പിറന്നാൾ ദിനത്തിൽ ഒറ്റയ്ക്ക് കേക്ക് മുറിച്ച് യുവാവ്; റസ്റ്റോറന്‍റ് ജീവനക്കാരുടെ സർപ്രൈസിന് വന്‍ കൈയടി
റസ്റ്റോറന്‍റിൽ എത്തിയ അദ്ദേഹം ഒരു ചോക്ലേറ്റ് പേസ്ട്രി ഓർഡർ ചെയ്യുകയും തനിക്ക് വേണ്ടപ്പെട്ട ഏതാനും ആളുകളെ വീഡിയോ കോൾ ചെയ്യുകയും ചെയ്യുന്നു.
 )
Follow
സമൂഹ മാധ്യമങ്ങളില്‍ നെഗറ്റീവ് വീഡിയോകൾ വ്യാപകമായ പ്രചരിക്കാറുണ്ടെങ്കിലും അതോടൊപ്പം തന്നെ ഹൃദയസ്പർശിയായ മുഹൂർത്തങ്ങൾ പങ്കുവയ്ക്കുന്ന വീഡിയോകളും ലോകത്തിന്‍റെ വിവിധ ഭാഗങ്ങളിൽ നിന്നും സമൂഹ മധ്യമങ്ങളില്‍ ഇടം പിടിക്കാറുണ്ട്. അത്തരത്തിൽ ഒരു വീഡിയോ കഴിഞ്ഞ ദിവസം സമൂഹ മാധ്യമ ഉപയോക്താക്കൾക്ക് പുഞ്ചിരി സമ്മാനിച്ചുകൊണ്ട് തരംഗമായി. വിദേശ രാജ്യത്തെത്തിയ ഒരു ചെറുപ്പക്കാരൻ സുഹൃത്തുക്കളോ വേണ്ടപ്പെട്ടവരെ ഇല്ലാതെ ഒരു റസ്റ്റോറന്‍റില്‍ ഒറ്റയ്ക്ക് സ്വന്തം പിറന്നാൾ കേക്ക് മുറിക്കുന്നതും തുടർന്ന് നടന്ന ഹൃദയസ്പർശിയായ രംഗങ്ങളുമാണ് വീഡിയോയിൽ ഉള്ളത്. വളരെ വേഗത്തിൽ സമൂഹ മാധ്യമങ്ങളില്‍ വൈറലായ ഈ വീഡിയോ ഇതിനോടകം ലക്ഷക്കണക്കിന് കാഴ്ചക്കാരെയാണ് നേടിയത്.
പുതിയൊരു നഗരത്തിൽ തനിച്ചാകുന്നതും തങ്ങളുടെ സന്തോഷങ്ങൾ പങ്കുവയ്ക്കാൻ ആരുമില്ലാതെ വിഷമിക്കുന്നതും ഒക്കെ ചിലരുടെയെങ്കിലും ജീവിതത്തിൽ സംഭവിച്ചിട്ടുണ്ടാകാം. അത്തരത്തിൽ ഒരു കാഴ്ചയാണ് ഈ വീഡിയോയിലും ഉള്ളത്. സമൂഹ മാധ്യമ പോസ്റ്റ് പ്രകാരം ആൻഡ്രൂവേവ് എന്ന യുവാവ് ഒരു റസ്റ്റോറന്‍റിൽ ഭക്ഷണം കഴിക്കാനായി എത്തുന്നിടത്താണ് വീഡിയോ ആരംഭിക്കുന്നത്. റസ്റ്റോറന്‍റിൽ എത്തിയ അദ്ദേഹം ഒരു ചോക്ലേറ്റ് പേസ്ട്രി ഓർഡർ ചെയ്യുകയും തനിക്ക് വേണ്ടപ്പെട്ട ഏതാനും ആളുകളെ വീഡിയോ കോൾ ചെയ്യുകയും ചെയ്യുന്നു.
തുടർന്ന് ആ യുവാവ് ചെറിയൊരു മെഴുകുതിരി പേസ്ട്രിയുടെ മുകളിൽ കത്തിച്ചുവെച്ച് അതു മുറിച്ച് തന്‍റെ ജന്മദിനം ആഘോഷിക്കുന്നു. തുടർന്ന് വീഡിയോ കോൾ അവസാനിക്കുന്നതോടെ അദ്ദേഹത്തിന് മുഖം ദുഃഖപൂരിതമാകുന്നതും വീഡിയോയിൽ കാണാം. എന്നാൽ ഈ രംഗങ്ങൾ എല്ലാം റസ്റ്റോറന്‍റിലെ 3 ജീവനക്കാർ കാണുന്നുണ്ടായിരുന്നു. തുടർന്ന് അവർ ഒരു വലിയ ബർത്ത് ഡേ കേക്ക് യുവാവിന് സമ്മാനിച്ച് കൊണ്ട് ജന്മദിനാശംസകൾ നേരുന്നിടത്താണ് വീഡിയോ അവസാനിക്കുന്നത്. അമ്പരന്ന് പോയ ആ യുവാവ് സന്തോഷത്തോടെ അവരെ കെട്ടിപ്പിടിക്കുന്നതും വീഡിയോയിൽ കാണാം. "നിങ്ങളുടെ കുടുംബം അടുത്തില്ലെങ്കിലും, നിങ്ങളെ പിന്തുണയ്ക്കുന്ന ചിലരെങ്കിലും എപ്പോഴും ഉണ്ടായിരിക്കും" എന്ന കുറിപ്പോടെ പങ്കുവെച്ച് ഈ വീഡിയോയ്ക്ക് സമൂഹ മാധ്യമങ്ങളില്‍ വലിയ കയ്യടിയാണ് ലഭിക്കുന്നത്.
"ബർത്ത്ഡേ പ്ലസ് വൺ" അവധി നയം പ്രഖ്യാപിച്ച് ഇന്ത്യന്‍ കമ്പനി; അഭിനന്ദിച്ച് സോഷ്യല്‍ മീഡിയ
