20 മിനിറ്റുകൊണ്ട് ബുക്കിംഗ് 5000 കടന്നു, കണ്ണുതള്ളി ചൈനീസ് കമ്പനി!
20 മിനിറ്റിൽ 5,000 ബുക്കിംഗാണ് എംജി ആസ്റ്ററിന് ലഭിച്ചതെന്ന് ബിസിനസ് സ്റ്റാന്‍ഡേര്‍ഡ്‍സ് റിപ്പോര്‍ട്ട് ചെയ്യുന്നു
 )
Followഅടുത്തിടെയാണ് ചൈനീസ് (Chinese) വാഹന നിര്‍മ്മാതാക്കളായ എംജി മോട്ടോഴ്‌സ് ഇന്ത്യ (MG Motors India) പുതിയ മോഡലായ ആസ്റ്ററിനെ (Astor) വിപണിയില്‍ അവതരിപ്പിച്ചത്. കഴിഞ്ഞ ദിവസം രാവിലെ 11 നാണ് എംജി ആസ്റ്റർ എസ്‌യുവിയുടെ ബുക്കിംഗ് ആരംഭിച്ചത്. എന്നാല്‍ റെക്കോര്‍ഡ് വേഗതയിലാണ് വാഹനത്തിന്‍റെ ബുക്കിംഗ് കുതിച്ചതെന്നാണ് പുതിയ റിപ്പോര്‍ട്ടുകള്‍.
വെറും 20 മിനിറ്റിൽ 5,000 ബുക്കിംഗാണ് എംജി ആസ്റ്ററിന് ലഭിച്ചതെന്ന് ബിസിനസ് സ്റ്റാന്‍ഡേര്‍ഡ്‍സ് റിപ്പോര്‍ട്ട് ചെയ്യുന്നു. 2021ൽ 5000 വാഹനങ്ങൾ മാത്രം നിരത്തിലെത്തിക്കാനുള്ള തീരുമാനത്തിലാണ് കമ്പനി. ഇതോടെ തൽക്കാലത്തേക്ക് ബുക്കിംഗ് നിർത്തിവയ്ക്കുകയും ചെയ്തു. 25,000 രൂപ ആയിരുന്നു വാഹനത്തിന്‍റെ ബുക്കിംഗ് തുക.
ഉപഭോക്താക്കളിൽ നിന്ന് ലഭിച്ച പ്രതികരണത്തിൽ തങ്ങൾ ആവേശഭരിതരാണെന്ന് എംജി മോട്ടോർ ഇന്ത്യ പ്രസിഡന്റും എംഡിയുമായ രാജീവ് ഛാബ പറഞ്ഞു. ആഗോള ചിപ്പ് പ്രതിസന്ധി കണക്കിലെടുക്കുമ്പോൾ, ഈ വർഷം പരിമിതമായ എണ്ണം കാറുകൾ മാത്രമേ വിതരണം ചെയ്യാൻ കഴിയൂ. അടുത്ത വർഷം മുതൽ കാര്യങ്ങൾ മെച്ചപ്പെടുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു. ആദ്യ ബാച്ച് ആസ്റ്ററിന്റെ ഡെലിവറികൾ നവംബർ മുതൽ ആരംഭിക്കും എന്നാണ് റിപ്പോര്‍ട്ടുകള്‍.
എംജി ഹെക്ടർ, എംജി ഹെക്ടർ പ്ലസ്, എംജി ഇസഡ്എസ് ഇവി, എംജി ഗ്ലോസ്റ്റർ എന്നിവയ്ക്ക് ശേഷം ചൈനീസ് വാഹന നിര്‍മ്മാതാക്കളായ SAIC മോട്ടോഴ്സിന്റെ കീഴിലുള്ള മോറിസ് ഗാരേജ് അഥവാ എം ജി മോട്ടോഴ്സിന്റെ ഇന്ത്യയിലെ അഞ്ചാമത്തെ ഉൽ‌പ്പന്നമാണ് പുതിയ എംജി ആസ്റ്റർ എസ്‌യുവി. ഈ മാസം ആദ്യം 9.78 ലക്ഷം രൂപയ്ക്കാണ് ആസ്റ്റർ എസ്‌യുവി കമ്പനി പുറത്തിറക്കിയത്. ഹ്യുണ്ടായ് ക്രെറ്റ, കിയ സെൽറ്റോസ് തുടങ്ങിയ മിഡ്-സൈസ് എസ്‌യുവികളുടെ എതിരാളിയാണ് ആസ്റ്റർ. സ്റ്റൈൽ, സൂപ്പർ, സ്മാർട്ട്, ഷാർപ്പ് എന്നിങ്ങനെ നാല് വേരിയന്റുകളാണ് വാഹനത്തിനുള്ളത്. എംജി മോട്ടോറിന്റെ ഓട്ടോണമസ് ലെവൽ 2 സിസ്റ്റമായ അഡ്വാൻസ്ഡ് ഡ്രൈവർ അസിസ്റ്റന്റ് സിസ്റ്റം (ADAS) ആസ്റ്ററിന് ലഭിക്കും. ഹ്യുണ്ടായ് ക്രെറ്റ, കിയ സെൽറ്റോസ്, സ്കോഡ കുഷാക്ക്, ഫോക്‌സ്‌വാഗൺ ടൈഗൂൺ, നിസ്സാൻ കിക്ക്സ്, റെനോ ഡസ്റ്റർ തുടങ്ങിയവരാണ് ആസ്റ്ററിന്റെ മുഖ്യ എതിരാളികൾ.
MG ZS EV യുടെ പെട്രോൾ പതിപ്പാണിത്. 1.5 ബി ലിറ്റർ നാച്ചുറലി-ആസ്പിറേറ്റഡ് എഞ്ചിനാണ് ഹൃദയം. ഈ എഞ്ചിന്‍ 110 ബിഎച്ച്പിയും 144 എൻഎം പരമാവധി ടോർക്കും വികസിപ്പിക്കും. കൂടാതെ ഇത് 6 സ്പീഡ് മാനുവൽ അല്ലെങ്കിൽ 8 സ്പീഡ് സിവിടി യൂണിറ്റുമായി ബന്ധിപ്പിച്ചിരിക്കുന്നു. മറ്റൊന്ന് 1,349 സിസി ടർബോചാർജ്ഡ് പെട്രോൾ യൂണിറ്റാണ്, ഇത് 140 ബിഎച്ച്പിയും 220 എൻഎം പരമാവധി ടോർക്കും പുറപ്പെടുവിക്കും. ഒപ്പം 6 സ്പീഡ് ഓട്ടോമാറ്റിക് ഗിയർബോക്‌സും. എംജി മോട്ടോർ ഇന്ത്യ ആസ്റ്ററിന് ഡീസൽ പവർട്രെയിൻ നൽകില്ല.
2019 എംജി ഇസഡ്‌എസിനെ അടിസ്ഥാനമാക്കിയുള്ളതാണ് ഡിസൈന്‍. എംജി ആസ്റ്ററിന് അതിന്റേതായ സവിശേഷമായ ടച്ചുകൾ നൽകിയിട്ടുണ്ട്. അതിൽ സെലസ്റ്റിയൽ ഇഫക്റ്റ് ഉള്ള ഫ്രണ്ട് ഗ്രിൽ, ഹെഡ്‌ലാമ്പുകൾക്കിടയിൽ എൽഇഡി ട്രീറ്റ്മെന്റ്, ക്രിസ്റ്റലിൻ അലങ്കാരങ്ങൾ എന്നിവ ഉൾപ്പെടുന്നു. മുൻവശത്തെ ചില മാറ്റങ്ങളിൽ ഒരു പുതിയ ബമ്പറും പുതിയ ഫോഗ്ലാമ്പും ഉൾപ്പെടുന്നു. വശത്ത് നിന്ന് നോക്കിയാൽ പുതിയ എംജി ആസ്റ്ററിൽ ഒരു ജോടി 17 ഇഞ്ച് ഡ്യുവൽ ടോൺ അലോയ് വീലുകൾ കാണാം. ബാക്കി പ്രൊഫൈൽ ZS EV പോലെ തന്നെയാണ്. പിൻഭാഗത്ത്, സംയോജിത ഫാക്സ് എക്‌സ്‌ഹോസ്റ്റും സ്കിഡ് പ്ലേറ്റുകളുമുള്ള പുതിയ റിയർ ബമ്പറുകൾ മാത്രമാണ് എംജി ആസ്റ്ററിന്റെ പുതിയ ഘടകങ്ങൾ.
എംജി ആസ്റ്ററിനുള്ളിൽ ഡാഷ്ബോർഡ്, സൈഡ് പാനലുകൾ, പ്രീമിയം അപ്ഹോൾസ്റ്ററി എന്നിവ സോഫ്റ്റ്-ടച്ച് മെറ്റീരിയലുകൾ കൊണ്ടാണ് നിർമ്മിച്ചിരിക്കുന്നത്. ക്യാബിന്റെ ഹൃദയഭാഗത്ത് 10.1 ഇഞ്ച് ഇൻഫോടെയ്ൻമെന്റ് ടച്ച്‌സ്‌ക്രീൻ ഉണ്ട്, അത് ആസ്റ്ററിന്റെ എല്ലാ പ്രവർത്തനങ്ങളും നിയന്ത്രിക്കുന്നു. കൂടാതെ ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയുമായി പൊരുത്തപ്പെടുന്നു. ടോപ്പ്-സ്പെക്ക് MG ആസ്റ്ററിൽ വയർലെസ് ചാർജിംഗ് ഉണ്ട്. പിൻ യാത്രക്കാർക്ക് യുഎസ്ബി സോക്കറ്റും പിൻ എസി വെന്റുകളും ലഭിക്കും. ബൂട്ട് സ്പേസ് സെഗ്മെന്റിലെ ഏറ്റവും വലുതാണ് 400 ലിറ്റർ. വ്യക്തിഗത AI യൂണിറ്റ് ഡാഷ്‌ബോർഡിന് മുകളിൽ ഇരിക്കുകയും വിക്കിപീഡിയയിൽ നിന്ന് ലഭിച്ച വിവരങ്ങളുമായി പ്രതികരിക്കുകയും ചെയ്യുന്നു. AI യൂണിറ്റ് റൂഫ് തുറക്കുന്നത് പോലുള്ള കമാൻഡുകൾ പാലിക്കുന്നു. ഡ്യുവൽ-ടോൺ സാംഗ്രിയ റെഡ്, ഡ്യുവൽ-ടോൺ ഐവറി ഗ്രേ, സിംഗിൾ-ടോൺ ടക്സീഡോ ബ്ലാക്ക് എന്നിങ്ങനെ മൂന്ന് ഇന്റീരിയർ തീമുകളിൽ എംജി മോട്ടോർ ആസ്റ്റർ വാഗ്ദാനം ചെയ്യുന്നു.
ലെവൽ -2 അഡ്വാൻസ്ഡ് ഡ്രൈവർ-അസിസ്റ്റൻസ് സിസ്റ്റം (ADAS), അഡാപ്റ്റീവ് ക്രൂയിസ് കൺട്രോൾ, ഫോർവേഡ് കോളിഷൻ മുന്നറിയിപ്പ്, ഓട്ടോമാറ്റിക് എമർജൻസി ബ്രേക്കിംഗ്, ലെയ്ൻ കീപ്പ് അസിസ്റ്റ് തുടങ്ങിയ ഫസ്റ്റ്-ഇൻ-ക്ലാസ് സവിശേഷതകൾ , ലെയ്ൻ ഡിപാർച്ചർ പ്രിവൻഷൻ, സ്പീഡ് അസിസ്റ്റ്. ഫിസിക്കൽ കീ വീട്ടിൽ മറന്ന് വച്ചാലും കാറിനെ നിയന്ത്രിക്കുന്ന സ്മാർട്ട്‌ഫോണുമായി ബന്ധിപ്പിച്ചിട്ടുള്ള ഡിജിറ്റൽ കീയും എംജി ആസ്റ്ററിന്റെ സവിശേഷതയാണ്. കാറിന്റെ 90 ശതമാനം വരെ ഉൾക്കൊള്ളുന്ന പനോരമിക് സൺറൂഫും എംജി ആസ്റ്ററിന്റെ സവിശേഷതയാണ്.
