'പുറത്തെ കാര്യങ്ങള്‍ ഇവിടെ സംസാരിക്കുന്നു'; മിഷേല്‍ നിയമം തെറ്റിച്ചെന്ന് ബിഗ് ബോസിനോട് ഡിംപല്‍
"ആ കുട്ടി എന്താണ് കാണിക്കുന്നത്? നിങ്ങള്‍ എഴുതിയിട്ടില്ലേ സൈന്‍ ചെയ്തപ്പോള്‍, പുറത്തെ കാര്യങ്ങള്‍ നമ്മള്‍ ഇവിടെ സംസാരിക്കാന്‍ പാടില്ലെന്ന്.."
 )
Followബിഗ് ബോസില്‍ ആത്മസുഹൃത്തിനെക്കുറിച്ചുള്ള കഥ ഡിംപല്‍ അവതരിപ്പിച്ചത് ഷോയില്‍ പേര് നേടാനാണെന്ന രീതിയില്‍ പുതിയ മത്സരാര്‍ഥി മിഷേല്‍ പറഞ്ഞത് ഹൗസില്‍ വലിയ ചര്‍ച്ചയ്ക്കും സംഘര്‍ഷത്തിനും ഇടയാക്കിയിരുന്നു. സുഹൃത്തിന്‍റെ വീട് സന്ദര്‍ശിച്ചപ്പോഴത്തെ ചിത്രങ്ങള്‍ ഡിംപല്‍ ഫേസ്ബുക്കില്‍ പോസ്റ്റ് ചെയ്തിരുന്നതിനെച്ചൊല്ലി സോഷ്യല്‍ മീഡിയയില്‍ ഒരു വിഭാഗം സംശയങ്ങള്‍ ഉയര്‍ത്തിയിരുന്നു. 20 വര്‍ഷത്തിനു ശേഷം സുഹൃത്തിന്‍റെ വീട്ടിലെത്തിയത് ബിഗ് ബോസ് പ്ലാനിംഗിന്‍റെ ഭാഗമാണെന്നതായിരുന്നു ആ വിമര്‍ശനങ്ങളുടെ കാതല്‍. ആദ്യ വാരത്തിനുശേഷം ഹൗസിലെത്തിയ മിഷേല്‍ ഡിംപലിന്‍റെ സോഷ്യല്‍ മീഡിയ പോസ്റ്റില്‍ ഊന്നിയാണ് മറ്റു മത്സരാര്‍ഥികളോട് ഇക്കാര്യം സംസാരിച്ചത്. പുറത്തെ കാര്യങ്ങള്‍ ഹൗസില്‍ പറയരുതെന്ന് ബിഗ് ബോസില്‍ നിയമമുണ്ട്. ഇന്നത്തെ എപ്പിസോഡിന്‍റെ തുടക്കത്തില്‍ പുറത്തെ ക്യാമറയ്ക്കു മുന്നില്‍ വന്നുനിന്ന് ഡിംപല്‍ ഇക്കാര്യം കാഷ്വല്‍ ആയി ബിഗ് ബോസിനു മുന്നില്‍ അവതരിപ്പിച്ചു.
"ബിഗ് ബോസ് സമ്മതിച്ചല്ലോ. അപ്പോള്‍ യൂണിഫോം വന്നുകഴിഞ്ഞിട്ട് എല്ലാത്തിനും ഉത്തരം കൊടുക്കാം. ഒരാള്‍ പേടിക്കുമ്പോഴാണ് പിച്ചും പേയുമെല്ലാം പറയുന്നത്. അപ്പൊ ഒരു കാര്യം മനസിലായി, പേടിയുണ്ട് എന്നോട്. ഞാന്‍ കുറച്ച് ടെറര്‍ ഒക്കെയാണ്. സത്യം. (ചിരി) ടെറര്‍ ആയി നമ്മള്‍ നിന്നില്ലെങ്കില്‍ നമ്മളെ കടിച്ചുതിന്നും ആളുകള്‍. ബിഗ് ബോസ് ഹൗസിനു പുറത്ത് ഞാന്‍ കുറച്ച് ടെറര്‍ ആണ്. ഇവിടെ ഞാന്‍ ആരെയും നന്നാക്കാന്‍ വന്നതല്ല. അതാണ് ഞാന്‍ നേരത്തെയും പറഞ്ഞത്. ആരൊക്കെ റിയല്‍ ആണ്, റീല്‍ ആണ് എന്ന് എനിക്ക് മനസിലാവുന്നുണ്ട്. സൈലന്‍റ് ആയിട്ട് വാച്ച് ചെയ്യുന്നത് നന്നാവും. നല്ല രീതിയിലൊക്കെ പറഞ്ഞുനോക്കി. അതൊക്കെ കേട്ടിട്ട് ഇങ്ങനെയാണ് അവര്‍ ബിഹേവ് ചെയ്യാന്‍ തീരുമാനിക്കുന്നതെങ്കില്‍.. ആ കുട്ടി എന്താണ് കാണിക്കുന്നത്? നിങ്ങള്‍ എഴുതിയിട്ടില്ലേ സൈന്‍ ചെയ്തപ്പോള്‍ പുറത്തെ കാര്യങ്ങള്‍ നമ്മള്‍ ഇവിടെ സംസാരിക്കാന്‍ പാടില്ലെന്ന്. അതുകൊണ്ട് മാത്രമാണ് കേട്ടോ.എനിക്ക് റൂള്‍സ് ഒക്കെ ഫോളോ ചെയ്യുന്നത് ഇഷ്ടമാണ്. വരാന്‍ പോകുന്ന ആഴ്ചകളില്‍ പറഞ്ഞല്ല, നമുക്ക് ചെയ്തറിയാം അങ്ങോട്ടും ഇങ്ങോട്ടും", ഡിംപല്‍ പറഞ്ഞു.
അതേസമയം ആദ്യവാരം പിന്നിടുമ്പോള്‍ ആവേശകരമായി മുന്നേറുകയാണ് ബിഗ് ബോസ് 3. എട്ട് പേരാണ് ഈ വാരം നോമിനേഷന്‍ ലിസ്റ്റില്‍. റിതു മന്ത്ര, കിടിലം ഫിറോസ്, ലക്ഷ്മി ജയന്‍, ഡിംപല്‍ ഭാല്‍, സന്ധ്യ മനോജ്, സായ് വിഷ്ണു, അഡോണി ജോണ്‍, ഭാഗ്യലക്ഷ്മി എന്നിവരാണ് നോമിനേറ്റ് ചെയ്യപ്പെട്ടത്. സൂര്യ ജെ മേനോന്‍ ആണ് ഈ വാരത്തിലെ ക്യാപ്റ്റന്‍.
