നിസ്സാൻ ഇന്ത്യ 2025 ഏപ്രിൽ മുതൽ കാറുകളുടെ വില 3% വരെ വർദ്ധിപ്പിക്കും. വർദ്ധിച്ചുവരുന്ന ഉൽപ്പാദന ചിലവുകളാണ് ഇതിന് കാരണം. Magnite-ൻ്റെ കയറ്റുമതിയും പുതിയ SUV മോഡലുകളും ഉടൻ പുറത്തിറങ്ങും.
ജാപ്പനീസ് വാഹന ബ്രാൻഡായ നിസാൻ തങ്ങളുടെ ഉപഭോക്താക്കൾക്ക് വലിയൊരു ഷോക്ക് നൽകിയിരിക്കുകയാണ്. നിസാൻ ഇന്ത്യ 2025 ഏപ്രിൽ ഒന്നുമുതൽ കാറുകളുടെ വില മൂന്ന് ശതമാനം വരെ വർദ്ധിപ്പിക്കാൻ പോകുന്നു. നിങ്ങൾ ഒരു നിസാൻ കാർ വാങ്ങുന്നതിനെക്കുറിച്ച് ചിന്തിക്കുകയാണെങ്കിൽ ഇനി നിങ്ങൾ കൂടുതൽ പണം നൽകേണ്ടിവരും. അതിന്റെ വിശദാംശങ്ങൾ വിശദമായി അറിയാം.
വർദ്ധിച്ചുവരുന്ന ഇൻപുട്ട് ചെലവുകളും പ്രവർത്തന ചെലവുകളും കണക്കിലെടുത്താണ് ഈ തീരുമാനമെടുത്തതെന്ന് നിസ്സാൻ പറഞ്ഞു. കാറുകളുടെ നിർമ്മാണച്ചെലവ് നിരന്തരം വർദ്ധിച്ചുകൊണ്ടിരിക്കുന്നു, ഇത് പഴയ വിലയ്ക്ക് കാറുകൾ വിൽക്കുന്നത് കമ്പനിക്ക് ബുദ്ധിമുട്ടാക്കുന്നു. ഇക്കാരണത്താൽ, മാരുതി, ഹ്യുണ്ടായ്, കിയ, ടാറ്റ മോട്ടോഴ്‌സ് , മഹീന്ദ്ര, മെഴ്‌സിഡസ്, ബിഎംഡബ്ല്യു, റെനോ തുടങ്ങിയ നിരവധി ഓട്ടോമൊബൈൽ കമ്പനികളും 2025 ഏപ്രിൽ മുതൽ വില വർദ്ധിപ്പിക്കുമെന്ന് പ്രഖ്യാപിച്ചിട്ടുണ്ട്.
ഇന്ത്യയിൽ നിസാൻ നിലവിൽ മാഗ്നൈറ്റ്, എക്സ്-ട്രെയിൽ എന്നീ രണ്ട് മോഡലുകൾ വിൽക്കുന്നുണ്ട്. ഇപ്പോൾ ഈ രണ്ട് കാറുകൾക്കും പുതിയ വിലകൾ ബാധകമാകും. അതിനാൽ ഉപഭോക്താക്കൾക്ക് കൂടുതൽ പണം നൽകേണ്ടിവരും. എങ്കിലും, ഏത് മോഡലിന്റെ വില എത്ര വർദ്ധിക്കുമെന്ന് നിസാൻ വ്യക്തമാക്കിയിട്ടില്ല. വില വർധിപ്പിക്കുന്നതിനൊപ്പം, നിസ്സാൻ തങ്ങളുടെ കാർ നിര വിപുലീകരിക്കാനും ഒരുങ്ങുകയാണ് . ക്രെറ്റ, ട്രൈബർ എന്നിവയുമായി മത്സരിക്കാൻ കമ്പനി ഉടൻ തന്നെ രണ്ട് പുതിയ എസ്‌യുവികൾ ഇന്ത്യൻ വിപണിയിൽ അവതരിപ്പിക്കും. ഈ കാറുകളിലൊന്ന് ഈ വർഷം അവസാനത്തോടെ പുറത്തിറക്കുമെന്ന് പ്രതീക്ഷിക്കുന്നു.
അതേസമയം നിസാന്‍റെ ജനപ്രിയ മോഡലായ മാഗ്‍നൈറ്റിനെക്കുറിച്ച് പറയുകയാണെങ്കിൽ ഇന്ത്യൻ നിർമ്മിത മാഗ്നൈറ്റ് 65 രാജ്യങ്ങളിലേക്ക് കയറ്റുമതിക്ക് ഒരുങ്ങുകയാണ്. 2024 നിസാൻ മാഗ്നൈറ്റിൽ ചില സൗന്ദര്യവർദ്ധക മാറ്റങ്ങളും പുതിയ സവിശേഷതകളും കമ്പനി നൽകിയിട്ടുണ്ട്. പുതിയ മാഗ്നൈറ്റിന് നിരവധി ബാഹ്യ അപ്‌ഡേറ്റുകൾ ലഭിക്കുന്നു. അതിൽ പുതിയ ഗ്രിൽ ഡിസൈനുള്ള പുതിയ ഫ്രണ്ട്, പുതിയ എൽ ആകൃതിയിലുള്ള എൽഇഡി ഡിആർഎൽ, പുതിയ ബമ്പർ എന്നിവ ഉൾപ്പെടുന്നു. പുതിയ പിൻ ബമ്പർ, പുതുക്കിയ ടെയിൽലൈറ്റുകൾ, ഏഴ് സ്‌പോക്ക് ഡിസൈനിലുള്ള പുതിയ അലോയ് വീലുകൾ, പുതിയ എക്സ്റ്റീരിയർ പെയിന്റ് സ്‌കീമുകൾ എന്നിവ ഇതിലുണ്ട്. എസ്‌യുവിയുടെ ഇന്റീരിയറിലും നിറത്തിലും നിരവധി മാറ്റങ്ങൾ വന്നിട്ടുണ്ട്. അതേസമയം 1.0 ലിറ്റർ പെട്രോൾ എഞ്ചിൻ, ട്രാൻസ്‍മിഷൻ ഓപ്ഷനുകൾ പഴയ മോഡലിന് സമാനമായി തുടരുന്നു. നിസാൻ മാഗ്നൈറ്റിന്റെ അടിസ്ഥാന മോഡലിന്റെ എക്സ്-ഷോറൂം വില 6.14 ലക്ഷം രൂപയിൽ ആരംഭിച്ച് ഉയർന്ന മോഡലിന് 11.76 ലക്ഷം രൂപ വരെ ഉയരുന്നു. മാഗ്നൈറ്റ് ആകെ 30 വേരിയന്റുകളിൽ ലഭ്യമാണ്.