത് പ്രാപ്തമാകുമെന്ന് പ്രതീക്ഷിക്കുന്നു. കുഷ് പദ്ധതിക്ക് കീഴിൽ വികസിപ്പിച്ച പൂർണ്ണ തദ്ദേശീയ സാങ്കേതിക പ്രതിരോധ സംവിധാനമായ 'ലോംഗ് റേഞ്ച് സർഫേസ്-ടു-എയർ ഡിഫൻസ് സിസ്റ്റം (LR-SAM)' ദീർഘദൂര വ്യോമ നിരീക്ഷണ ശേഷികൾ ഉൾക്കൊള്ളുന്നു.
undefined
ലോകമെമ്പാടുമുള്ള ശക്തമായ പ്രതിരോധ സംവിധാനങ്ങളുമായി ഇതിനെ താരതമ്യം ചെയ്‍താല്‍ നമ്മുടെ ഈ പ്രതിരോധ സംവിധാനം എല്ലാത്തിലും ഒരുപടി കടന്നു നില്‍ക്കും എന്നാണ് റിപ്പോര്‍ട്ടുകള്‍. ഒരു വ്യോമ പ്രതിരോധ സംവിധാനത്തെക്കുറിച്ച് പറയുമ്പോൾ പലരുടെയും മനസിൽ ആദ്യം വരുന്നത് ഒരുപക്ഷേ ഇസ്രായേൽ പ്രതിരോധ സംവിധാനവും അതിന്റെ അയൺ ഡോമും ആയിരിക്കും. ഇന്ത്യക്കാർക്ക് സന്തോഷകരമായ കാര്യം രാജ്യത്തെ LR-SAM സംവിധാനം അയൺ ഡോമിനെയും പരാജയപ്പെടുത്തും എന്നതാണ്. അമേരിക്കയുടെ ടെർമിനൽ ഹൈ ആൾട്ടിറ്റ്യൂഡ് ഏരിയ ഡിഫൻസ് (THAAD), പാട്രിയറ്റ് മിസൈൽ സിസ്റ്റം, റഷ്യയുടെ എസ്-400 ട്രയംഫ് തുടങ്ങിയവയെ വെല്ലുന്നതാകും നമ്മുടെ സംവിധാനം എന്നും വിവിധ റിപ്പോര്‍ട്ടുകള്‍ പറയുന്നു.
അന്ന് പാക്ക് വിമാനത്തെ വീഴ്ത്തിയ അഭിനന്ദന്‍റെ ആ മിസൈൽ ഇനി ഇന്ത്യയിൽ പിറക്കും! സുപ്രധാന നീക്കം!
ശത്രു മിസൈലുകളെ തിരിച്ചറിയാനും തടയാനും ആകാശത്തില്‍ വച്ചുതന്നെ വെടിവച്ചിടാനും തദ്ദേശീയമായ ഈ എൽആർ-എസ്എഎം സംവിധാനത്തിന് കഴിയും. 150 മുതൽ 350 കിലോമീറ്റർ വരെ അകലെയുള്ള ശത്രുവിനെ ആക്രമിക്കാൻ സഹായിക്കുന്ന ദീർഘദൂര നിരീക്ഷണവും ഫയർ കൺട്രോൾ റഡാറും ഇതിൽ സജ്ജീകരിക്കും. വിവിധ റിപ്പോർട്ടുകൾ പ്രകാരം 150 മുതൽ 350 വരെ കിലോമീറ്റർ അകലെയുള്ള മിസൈലുകളെ തിരിച്ചറിഞ്ഞ് നശിപ്പിക്കാൻ എൽആർ-എസ്എഎമ്മിന് കഴിയും. 150 കി.മീ, 250 കി.മീ, 350 കി.മീ ദൂരത്തിൽ ശത്രുവിനെ ലക്ഷ്യമിടാൻ കഴിയുന്ന വിവിധ തരം ഇന്റർസെപ്റ്റർ മിസൈലുകളാണ് ഇതിൽ സ്ഥാപിക്കുന്നത്. ടൈംസ് ഓഫ് ഇന്ത്യ റിപ്പോർട്ട് അനുസരിച്ച്, LR-SAM-ൽ വിമാനവും എയർബോൺ വാണിംഗ് ആൻഡ് കൺട്രോൾ സിസ്റ്റവും (AWacs) സജ്ജീകരിക്കുമെന്ന് ഒരു ഡിആർഡിഒ ഉദ്യോഗസ്ഥൻ പറഞ്ഞു. ഇത് മിഡ്-എയർ മിസൈലുകളെ 350 കിലോമീറ്റർ ദൂരത്തിൽ നിർത്തും. അതായത് ശത്രുക്കള്‍ക്ക് ഇന്ത്യയെ തൊടാൻ കഴിയില്ല.
LR-SAM-ൽ ഒരു 'ഫയർ കൺട്രോൾ' റഡാറും ഉണ്ട്. ഇന്ത്യൻ 'എയർ ഡിഫൻസ് സിസ്റ്റം' തന്ത്രപരമായി പ്രവർത്തിക്കും. ഇന്ത്യയുടെ 'അയൺ ഡോമിന്' വ്യോമാതിർത്തിയിൽ കർശന നിരീക്ഷണം നടത്താൻ കഴിയും. അത് റോക്കറ്റ് ആക്രമണമോ മിസൈലുകളോ ആകട്ടെ, ഡ്രോൺ ആക്രമണങ്ങൾ ഉള്‍പ്പെട അതിന്റെ ശ്രദ്ധയിൽപ്പെടാതെ പോകില്ല. രാജ്യത്തിന്റെ ഗ്രൗണ്ടിൽ എത്തുന്നതിന് മുമ്പ് LR-SAM ആകാശത്ത് വച്ച് തന്നെ ശത്രുവിനെ നശിപ്പിക്കും. ദീർഘദൂര ഗ്രൗണ്ട് ടു എയർ ആക്രമണങ്ങൾക്കെതിരായ ഈ പ്രതിരോധ സംവിധാനം പ്രധാനമായും മൂന്ന് കാര്യങ്ങൾ ചെയ്യും. റഡാർ മുഖേന ലക്ഷ്യങ്ങൾ തിരിച്ചറിയുക, ആ ലക്ഷ്യങ്ങളിലേക്ക് വേഗത്തിൽ നീങ്ങുക, മിസൈൽ ആക്രമണങ്ങളെ തടസപ്പെടുത്തുക.
ഒരേസമയം ഒന്നിലധികം മിസൈലുകൾ വെടിവച്ചിടുന്നതിൽ തങ്ങളുടെ അയൺ ഡോമിന് 90 ശതമാനം കൃത്യതയുണ്ടെന്നാണ് ഇസ്രായേലിന്റെ അയൺ ഡോം ഇസ്രായേലി ഡിഫൻസ് ഫോഴ്‌സ് (ഐഡിഎഫ്) അവകാശപ്പെടുന്നത്. ഇത് ശത്രു മിസൈലിനെ തിരിച്ചറിയുകയും വായുവിൽ വച്ചുതന്നെ നശിപ്പിക്കുകയും ചെയ്യുന്നു. അയൺ ഡോം ഒരു മൾട്ടി-ലെയർ മിസൈൽ പ്രതിരോധ സംവിധാനമാണ്, അതിൽ ശത്രു മിസൈലുകൾ, യുദ്ധ മാനേജ്മെന്റ്, ആയുധ നിയന്ത്രണ സംവിധാനം, ഇന്റർസെപ്റ്റർ മിസൈലുകൾ എന്നിവ തിരിച്ചറിയുന്നതിനുള്ള റഡാർ സംവിധാനമുണ്ട്. ശത്രുക്കളിൽ നിന്ന് വായുവിലൂടെ വരുന്ന മിസൈലുകൾ തിരിച്ചറിയുകയും അതിന്റെ സഞ്ചാരപഥം ശ്രദ്ധിക്കുകയും ജനവാസ കേന്ദ്രങ്ങളിലേക്ക് അയച്ചതായി തോന്നിയാൽ വായുവിൽ വെച്ച് തന്നെ നശിപ്പിക്കുകയും ചെയ്യുന്ന തരത്തിലാണ് അയൺ ഡോം പ്രവർത്തിക്കുന്നത്. ഒരേസമയം ഒന്നിലധികം മിസൈലുകൾ തകർക്കാൻ കഴിയുമെന്നാണ് ഇസ്രായേൽ പ്രതിരോധ മന്ത്രാലയം അവകാശപ്പെടുന്നത്.
മൊത്തത്തിൽ, 'അയൺ ഡോമിന്റെ' ഈ തദ്ദേശീയ പതിപ്പ് ഇന്ത്യയുടെ വ്യോമ പ്രതിരോധശേഷി വർദ്ധിപ്പിക്കും. ശത്രു മിസൈലുകളെ വളരെ ദൂരെ തകർത്ത് ഇന്ത്യൻ വ്യോമാതിർത്തിയുടെ സുരക്ഷ ഉറപ്പാക്കാൻ ഈ സംവിധാനത്തിന് സാധിക്കും. റഷ്യയിൽ നിന്ന് സ്വന്തമാക്കിയ മൂന്ന് എസ്-400 വ്യോമ പ്രതിരോധ സംവിധാനങ്ങൾ നിലവില്‍ ഇന്ത്യക്കുണ്ട് എന്നത് ശ്രദ്ധേയമാണ്. അത്തരത്തിലുള്ള രണ്ട് പ്രതിരോധ സംവിധാനങ്ങൾ റഷ്യയിൽ നിന്ന് ഇനിയും ഇന്ത്യയിലേക്ക് എത്താനുമുണ്ട്.
പാക്കിസ്ഥാൻ, ചൈന തുടങ്ങിയ അയല്‍ രാജ്യങ്ങളിൽ നിന്ന് ഉയരുന്ന ഭീഷണികൾ കണക്കിലെടുത്ത് ഇന്ത്യയ്ക്ക് നിലവിൽ ഇത്തരമൊരു 'വ്യോമ പ്രതിരോധ സംവിധാനം' ഉണ്ടാകേണ്ടത് അത്യന്താപേക്ഷിതമാണെന്ന് പ്രതിരോധ മന്ത്രാലയ വൃത്തങ്ങൾ പറയുന്നു. പാകിസ്ഥാന് ഇത്തരമൊരു പ്രതിരോധ സംവിധാനമില്ലെങ്കിലും ചൈനയ്ക്ക് 'എയർ ഡിഫൻസ് സിസ്റ്റം' ഉണ്ട്. അതേസമയം ഇന്ത്യ ഒരു 'എയർ ഡിഫൻസ് സിസ്റ്റം' വികസിപ്പിച്ചാലും, അത് എത്ര കുറ്റമറ്റതായിരിക്കുമെന്ന് ഇപ്പോൾ പറയാനാവില്ല എന്നതും ശ്രദ്ധേയമാണ്. ഹമാസിന്റെ പെട്ടെന്നുള്ള ആക്രമണത്തിൽ ഇസ്രായേലിന്റെ 'അയൺ ഡോം' ആദ്യം ആശയക്കുഴപ്പത്തിലായതായി റിപ്പോര്‍ട്ടുകള്‍ ഉണ്ടായിരുന്നു. എന്നാൽ പിന്നീട് ഹമാസ് മിസൈൽ ആക്രമണത്തെ ഇത് ഫലപ്രദമായി ചെറുത്തു എന്നാണ് റിപ്പോര്‍ട്ടുകള്‍.