തീപിടുത്തമുണ്ടായ ആക്രി സംഭരണ കേന്ദ്രത്തിലെ കൂടുതല് സിസിടിവി ദൃശ്യങ്ങള് പരിശോധിച്ചതാണ് അന്വേഷണത്തിൽ നിര്ണായകമായത്.
കല്പ്പറ്റ: മുട്ടിലിനടുത്ത എടപ്പെട്ടിയില് ആക്രി സംഭരണ കേന്ദ്രം കത്തിയ സംഭവത്തില് തീവെച്ചയാളെ പോലീസ് അറസ്റ്റ് ചെയ്തു. കല്പ്പറ്റ എമിലി ചീനിക്കോട് വീട്ടില് സുജിത്ത് ലാല് (37) ആണ് അറസ്റ്റിലായത്. സ്ഥാപനത്തിലെ ചില ജീവനക്കാരുമായുള്ള വ്യക്തി വൈരാഗ്യം തീര്ക്കാനാണ് ആക്രി സംഭരണ കേന്ദ്രം തീ വെച്ചതെന്നാണ് വിവരം.
ഇക്കഴിഞ്ഞ ചൊവ്വാഴ്ച രാത്രി ഒമ്പതരയോടെയാണ് എടപ്പെട്ടിയിലെ ആക്രിസംഭരണ കേന്ദ്രം കത്തിനശിച്ചത്. ആളപായം ഉണ്ടായിരുന്നില്ല. എന്നാല് കടയിലെ സാധനങ്ങളെല്ലാം കത്തിച്ചാമ്പലാകുകയായിരുന്നു. കല്പ്പറ്റയില് നിന്നുള്ള ഫയര്ഫോഴ്സ് അംഗങ്ങളാണ് തീ അണച്ചത്. കേന്ദ്രത്തിലെ സി.സി.ടി.വി ദൃശ്യങ്ങള് പരിശോധിച്ചപ്പോഴാണ് തീപിടുത്തം ആസൂത്രിതമെന്ന കാര്യം വെളിപ്പെട്ടത്.
കൂടുതല് വിഡീയോ ദൃശ്യങ്ങള് പരിശോധിച്ചപ്പോഴാണ് ഒരാള് എത്തി തീവെക്കുന്നത് കാണാനായത്. തീപടര്ത്തിയതിന് ശേഷം ഒരാള് ഓടിപോകുന്നതായിരുന്നു ദൃശ്യങ്ങളിലുണ്ടായിരുന്നത്. ഇന്നലെ പ്രതിയെ സംഭരണ കേന്ദ്രത്തിലേക്ക് എത്തിച്ചിരുന്നെങ്കിലും പൊലീസ് വാഹനത്തില് നിന്ന് പുറത്തിറക്കിയിരുന്നില്ല. ഇന്ന് കേന്ദ്രത്തിലെത്തിച്ച് തെളിവെടുപ്പ് നടത്തുമെന്നാണ് കരുതുന്നത്.
ജാർഖണ്ഡില് നിന്ന് ഷൂട്ടർമാരെത്തിയിട്ടും കുറവില്ലാതെ കാട്ടുപന്നി ആക്രമണം; കണ്ണീരിലാഴ്ത്തി ജിനീഷിന്റെ വിയോഗവും
കോഴിക്കോട്: തിരുവമ്പാടിയിൽ കാട്ടുപന്നിയെ പേടിച്ച് നാടും നാട്ടുകാരും എന്തുചെയ്യണമെന്നറിയാതെ നില്ക്കുന്നതിനിടെ തീരാനോവായി ജിനീഷിന്റെ മരണവാര്ത്ത. കഴിഞ്ഞ ഞായറാഴ്ച രാത്രി സുഹൃത്തും ബന്ധുവുമായ ബിബിനിനൊപ്പം സിനിമ കണ്ട് മുക്കത്ത് നിന്ന് മടങ്ങവേയാണ് കാട്ടുപന്നി ഇവര് സഞ്ചരിച്ച ബൈക്കിന് കുറുകേ ചാടിയത്. ബൈക്കില് നിന്ന് തെറിച്ച് വീണ ഇരുവര്ക്കും സാരമായി പരിക്കേല്ക്കുകയായിരുന്നു. ചികിത്സയിലിരിക്കെ ഇന്നലെയാണ് ജിനീഷ് മരിച്ചത്.
തിരുവമ്പാടി പഞ്ചായത്തില് മിക്ക വാര്ഡുകളിലും കാട്ടുപന്നി ശല്യം രൂക്ഷമാണ്. പൊന്നാങ്കയം കൂടാതെ പുന്നക്കല്, തമ്പലമണ്ണ, ആനക്കാംപൊയില്, മുത്തപ്പന്പുഴ, പുല്ലൂരാംപാറ തുടങ്ങിയ സ്ഥലങ്ങളിലാണ് രൂക്ഷമായ പ്രശ്നങ്ങളുള്ളത്. ഏതാനും ദിവസങ്ങള്ക്ക് മുന്പ് ജിനീഷിന്റെ തന്നെ മറ്റൊരു ബന്ധുവിന് കാട്ടുപന്നിയെ കണ്ട് പരിഭ്രമിച്ച് ഓടുന്നതിനിടയില് വീണ് പരിക്കേറ്റിരുന്നു. കര്ഷകരെയും റബ്ബര് ടാപ്പിംഗ് തൊഴിലാളികളെയും നാട്ടുകാരെയും പന്നി ആക്രമിക്കുന്നത് പതിവായിരിക്കുകയാണ്. ഒരു തവണ ഇത്തരത്തിലുണ്ടായ ആക്രമണത്തില് ഒരാളുടെ കാല് കുത്തിക്കീറിയ നിലയിലായിരുന്നു. ഇതിനെല്ലാം പുറമേയാണ് വാഹനത്തിന് കുറുകേ ചാടിയുണ്ടാകുന്ന അപകടങ്ങള്. ഇരുചക്രവാഹനത്തില് സഞ്ചരിക്കുന്നവരാണ് കൂടുതലും ഈ രീതിയില് അപകടത്തില്പ്പെടുന്നത്.
ഝാര്ഘണ്ഡില് നിന്നുള്ള നാല് ഷുട്ടര്മാരുള്പ്പെടെ പത്തോളം പേര് കാട്ടുപന്നികളെ വെടിവെക്കാനായി തിരുവമ്പാടി, കൂടരഞ്ഞി, കോടഞ്ചേരി പഞ്ചായത്തുകളില് പ്രവര്ത്തിക്കുന്നുണ്ട്. തദ്ദേശ സ്ഥാപനങ്ങള്ക്ക് ഇതിനായി സ്വന്തം നിലയില് തീരുമാനമെടുക്കാം എന്ന ഉത്തരവ് ഇറങ്ങിയതോടെയാണ് ഷൂട്ടര്മാരെ പുറത്തുനിന്ന് പോലും ഇറക്കിയത്. വേട്ടനായകളെ ഉപയോഗിച്ചുള്ള തിരച്ചില് നടത്തുന്നുണ്ടെങ്കിലും കൃഷി ഉല്പന്നങ്ങള്ക്കും മനുഷ്യര്ക്കും നേരെ അടിക്കടി ഉണ്ടാകുന്ന ആക്രമണങ്ങളില് കാര്യമായ കുറവ് വന്നിട്ടില്ലെന്നാണ് നാട്ടുകാര് പറയുന്നത്.
ഏഷ്യാനെറ്റ് ന്യൂസ് ലൈവ് യുട്യൂബില് കാണാം...