'എ' സര്‍ട്ടിഫിക്കറ്റ്, 3.21 മണിക്കൂര്‍ ദൈര്‍ഘ്യം; ബോളിവുഡില്‍ നിന്ന് ഞെട്ടിക്കാന്‍ 'അനിമല്‍': ട്രെയ്ലര്
ആക്ഷന്‍ ത്രില്ലര്‍ വിഭാഗത്തില്‍ പെടുന്ന ചിത്രം
 )
Followബോളിവുഡില്‍ നിന്നുള്ള അപ്കമിംഗ് റിലീസുകളില്‍ പ്രേക്ഷകരില്‍ ഏറ്റവുമധികം കാത്തിരിപ്പ് ഉയര്‍ത്തിയിട്ടുള്ള ഒന്നാണ് രണ്‍ബീര്‍ കപൂര്‍ നായകനാവുന്ന അനിമല്‍. ട്രെന്‍ഡ് സെറ്റര്‍ ആയിരുന്ന അര്‍ജുന്‍ റെഡ്ഡിയും അതിന്‍റെ ഹിന്ദി റീമേക്ക് ആയിരുന്ന കബീര്‍ സിംഗും ഒരുക്കിയ സന്ദീപ് റെഡ്ഡി വാംഗ സംവിധാനം ചെയ്യുന്ന ചിത്രം എന്നതാണ് ഈ പ്രോജക്റ്റിന് ഹൈപ്പ് ഉയര്‍ത്തിയത്. രശ്മിക മന്ദാനയാണ് നായിക എന്നതാണ് മറ്റൊരു ശ്രദ്ധേയ കാര്യം. ഇതിനകം സെന്‍സറിംഗ് പൂര്‍ത്തിയായ ചിത്രത്തിന് എ സര്‍ട്ടിഫിക്കറ്റ് ആണ് ലഭിച്ചിരിക്കുന്നത്. 3.21 മണിക്കൂര്‍ എന്ന വലിയ ദൈര്‍ഘ്യത്തിലാണ് ചിത്രം എത്തുന്നത്. അതേസമയം ചിത്രത്തിന്‍റെ ട്രെയ്ലര് അണിയറക്കാര്‍ പുറത്തുവിട്ടു.
ആക്ഷന്‍ ത്രില്ലര്‍ വിഭാഗത്തില്‍ പെടുന്ന ചിത്രമാണിത്. 3.32 മിനിറ്റ് ദൈര്‍ഘ്യമുള്ള ട്രെയ്ലര് ആണ് പുറത്തെത്തിയിരിക്കുന്നത്. ചടുലമായ ആക്ഷന്‍ രംഗങ്ങള്‍ക്കൊപ്പം വൈകാരികതയ്ക്കും പ്രാധാന്യമുള്ള ചിത്രമായിരിക്കും ഇതെന്നാണ് ട്രെയ്ലര് നല്‍കുന്ന സൂചന. അനില്‍ കപൂര്‍, ബോബി ഡിയോള്‍, തൃപ്തി ഡിംറി, ശക്തി കപൂര്‍ തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. സംവിധാനത്തിനൊപ്പം രചനയും എഡിറ്റിംഗും സന്ദീപ് റെഡ്ഡി വാംഗ തന്നെയാണ് നിര്‍വ്വഹിച്ചിരിക്കുന്നത്. ഭൂഷണ്‍ കുമാര്‍, പ്രണയ് റെഡ്ഡി വാംഗ, മുരാദ് ഖേതേനി, ക്രിഷന്‍ കുമാര്‍ എന്നിവര്‍ ചേര്‍ന്നാണ് നിര്‍മ്മാണം. സംവിധായകനൊപ്പം പ്രണയ് റെഡ്ഡി വാംഗയും സുരേഷ് ബണ്ഡാരുവും എഴുത്തില്‍ സഹകരിച്ചിട്ടുണ്ട്. സംഭാഷണം സൗരഭ് ഗുപ്ത, ഛായാഗ്രഹണം അമിത് റോയ്, ആക്ഷന്‍ സുപ്രീം സുന്ദര്‍. ഹിന്ദിക്കൊപ്പം തെലുങ്ക്, കന്നഡ, തമിഴ്, മലയാളം ഭാഷകളിലും തിയറ്ററുകളില്‍ എത്തും. ഡിസംബര്‍ 1 ന് ആണ് റിലീസ്.
ALSO READ : സിനിമാ ചിത്രീകരണത്തിനിടെ നടന്‍ സൂര്യയ്ക്ക് പരിക്ക്
