ആഹാ അന്തസ്സ്! 76 ദിവസം, 16 രാജ്യങ്ങൾ, 73 വർഷം പഴക്കമുള്ള കാർ, ഗുജറാത്തിൽ നിന്ന് ലണ്ടനിലേക്കൊരു റോഡ് ട്രിപ്പ്
76 ദിവസങ്ങൾ കൊണ്ടാണ് ഗുജറാത്തിൽ നിന്ന് ലണ്ടനിലേക്ക് റോഡ് മാർഗ്ഗം ഇവർ എത്തിയത്. 13,500 കിലോമീറ്ററിലധികം നീണ്ട സഞ്ചാരപാതയിൽ 16 രാജ്യങ്ങൾ ഇവർ പിന്നിട്ടു.
 )
Followആരും കൊതിക്കുന്ന ഒരു യാത്ര നടത്തിയതിന്റെ നിർവൃതിയിലാണ് ഗുജറാത്തിലെ ഒരു കുടുംബം. 73 വർഷം പഴക്കമുള്ള തങ്ങളുടെ കുടുംബസ്വത്തായ പ്രിയപ്പെട്ട കാറിൽ കുടുംബത്തിലെ മൂന്നു തലമുറകളിൽ പെട്ടവർ ചേർന്ന് നടത്തിയ ഒരു അവിസ്മരണീയമായ യാത്രയുടെ കഥയാണിത്. 1950 -ൽ നിർമ്മിച്ച ഇംഗ്ലീഷ് നിർമ്മിത വിൻ്റേജ് കാറിൽ ഇന്ത്യയിൽ നിന്ന് യുകെയിലേക്ക് യാത്രചെയ്തത് ഗുജറാത്തിലെ താക്കൂർ കുടുംബം ആണ്.
കുടുംബത്തിലെ വിശ്വസ്ത അംഗമായി താക്കൂർ കുടുംബാംഗങ്ങൾ കാണുന്ന അവരുടെ പ്രിയപ്പെട്ട ചുവന്ന നിറമുള്ള MG YT കാറിലായിരുന്നു ഈ അവിസ്മരണീയമായ യാത്ര. ലാൽ പാരി അഥവാ റെഡ് എയ്ഞ്ചൽ എന്നാണ് ഈ കാറിന് ഇവർ നൽകിയിരിക്കുന്ന പേര്. 76 ദിവസങ്ങൾ കൊണ്ടാണ് ഗുജറാത്തിൽ നിന്ന് ലണ്ടനിലേക്ക് റോഡ് മാർഗ്ഗം ഇവർ എത്തിയത്. 13,500 കിലോമീറ്ററിലധികം നീണ്ട സഞ്ചാരപാതയിൽ 16 രാജ്യങ്ങൾ ഇവർ പിന്നിട്ടു. 75 -കാരനായ ദേവൽ താക്കൂർ, അദ്ദേഹത്തിൻറെ മകൻ ദമൻ താക്കൂർ, കൊച്ചുമകൾ 21 -കാരിയായ ദേവാൻഷി താക്കൂർ എന്നിവർ ചേർന്നാണ് ഈ അഭിമാനയാത്ര നടത്തിയത്.
2023 ഓഗസ്റ്റ് 12 -നാണ് താക്കൂർ കുടുംബം ഗുജറാത്തിലെ അഹമ്മദാബാദിൽ നിന്ന് യാത്ര ആരംഭിച്ചത്. തുടർന്ന് ഓഗസ്റ്റ് 15 -ന് അവർ മുംബൈയിൽ നിന്നും ദുബായിലേക്ക് സഞ്ചരിച്ചത് കടൽ മാർഗ്ഗമാണ്. ഓഗസ്റ്റ് 28 -നാണ് ഇവർ ദുബായിലെത്തിയത്. ദുബായിൽ നിന്നാണ് കാർ ഇറാനിലേക്ക് കയറ്റി അയച്ചത്. ഇറാനിൽ നിന്ന്, അവർ അസർബൈജാൻ, അൽബേനിയ, ജർമ്മനി, ഫ്രാൻസ് തുടങ്ങിയ രാജ്യങ്ങളിലൂടെ സഞ്ചരിച്ച് ഒക്ടോബർ 26 -ന് യുകെയിൽ എത്തി.
ഇവരുടെ യാത്ര കഴിഞ്ഞ വർഷം അവസാനിച്ചെങ്കിലും ഇപ്പോൾ സോഷ്യൽ മീഡിയയിൽ തങ്ങളുടെ യാത്രാവിശേഷങ്ങൾ ഇവർ പങ്കുവെച്ചതോടെയാണ് സോഷ്യൽ മീഡിയയിൽ ഈ യാത്ര വൈറലായത്. ഇവർ പങ്കുവെച്ച വീഡിയോ നിരവധി ആളുകളാണ് ഇതിനോടകം കണ്ടു കഴിഞ്ഞത്. രണ്ടുവർഷം നീണ്ട തയ്യാറെടുപ്പുകൾക്ക് ശേഷമായിരുന്നു ഈ അവിസ്മരണീയമായ യാത്ര താക്കൂർ കുടുംബം നടത്തിയത്.
