സീസണ്‍ മുഴുവന്‍ നഷ്ടമാവുമെന്ന് വ്യക്തമായതോടെയാണ് കൊല്‍ക്കത്ത മാലിക്കിന്‍റെ പകരക്കാരനെ പ്രഖ്യാപിച്ചത്.
കൊല്‍ക്കത്ത: ഐപിഎല്‍ തുടങ്ങാന്‍ ദിവസങ്ങൾ മാത്രം ബാക്കിയിരിക്കെ നിലവിലെ ചാമ്പ്യൻമാരായ കൊല്‍ക്കത്ത നൈറ്റ് റൈഡേഴ്സിന് തിരിച്ചടി. അതിവേഗ പേസര്‍ ഉമ്രാന്‍ മാലിക് പരിക്കേറ്റ് പിന്‍മാറിയതാണ് കൊല്‍ക്കത്തക്ക് തിരിച്ചടിയാത്. ഇതോടെ ഉമ്രാന്‍ മാലിക്കിന്‍റെ പകരക്കാരനായി മുന്‍ രാജസ്ഥാന്‍ റോയല്‍സ് താരം ചേതന്‍ സക്കരിയയെ കൊല്‍ക്കത്ത ടീമിലെത്തിച്ചു.
സ്ഥിരമായി 150 കിലോ മീറ്ററിലേറെ വേഗത്തിലെറിഞ്ഞ് അതിവേഗം കൊണ്ട് ഐപിഎല്ലില്‍ തരംഗം തീര്‍ത്തെങ്കിലും പിന്നീട് പ്രതീക്ഷക്കൊത്ത് ഉയരാന്‍ കഴിയാതിരുന്ന ഉമ്രാന്‍ മാലിക്കിനെ സണ്‍റൈസേഴ്സ് ഹൈദരാബാദ് കൈവിട്ടിരുന്നു. തുടര്‍ന്നാണ് ഐപിഎല്‍ മെഗാ താരലേലത്തില്‍ 75 ലക്ഷം രൂപക്ക് കൊല്‍ക്കത്ത ഉമ്രാന്‍ മാലിക്കിനെ ടീമിലെത്തിച്ചത്. ദക്ഷിണാഫ്രിക്കന്‍ പേസര്‍ ആന്‍റിച്ച് നോര്‍ക്യയ്ക്കൊപ്പം മാലിക് കൊല്‍ക്കത്തയുടെ ബൗളിംഗ് കുന്തമുനയാകുമെന്ന് പ്രതീക്ഷിച്ചിരിക്കെയാണ് പരിക്ക് വില്ലനായത്.
ഇതോടെ സീസണ്‍ മുഴുവന്‍ നഷ്ടമാവുമെന്ന് വ്യക്തമായതോടെയാണ് കൊല്‍ക്കത്ത മാലിക്കിന്‍റെ പകരക്കാരനെ പ്രഖ്യാപിച്ചത്. മാലിക്കിന് പകരമെത്തുന്ന ചേതന്‍ സക്കരിയ ഇന്ത്യക്കായി ഒരു ഏകദിനത്തിലും രണ്ട് ടി20 മത്സരങ്ങളിലും കളിച്ചിട്ടുണ്ട്. ഐപിഎല്ലില്‍ 19 മത്സരങ്ങള്‍ കളിച്ചിട്ടുള്ള ചേതന്‍ സക്കരിയ 20 വിക്കറ്റുകള്‍ നേടിയിട്ടുണ്ട്. ക്യാപ്റ്റന്‍ ശ്രേയസ് അയ്യര്‍ പഞ്ചാബ് കിംഗ്സിലേക്ക് പോയതോടെ പുതിയ നായകന്‍ അജിങ്ക്യാ രഹാനെക്ക് കീഴിലാണ് ഇത്തവണ കൊല്‍ക്കത്ത ഇറങ്ങുന്നത്.
ഐപിഎൽ ലേലത്തില്‍ ആരും ടീമിലെടുത്തില്ല, പിന്നാലെ രഞ്ജിയില്‍ മിന്നി; ഇന്ത്യൻ ഓൾ റൗണ്ടറെ റാഞ്ചി ലക്നൗ
കഴിഞ്ഞ തവണ കൊല്‍ക്കത്തയെ ചാമ്പ്യൻമാരാക്കുന്നതില്‍ നിര്‍ണായക പങ്കുവഹിച്ച ഓസ്ട്രേലിയന്‍ പേസര്‍ മിച്ചല്‍ സ്റ്റാര്‍ക്കും ഇത്തവണ ടീമിനൊപ്പമില്ല. ഹര്‍ഷിത് റാണയായിരിക്കും ആന്‍റിച്ച് നോര്‍ക്യക്കൊപ്പം ന്യൂബോൾ പങ്കിടുക എന്നാണ് സൂചന. നോര്‍ക്യയയും പരിക്കിന്‍റെ പിടിയില്‍ നിന്ന് മുക്തനായി അടുത്തിടെ തിരിച്ചതെയുള്ളു. ഐപിഎല്ലില്‍ ഈ മാസം 22ന് റോയല്‍ ചലഞ്ചേഴ്സ് ബെംഗളൂരുവിനെതിരെ ആണ് കൊല്‍ക്കത്തയുടെ ആദ്യ മത്സരം.
ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക