പ്രണയകാലത്ത് നൽകിയ പണവും ആഭരണങ്ങളും തിരിച്ചുനൽകാത്തതിലുള്ള പ്രതികാരമായി യുവാവ് മുൻ കാമുകിയുടെ കാറുകൾ രാസലായിനി ഒഴിച്ച് നശിപ്പിച്ചു.
പ്രണയകാലത്ത് നൽകിയ പണവും ആഭരണങ്ങളും തിരിച്ചുനൽകാത്തതിലുള്ള പ്രതികാരമായി യുവാവ് മുൻ കാമുകിയുടെ കാറുകൾ രാസലായിനി ഒഴിച്ച് നശിപ്പിച്ചു. ദുബൈയിലെ അല്‍ക്കൂസിലാണ് സംഭവം. പൊലീസ് നടത്തിയ അന്വേഷണത്തില്‍ യുവതിയുടെ മുന്‍ കാമുകന്‍ പിടിയിലായി.
മുന്‍ കാമുകിയുടെ കാറുകള്‍ക്ക് പുറമേ അവരുടെ ബന്ധുക്കളുടെ മൂന്നു കാറുകളിലും യുവാവ് രാസലായിനി ഒഴിച്ചു. തങ്ങളുടെ കാറുകൾ അജ്ഞാതർ നശിപ്പിച്ചെന്നു ചൂണ്ടിക്കാണിച്ച് പെൺകുട്ടിയുടെ കുടുംബക്കാർ ബർദുബൈ പൊലീസിൽ പരാതി നൽകി. ഹെൽമറ്റ് ധരിച്ച ഒരാൾ ബൈക്കിലെത്തിയശേഷം കാറിൽ രാസലായിനി ഒഴിക്കുന്നതായി സിസിടി.വി ദൃശ്യങ്ങളിൽ വ്യക്തമായിരുന്നു. തുടര്‍ന്ന് അത്യാധുനിക സംവിധാനങ്ങൾ ഉപയോഗിച്ചു നടത്തിയ പരിശോധനയിലാണ് പ്രതിയെ തിരിച്ചറിഞ്ഞത്.
താന്‍ പ്രണയകാലത്ത് നൽകിയ പണവും ആഭരണങ്ങളും തിരിച്ചുനൽകാത്തതിലുള്ള നിരാശയാണ് കുറ്റകൃത്യത്തിന് പ്രേരിപ്പിച്ചതെന്നും കൃത്യം ചെയ്യാന്‍ രണ്ടു സുഹൃത്തുക്കൾ തന്നെ സഹായിച്ചതായും ഇയാള്‍ പൊലീസിനോട് പറഞ്ഞു.