ബ്രെസ്റ്റ് ക്യാൻസർ

ബ്രെസ്റ്റ് ക്യാൻസർ ; സ്തനങ്ങളില്‍ സ്വയം പരിശോധന നടത്തേണ്ടത് എങ്ങനെയാണ്? 

സ്തനാർബുദം ബാധിക്കുന്ന യുവതികളുടെ എണ്ണം ദിനംപ്രതി കൂടിവരികയാണ്. രാജ്യത്ത് 28.2 ശതമാനം സ്ത്രീകൾക്ക് സ്തനാർബുദമുണ്ടെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് വ്യക്തമാക്കുന്നു. 
 

2020-ൽ രാജ്യത്ത് 178,000-ലധികം പുതിയ കേസുകളുടെ വർദ്ധനവ് ഉണ്ടായതായി പഠനങ്ങൾ പറയുന്നു. നഗരങ്ങളിൽ താമസിക്കുന്ന സ്ത്രീകളിലാണ് സ്തനാർബുദം കൂടുതലായി കാണുന്നതെന്ന് വിദ​ഗ്ധർ പറയുന്നു.
 

തുടക്കത്തിൽ കാണുന്ന ചില ലക്ഷണങ്ങൾ തിരിച്ചറിഞ്ഞാൽ രോ​ഗം നേരത്തെ ഭേദമാക്കാനാകുമെന്ന് പഠനങ്ങൾ പറയുന്നു. സ്വയം പരിശോധന നടത്തുന്നത് സ്തനാർബുദം നേരത്തെ കണ്ടെത്തുന്നതിന് സഹായിക്കുന്നു. 

സ്തനത്തിൽ കാണുന്ന മുഴയെ നിസാരമായി കാണരുത്. സ്തനത്തിന് ചുറ്റുമുള്ള ചർമ്മം വലിഞ്ഞു മുറുകിയേക്കാം, ഇത് മങ്ങിയ രൂപത്തിലേക്ക് നയിച്ചേക്കാം.

സ്തനം/കക്ഷത്തിൽ മുഴകൾ കണ്ടാൽ അവ​ഗണിക്കരുത്.  എല്ലാ മുഴകളുംക്യാൻസർ അല്ല. ആകൃതിയില്ലാത്തതോ വേദനാജനകമായതോ വേദനയില്ലാത്തതോ ആയ കട്ടിയുള്ള മുഴ കണ്ടാൽ ഉടനെ ഡോക്ടറെ കാണു​ക. 
 

 മുലക്കണ്ണുകളിൽ നിന്ന് അസാധാരണമായ ഡിസ്ചാർജ് ഉണ്ടാവുന്നതാണ് മറ്റൊരു ലക്ഷണം.

എല്ലാ ആര്‍ത്തവത്തിനും ശേഷം സ്തനങ്ങള്‍ സൂക്ഷ്മമായി സ്വയം പരിശോധിക്കുക. ഒരു കണ്ണാടിയുടെ സഹായത്തോടെ സ്തനങ്ങളെ നോട്ടത്തിലൂടെ പരിശോധിക്കാം.
 

ആകൃതി, വലിപ്പം എന്നിവയില്‍ എന്തെങ്കിലും വ്യത്യാസമോ, അസാധാരണത്വമോ ഉണ്ടോയെന്നാണ് നോട്ടത്തില്‍ പരിശോധിക്കേണ്ടത്. 
 

മുലക്കണ്ണുകളില്‍ നിന്ന് എന്തെങ്കിലും ദ്രാവകമോ നീരോ പുറത്തുവരുന്നുണ്ടോ എന്നത് ശ്രദ്ധിക്കുക. മുലയൂട്ടുന്ന സ്ത്രീകളല്ലെങ്കില്‍ ഇക്കാര്യം ഗൗരവമായി എടുക്കണം. 
 

സ്ത്രീകള്‍ ആറ് മാസത്തിലൊരിക്കലോ, വര്‍ഷത്തിലൊരിക്കലെങ്കിലും സ്തനാര്‍ബുദമില്ലെന്ന് മെഡിക്കല്‍ പരിശോധനയിലൂടെ ഉറപ്പ് വരുത്തുന്നതാണ് ഉചിതം.