MT Vasudevan Nair Birthday 2022 : പല കാലങ്ങളില്‍ എംടി, രണ്ട് ഫോട്ടോഗ്രാഫര്‍മാര്‍ എംടിയെ കണ്ട വിധം
First Published | Jul 15, 2022, 5:19 PM ISTനവതിയിലേക്ക് കാലൂന്നുകയാണ് മലയാളത്തിന്റെ പ്രിയപ്പെട്ട എഴുത്തുകാരന്‍. അതെ, എഴുത്തിന്റെ പെരുന്തച്ചന്‍ എം ടി വാസുദേവന്‍നായര്‍ക്ക് ഇന്ന് 89 വയസ്സ് തികയുന്നു. സാര്‍ത്ഥകമായിരുന്നു ആ നീണ്ട 89 വര്‍ഷങ്ങള്‍. എഴുത്തു കൊണ്ട് മലയാളിയെ വിസ്മയിപ്പിച്ചുതുടങ്ങിയ നാള്‍ മുതല്‍, നമ്മുടെ അനേക കാലങ്ങളെ അദ്ദേഹം അടയാളപ്പെടുത്തുന്നു. എത്രയോ തലമുറകള്‍ എംടിയെ വായിച്ചു വളര്‍ന്നു. സാഹിത്യവും സിനിമയും മാധ്യമപ്രവര്‍ത്തനവും അടക്കമുള്ള അനേകം ഇടങ്ങളിലൂടെ എത്രയോ തലമുറകളുമായി അദ്ദേഹം സംവദിച്ചു. അനായാസം, കാലത്തിനുമുമ്പേ പറന്ന പക്ഷിയായി. നവതിയിലേക്ക് ഒരാണ്ട് ബാക്കിനില്‍ക്കുമ്പോഴും, വാര്‍ദ്ധക്യം ബാധിക്കാത്ത ഊര്‍ജസ്വലതയുമായി ഒരു സിനിമാ സെറ്റിലാണ് അദ്ദേഹമിപ്പോള്‍. പ്രിയദര്‍ശന്‍ സംവിധാനം ചെയ്യുന്ന 'ഓളവും തീരവും' എന്ന സിനിമയുടെ ഷൂട്ടിംഗ് സെറ്റില്‍. ഇടുക്കിയിലെ മൂലമറ്റത്ത്, പുതിയ കാലവുമായി സംവദിക്കാവുന്ന വിധത്തില്‍ അണിഞ്ഞൊരുങ്ങുകയാണ്, ഓളവും തീരവും.