ജിയോയെ വെല്ലുവിളിക്കുന്ന മറ്റ് ഓഫറുകള്‍ ഇതാണ്.!
Followജിയോ എത്തിയതോടെ രാജ്യത്തെ ടെലികോം ഓപ്പറേറ്റര്‍മാര്‍ അവരുടെ ഉപയോക്താക്കളെ പരിഗണിക്കുന്ന രീതി തന്നെ മാറി എന്നത് ഒരു സത്യമാണ്. ഇതുവരെ മസില്‍ പിടിച്ചിരുന്ന ടെലികോം കമ്പനികള്‍ എത്ര ജിബിവരെയും തരാം എന്നാണ് ഇപ്പോള്‍ പറയുന്നത്. ഏതാണ്ട് ആറുമാസത്തിന് ശേഷം ഫ്രീ ഓഫറുകള്‍ അവസാനിപ്പിച്ച ജിയോ ഇപ്പോള്‍ പ്രൈം ഓഫറിലാണ് ഓടുന്നത്. 99 രൂപയുടെ പ്രൈം മെംബർഷിപ്പും 303 രൂപയുടെ പ്രതിമാസ വരിസംഖ്യയുമാണ് ജിയോയുടെ പ്ലാൻ. സമ്മർ സർപ്രൈസ് ഓഫറിലൂടെ 303 രൂപയ്ക്ക് റീചാർജ് ചെയ്താൽ പ്രതിദിനം ഒരു ജിബി ഡാറ്റാ വച്ച് മൂന്നു മാസത്തേക്ക് സൗജന്യമായിരിക്കും. ഒപ്പം രാജ്യത്തെവിടെയും സൗജന്യമായി വിളിക്കാനും മെസേജുകൾ അയയ്ക്കാനും കഴിയും.
സമ്മർ സർപ്രൈസ് ഓഫർ മാറ്റിനിർത്തിയാൽ പ്രതിദിനം ഒരു ജിബി ഡാറ്റ ഉപയോഗിക്കാൻ 10 രൂപ മാത്രമേ ചെലവാകുന്നുള്ളൂ എന്നതാണ് ജിയോയുടെ പ്രധാനപ്രത്യേകത. ഇതോടെ കടുത്ത സമ്മര്‍ദ്ദത്തിലായ മറ്റു കമ്പനികളും ഓഫറുകള്‍ പ്രഖ്യാപിച്ചിട്ടുണ്ട്. എന്താണ് മറ്റ് കമ്പനികള്‍ ജിയോയുടെ മുന്നേറ്റം തടുക്കാന്‍ നല്‍കിയിരിക്കുന്ന ഓഫറുകള്‍ നോക്കാം.
വോഡഫോൺ
346 രൂപയുടെ റീചാർജിൽ 28 ദിവസം കാലാവധിയിൽ 28 ജിബി ഡാറ്റയാണ് വോഡഫോൺ വച്ചുനീട്ടുന്നത്. ഇതിന്‍റെ ഉപയോഗപരിധി പ്രതിദിനം ഒരു ജിബിയാക്കി നിജപ്പെടുത്താനും വോഡഫോണിനു പദ്ധതിയുണ്ട്. പ്രതിദിന ഉപയോഗം ഒരു ജിബിയിൽ കവിഞ്ഞാൽ ഉപയോക്താക്കളിൽനിന്ന് ചാർജ് ഈടാക്കും.
പോസ്റ്റ് പെയ്ഡ് വരിക്കാർക്കായി വോഡഫോൺ ഡിലൈറ്റ്സ് എന്ന പ്ലാനും ആവിഷ്കരിച്ചിട്ടുണ്ട്. മൂന്നു മാസം കാലാവധിയിൽ 24 ജിബി ഡാറ്റയാണ് ഇതുവഴി ലഭിക്കുക. അതായത് മാസം എട്ടു ജിബി ഡാറ്റ ഉപയോഗിക്കാം.
എ‍യർടെൽ
345 രൂപയ്ക്ക് പ്രതിദിനം ഒരു ജിബി 4ജി ഡാറ്റയോടൊപ്പം സൗജന്യ ലോക്കൽ, എസ്ടിഡി കോളുകൾ. പകൽ 500 എംബി ഡാറ്റയും രാത്രിയിൽ 500 എംബി ഡാറ്റയുമാണു നല്കുന്നത്.
കൂടാതെ പരിധിയില്ലാതെ സൗജന്യ ലോക്കൽ, എസ്ടിഡി കോളുകളും ലഭിക്കും. ഡാറ്റയ്ക്കും സൗജന്യ മിനിറ്റുകൾക്കുമുള്ള കാലാവധി 28 ദിവസം.
ബിഎസ്എൻഎൽ
ജിയോയുടെ കുതിപ്പിനെ പ്രതിരോധിക്കാൻ മികച്ച ഓഫർ പ്രഖ്യാപിച്ചത് ബിഎസ്എൻഎലാണ്. പ്രതിദിനം രണ്ടു ജിബി 3ജി ഡാറ്റയാണ് ബിഎസ്എൻഎൽ വരിക്കാർക്കു വച്ചുനീട്ടുന്നത്. 339 രൂപയ്ക്ക് റീചാർജ് ചെയ്താൽ പ്രതിദിനം രണ്ടു ജിബി വച്ച് 56 ജിബി ഡാറ്റ 28 ദിവസം കാലാവധിയിൽ ലഭിക്കും. ഇതിനൊപ്പം ബിഎസ്എൻഎൽ നെറ്റ്‌വർക്കിലേക്ക് പരിധിയില്ലാതെ വിളിക്കാനും സാധിക്കും.
ഇതുകൂടാതെ പ്രതിദിനം 10 ജിബി ഡാറ്റ വാഗ്ദാനം ചെയ്യുന്ന 249 രൂപയുടെ ഓഫറും ബിഎസ്എൻഎൽ ആവിഷ്കരിച്ചിട്ടുണ്ട്. പക്ഷേ, വയർലൈൻ ബ്രോഡ്ബാൻഡുകൾക്കാണ് ഇത് ലഭിക്കുക. ഇതിനൊപ്പം ഉപയോക്താക്കൾക്ക് ഞായറാഴ്ചകളിലും പ്രതിദിനം രാത്രി ഒന്പത് മുതൽ രാവിലെ ഏഴു വരെയും പരിധിയില്ലാതെ സൗജന്യ കോളുകൾ വിളിക്കാം.
ഐഡിയ സെല്ലുലാർ
348 രൂപയ്ക്ക് പ്രതിദിനം ഒരു ജിബി 4ജി ഡാറ്റ ഐഡിയ നല്കുന്നു. 4ജിയുള്ള സ്മാർട്ട്ഫോണുള്ളവർക്കു മാത്രമാണ് ഈ ഓഫർ ലഭിക്കുക. എല്ലാ നെറ്റ്‌വർക്കുകളിലേക്കും സൗജന്യ കോളുകളും ഈ പായ്ക്ക് നല്കുന്നുണ്ട്. വിളിക്കുന്നതിനൊപ്പം 50 എംബി ഡാറ്റയും ലഭിക്കും. നേരത്തെ ദിവസം 500 എംബി ഡാറ്റയായിരുന്നു ഐഡിയ ഒരു നല്കിയിരുന്നതെങ്കിലും ഉപയോക്താക്കൾ താത്പര്യം കാണിക്കാത്തതിനാൽ ഒരു ജിബിയായി ഉ‍യർത്തുകയായിരുന്നു. 28 ദിവസമാണ് ഇതിന്‍റെ കാലാവധി. ഇതു കൂടാതെ 148 രൂപയ്ക്ക് സൗജന്യ കോളുകളും ഡാറ്റയും ഐഡിയ നല്കുന്നുണ്ട്. ഉപയോക്താക്കൾക്ക് രാജ്യത്തെവിടെയും സൗജന്യമായി വിളിക്കുന്നതിനൊപ്പം 50 എംബി ഡാറ്റയും ലഭിക്കും.
