Football
ബ്രസീല്‍ സൂപ്പര്‍ താരം നെയ്മർ ജൂനിയർ ഈ സീസണിലും പി എസ് ജിയിൽ തുടർന്നേക്കുമെന്ന് റിപ്പോര്‍ട്ട്.
ബ്രസീലിയൻ താരത്തെ ടീമിൽ നിലനിർത്തണമെന്ന് പുതിയ കോച്ച് ലൂയിസ് എന്‍‌റിക്വെ ടീം മാനേജ്മെന്‍റിനോട് ആവശ്യപ്പെട്ടുവെന്ന് ഫ്രഞ്ച് മാധ്യമങ്ങൾ റിപ്പോർട്ട് ചെയ്തു.
കരാർ പൂർത്തിയാക്കി ലിയോണൽ മെസിയും സെർജിയോ റാമോസും പി എസ് ജി വിട്ടതിന് പിന്നാലെ പുതിയ ക്ലബിലേക്ക് മാറാനുള്ള ഒരുക്കത്തിലായിരുന്നു നെയ്മർ.
സൂപ്പർ താരം കിലിയൻ എംബാപ്പേയുമായും ആരാധകരുമായും ഇടഞ്ഞുനിൽക്കുന്ന നെയ്മറെ സമ്മർ ട്രാൻസ്ഫർ ജാലകത്തിൽ ഒഴിവാക്കുകയാണെന്ന് പിഎസ്‌ജിയും വ്യക്തമാക്കിയിരുന്നു.
പ്രീമിയർ ലീഗ് ക്ലബുകളായ മാഞ്ചസ്റ്റർ യുണൈറ്റഡും ചെൽസിയും ന്യൂകാസിൽ യുണൈറ്റഡും സൗദി ക്ലബ് അൽ ഹിലാലും നെയ്മറിനായി രംഗത്ത് എത്തിയിരുന്നു.
ചാമ്പ്യന്‍സ് ലീഗ് വിജയിക്കാൻ നെയ്മറെപ്പോലെയൊരു പ്രതിഭാധനനായ താരം ടീമിൽ വേണമെന്ന് കരാർ ചർച്ചയ്ക്കിടെ എന്‍‌റിക്വെ പി എസ് ജി പ്രതിനിധികളോട് ആവശ്യപ്പെട്ടു.
ഈ സീസണില്‍ പരിക്കു മൂലം നെയ്മറിന് സീസണിലെ പകുതി മത്സരങ്ങളിലും പി എസ് ജിക്കായി കളിക്കാനായില്ല.പരിക്ക് ഭേദമായി നെയ്മര്‍ ഇതുവരെ കളത്തില്‍ തിരിച്ചെത്തിയിട്ടില്ല.
2014 മുതൽ 2017വരെ ബാഴ്സലോണയിൽ എന്‍‌റിക്വെയ്ക്ക് കീഴിൽ കളിച്ചിട്ടുള്ള താരമാണ് നെയ്മർ. ഇക്കാലളവിൽ മെസി-സുവാരസ്- നെയ്മർ (എംഎസ്എന്‍ ത്രയം) കൂട്ടുകെട്ടില്‍ എന്‍‌റിക്വെ ബാഴ്സക്ക് രണ്ട് ലാ ലിഗ കിരീടവും ഒരു ചാമ്പ്യൻസ് ലീഗ് കിരീടവും സമ്മാനിച്ചിരുന്നു.