☰
10 ലക്ഷം രൂപയിൽ താഴെ വാർഷിക വരുമാനമുള്ളവർക്കായി, മികച്ച റേഞ്ചും താങ്ങാവുന്ന വിലയുമുള്ള 5 ഇലക്ട്രിക് കാറുകൾ ഇതാ. ടാറ്റ ടിയാഗോ ഇവി, എംജി കോമറ്റ് ഇവി തുടങ്ങിയവ ഈ ലിസ്റ്റിൽ ഉൾപ്പെടുന്നു.
സമീപഭാവിയിൽ ഇലക്ട്രിക് കാറുകളുടെ വില സാധാരണ പെട്രോൾ കാറുകൾക്ക് തുല്യമാകുമെന്നും അത്തരമൊരു സാഹചര്യത്തിൽ ആളുകൾക്ക് ഇലക്ട്രിക് കാറുകൾ വാങ്ങുന്നത് എളുപ്പമാകും എന്നുമാണ് കേന്ദ്രമന്ത്രി നിതിൻ ഗഡ്‍കരി അടുത്തിടെ പറഞ്ഞത്. പെട്രോൾ-ഡീസൽ അല്ലെങ്കിൽ സിഎൻജി കാറുകളേക്കാൾ ഇലക്ട്രിക് വാഹനങ്ങളുടെ വില നിലവിൽ കൂടുതലായതിനാൽ, വലിയൊരു വിഭാഗം ആളുകൾ കാത്തിരിക്കുകയാണ്. ഇന്ത്യയിൽ കോടിക്കണക്കിന് താഴ്ന്ന വരുമാനക്കാരുണ്ട്. അവരിൽ പലരുടെയും വാർഷിക വരുമാനം കഷ്‍ടിച്ച് 10 ലക്ഷം രൂപ മാത്രമായിരിക്കും. 10 ലക്ഷം രൂപ വരെ വാർഷിക വരുമാനമുള്ള ആളുകൾ ഒരു ഇലക്ട്രിക് കാർ വാങ്ങുന്നതിനെക്കുറിച്ച് ചിന്തിക്കുകയാണെങ്കിൽ മികച്ച റേഞ്ചും താങ്ങാവുന്ന വിലയുമുള്ള അഞ്ച് കാറുകളെക്കുറിച്ച് അറിയാം.
ടാറ്റ ടിയാഗോ ഇവി
ഇന്ത്യയിലെ ഏറ്റവും വിലകുറഞ്ഞ രണ്ടാമത്തെ ഇലക്ട്രിക് കാറാണ് ടാറ്റ ടിയാഗോ ഇവി. എക്സ്-ഷോറൂം വില 7.99 ലക്ഷം രൂപയിൽ ആരംഭിച്ച് 11.14 ലക്ഷം രൂപ വരെ ഉയരും. ഈ 5 സീറ്റർ ഇലക്ട്രിക് ഹാച്ച്ബാക്കിൽ 24 kWh ബാറ്ററിയാണ് സജ്ജീകരിച്ചിരിക്കുന്നത്, ഒറ്റ ഫുൾ ചാർജിൽ 315 കിലോമീറ്റർ വരെ സഞ്ചരിക്കാൻ ഇതിന് കഴിയും
എംജി കോമറ്റ് ഇവി
ഇലക്ട്രിക് കാർ വാങ്ങുന്നവർക്ക് ഏറ്റവും വിലകുറഞ്ഞ ഓപ്ഷൻ എംജി കോമറ്റ് ഇവി ആണ്. ഇതിന്റെ എക്സ്-ഷോറൂം വില 7 ലക്ഷം രൂപയിൽ ആരംഭിച്ച് 9.84 ലക്ഷം രൂപ വരെ ഉയരുന്നു. കോമറ്റ് ഇവിയിൽ 17.3 kWh ബാറ്ററിയാണ് സജ്ജീകരിച്ചിരിക്കുന്നത്, ഒറ്റ ചാർജിൽ 230 കിലോമീറ്റർ വരെ സഞ്ചരിക്കാൻ ഇതിന് കഴിയും. ഈ നാല് സീറ്റർ ഇലക്ട്രിക് ഹാച്ച്ബാക്ക് 0 മുതൽ 100 ശതമാനം വരെ ചാർജ് ചെയ്യാൻ 7 മണിക്കൂർ എടുക്കും. ബാറ്ററി വാടക സേവനത്തോടെ എംജി കോമറ്റ് ഇവിയുടെ വില വെറും അഞ്ച് ലക്ഷം രൂപയിൽ ആരംഭിക്കുന്നു.
ടാറ്റ പഞ്ച് ഇവി
ടാറ്റ പഞ്ച് ഇവി താങ്ങാനാവുന്നതും മികച്ച സുരക്ഷയുള്ളതുമായ ഒരു കോംപാക്റ്റ് ഇലക്ട്രിക് എസ്‌യുവിയാണ്. 9.99 ലക്ഷം രൂപയിൽ ആരംഭിച്ച് 14.44 ലക്ഷം രൂപ വരെ എക്സ്-ഷോറൂം വിലയുണ്ട്. ഈ ഇലക്ട്രിക് കാറിൽ 35 kWh വരെ ബാറ്ററിയുണ്ട്, ഒറ്റ ചാർജിൽ 421 കിലോമീറ്റർ വരെ സഞ്ചരിക്കാൻ കഴിയും.
എംജി വിൻഡ്‌സർ ഇവി
ഇന്ത്യയിൽ ഇന്ന് ഏറ്റവും കൂടുതൽ വിറ്റഴിക്കപ്പെടുന്ന ഇലക്ട്രിക് കാറാണ് എംജി വിൻഡ്‌സർ ഇവി, ഇതിന്റെ എക്സ്-ഷോറൂം വില 14 ലക്ഷം രൂപ മുതൽ 16 ലക്ഷം രൂപ വരെ ഉയരും. ഈ സവിശേഷതകളോടെ പ്രവർത്തിക്കുന്ന ഇലക്ട്രിക് ക്രോസ്ഓവർ യുവിയിൽ 38 kWh ബാറ്ററിയാണ് ഉപയോഗിക്കുന്നത്. ഇത് പൂർണ്ണമായി ചാർജ് ചെയ്താൽ 332 കിലോമീറ്റർ വരെ സഞ്ചരിക്കാൻ കഴിയും.
ടാറ്റ നെക്സോൺ ഇവി
ടാറ്റ നെക്സോൺ ഇവിയുടെ നിലവിലെ എക്സ്-ഷോറൂം വില 12.49 ലക്ഷം മുതൽ 17.19 ലക്ഷം രൂപ വരെയാണ്. ഈ കോംപാക്റ്റ് എസ്‌യുവിയിൽ 46.08 kWh ബാറ്ററിയാണ് സജ്ജീകരിച്ചിരിക്കുന്നത്. ഒറ്റ ചാർജിൽ 489 കിലോമീറ്റർ വരെ സഞ്ചരിക്കാൻ ഇതിന് കഴിയും. നെക്സോൺ ഇവി കാഴ്ചയിലും സവിശേഷതകളിലും മികച്ചതാണ്.
