ഒാൺലൈനില്‍ സ്വർണം വാങ്ങുമ്പോള്‍ 'പണി' കിട്ടാതിരിക്കാൻ അറിയേണ്ടത്
 )
Followസ്വർണം വാങ്ങാൻ ജ്വല്ലറയിൽ പോകുന്നവരുടെ എണ്ണം കുറഞ്ഞുവരികയാണ്. ഇഷ്ട ഡിസൈനുകൾ ആകർഷകമായ വിലയിൽ ഒാൺലൈനിൽ ലഭ്യമായതോടെയാണ് മഞ്ഞലോഹം വീട്ടിലിരുന്നും വാങ്ങാൻ താൽപര്യമേറിയത്. ആമസോൺ, ഫ്ലിപ്കാർട് തുടങ്ങിയ മുൻനിര ഇ.കൊമേഴ്സ് സംരംഭങ്ങൾ വഴി സ്വർണം ലഭ്യമാണ്. എന്നാൽ വില കൂടി ഇടപാട് ആയതിനാൽ ഒാൺലൈനായി സ്വർണം വാങ്ങുന്നവർ ചതിക്കൂഴികൾ കൂടി അറിഞ്ഞിരിക്കണം. ഒമ്പത് കാര്യങ്ങൾ ഒാൺലൈൻ സ്വർണ ഇടപാടിൽ ശ്രദ്ധിക്കണം.
1. വിൽപ്പനക്കാരെ/ വെബ്സൈറ്റിനെ അറിയുക
വിൽപ്പനക്കാരന്‍റെയും വെബ്സൈറ്റിന്‍റെയും ആധികാരികതയും വിശ്വാസ്യതയും ഉറപ്പുവരുത്തുക എന്നതാണ് ആദ്യമായി ചെയ്യേണ്ടത്. വിലപേശൽ തരത്തിലുള്ള ഒാഫറുകൾ ഇന്‍റര്‍നെറ്റിൽ കാണാം. എന്നാൽ സ്വർണത്തിന്‍റെ കാര്യത്തിൽ ഇത് പ്രായോഗികമല്ലെന്ന് തിരിച്ചറിയുക. വിലപേശിയുള്ള ഇടപാടുകൾ ഒഴിവാക്കുക.
2. പരിശുദ്ധി ഉറപ്പുവരുത്തുക
സ്വർണം 24, 22 കാരറ്റുകളിൽ ലഭ്യമാണ്. 24 കാരറ്റ് ആണ് ഏറ്റവും പരിശുദ്ധമായ സ്വർണം. ജ്വല്ലറികളിൽ നിന്ന് 24 കാരറ്റ് സ്വർണം ലഭിക്കില്ല. വെള്ളി, ചെമ്പ് തുടങ്ങിയ ലോഹങ്ങൾ ചേർത്ത സ്വർണമാണ് ജ്വല്ലറികളിൽ നിന്ന് ലഭിക്കുന്നത്. സ്വർണത്തിന്‍റെ കാരറ്റ് നോക്കിയാണ് വാങ്ങേണ്ടത്. ആമസോൺ, ഫ്ലിപ്കാർട് സൈറ്റുകളിൽ നിന്ന് 24 കാരറ്റിലുള്ള സ്വർണകട്ടികൾ ലഭ്യമാണ്.
3. ഹാൾമാർക്ക് സർട്ടിഫിക്കേഷൻ
ഒാൺലൈനായി സ്വർണം വാങ്ങുമ്പോള്‍ അളവുകോലായി ഹാൾമാർക്ക് സർട്ടിഫിക്കേഷഷൻ കൂടി ഉറപ്പുവരുത്തണം. ബ്യൂറോ ഒാഫ് ഇന്ത്യൻ സ്റ്റാന്‍റേഡ് (ബി.ഐ.എസ്) ജ്വല്ലറികൾക്ക് നൽകുന്ന ഗുണനിലവാര സർട്ടിഫിക്കേഷൻ ആണ് ഹാൾമാർക്ക്. ബി.ഐ.എസ് വെബ്സൈറ്റിൽ ഇൗ ജ്വല്ലറികളുടെ പട്ടിക ലഭ്യമാണ്.
4. പണിക്കൂലി
ആഭരണങ്ങൾ വാങ്ങുമ്പോൾ അവയ്ക്ക് പണിക്കൂലി നൽകേണ്ടിവരും. അവ ഇൗടാക്കുന്നത് ശരിയായ കണക്കിലാണോ എന്ന് ഉറപ്പുവരുത്തണം. സ്വർണത്തിന്‍റെ തൂക്കം, പണിക്കൂലി, പതിച്ച കല്ലുകൾ തുടങ്ങിയവ എല്ലാം ചേർത്താണ് തുക ഇൗടാക്കുന്നത്. നിങ്ങളുടെ വിൽപ്പനക്കാരൻ സ്വർണത്തിന് സമാനമായ തോതിൽ അതിൽപതിച്ച കല്ലിന് വില ചുമത്തുന്നില്ലെന്ന് ഉറപ്പാക്കണം. എത്ര തൂക്കം സ്വർണം ലഭിക്കുന്നു, അതിന് വരുന്ന തുക എത്രയെന്ന് ബില്ലിൽ ഉറപ്പുവരുത്തണം. ഇതിൽ സ്വർണത്തിന്‍റെ പരിശുദ്ധി, തൂക്കം, വില, ഹാൾമാർക്ക്, പണിക്കൂലി എന്നിവ ബില്ലിൽ ഉണ്ടായിരിക്കണം.
5 . തിരിച്ചെടുക്കാനുള്ള വ്യവസ്ഥ
സ്വർണം വാങ്ങുന്ന വെബ്സൈറ്റിൽ അവ തിരിച്ചെടുക്കുന്നതിനും മാറ്റിയെടുക്കുന്നതിനുമുള്ള വ്യവസ്ഥയുണ്ടെന്ന് കൂടി ഉറപ്പുവരുത്തുക. ഇടപാട് നടത്തും മുമ്പ് തന്നെ വ്യവസ്ഥകൾ വായിച്ചിരിക്കണം.
6. ബില്ലില്ലാത്ത സ്വർണം വേണ്ട
ഒാൺലൈൻ സ്വർണ ഇടപാടിൽ ബിൽ ഉറപ്പുവരുത്തണം. തിരികെ നൽകുന്നതിനോ മാറ്റിയെടുക്കുന്നതിനോ മാത്രമല്ല, പകരം സ്വർണത്തിന്‍റെ പരിശുദ്ധി, തൂക്കം തുടങ്ങിയവ ഉറപ്പാക്കാൻ കൂടി ബിൽ അനിവാര്യമാണ്. ബിൽ ഉണ്ടെങ്കിൽ മാത്രമേ ഇടപാട് സുതാര്യവും ആധികാരികവും ആവുകയുള്ളൂ.
7. പായ്ക്കിങിൽ ചതി പറ്റരുത്
ഒാൺലൈനായി സ്വർണം ലഭിച്ചാൽ ആദ്യം പരിശോധിക്കേണ്ടത് ഉൽപ്പന്നത്തിന്‍റെ പായ്ക്കിങ് ആണ്. പായ്ക്കിങിൽ എന്തെങ്കിലും അസ്വാഭാവികത തോന്നിയാൽ അവ സ്വീകരിക്കരുത്.
8. വലിപ്പത്തിലെ പ്രശ്നങ്ങൾ
സ്വർണം വാങ്ങുമ്പോൾ അവയുടെ വലിപ്പം, തിളക്കം മങ്ങിയ അവസ്ഥ തുടങ്ങിയ പ്രശ്നങ്ങൾ നേരിടാറുണ്ട്. ജ്വല്ലറികളിൽ നിന്ന് വാങ്ങുമ്പോൾ നേരിട്ട് ചെന്ന് പ്രശ്നം പരിഹരിക്കാം. എന്നാൽ ഒാൺലൈനായി വാങ്ങുന്നവർ മാറ്റം വരുത്തിനൽകുന്നത് സംബന്ധിച്ചുള്ള വ്യവസ്ഥ കൂടി ഉറപ്പുവരുത്തണം.
9. വീട്ടിൽ പരിശോധിക്കാം
ചില ഒാൺലൈൻ സ്റ്റോറുകൾ സ്വർണം വീട്ടിൽ എത്തിച്ച് ഉപഭോക്തക്കൾക്ക് ധരിച്ച് നോക്കാനുള്ള അവസരവും നൽകുന്നുണ്ട്. വാങ്ങാൻ ഉദ്ദേശിക്കുന്നവയെപ്പറ്റി ധാരണക്കുറവുണ്ടെങ്കിൽ ഇൗ രീതിയും പരീക്ഷിക്കാം.
