ക്യാമറയ്ക്ക് പിന്നില്‍ പ്രിയ നടന്‍; അച്ചു സുഗന്ധിന്‍റെ ആദ്യ ഷോര്‍ട്ട് ഫിലിം ഏറ്റെടുത്ത് ആരാധകര്‍
24 മണിക്കൂര്‍ പൂര്‍ത്തിയാവുംമുന്‍പേ 8 ലക്ഷത്തോളം കാഴ്ചകളാണ് ഹ്രസ്വ ചിത്രത്തിന് ലഭിച്ചിരിക്കുന്നത്
Followസാന്ത്വനം എന്ന പരമ്പരയിലൂടെ പ്രേക്ഷകര്‍ക്ക് പ്രിയങ്കരനായി മാറിയ നടനാണ് അച്ചു സുഗന്ധ്. അഭിനയത്തിനൊപ്പം സംവിധാനത്തിലും താല്‍പര്യമുണ്ടെന്ന് അച്ചു മുൻപ് തുറന്നു പറ‍ഞ്ഞിരുന്നു. സാന്ത്വനത്തിലെ താരങ്ങളായ സജിനെയും ഗോപികയെയും പ്രധാന കഥാപാത്രങ്ങളാക്കി ഷോര്‍ട്ട് ഫിലിം ചെയ്യുന്നുണ്ടെന്നും അന്ന് അച്ചു അറിയിച്ചിരുന്നു. പെണ്ണിനെ ഇഷ്ടായോ എന്നാണ് ഷോര്‍ട്ട് ഫിലിമിന് പേരിട്ടത്. ഈ ഹ്രസ്വ ചിത്രത്തിനായി ഏറെക്കാലമായുള്ള കാത്തിരിപ്പിലായിരുന്നു ആരാധകര്‍. ഇപ്പോഴിതാ ഷോർട്ട് ഫിലിം ആരാധകരിലേക്ക് എത്തിയിരിക്കുകയാണ്. അതിന്റെ സന്തോഷം പങ്കുവെച്ചിരിക്കുകയാണ് നടൻ.
"ഒരുപാട് സന്തോഷവും ആത്മവിശ്വാസവും തോന്നുന്ന നിമിഷം.. ഇതുപോലൊരു ഷോർട്ട് ഫിലിം നിങ്ങളിലേക്ക് എത്തിക്കണം എന്നുള്ളത് ഒരുപാട് വർഷങ്ങൾ കൊണ്ടുള്ള ആഗ്രഹമായിരുന്നു.. മാക്സിമം അതിനെ നന്നാക്കാനായി ഞങ്ങൾ ശ്രമിച്ചിട്ടുണ്ട്.. പിന്നെ, ആദ്യത്തെ വർക്കാണ് ഒരുപാട് പോരായ്മകൾ ഉണ്ടാകുമെന്നറിയാം.. അതെല്ലാം ക്ഷമിക്കുക, അഭിപ്രായങ്ങൾ അറിയിക്കുക.." എന്ന് കുറിച്ചാണ് ഷോർട്ട് ഫിലിം റിലീസ് ചെയ്ത വിവരം അച്ചു സുഗന്ത് അറിയിച്ചത്. അച്ചു സുഗന്തിന്റെ യുട്യൂബ് പേജിലൂടെയാണ് ഷോർട്ട് ഫിലിം പുറത്തുവിട്ടത്.
മികച്ച അഭിപ്രായവുമായാണ് ഷോർട്ട് ഫിലിം കണ്ട എല്ലാവരും എത്തിയത്. ആദ്യത്തേതിന്റെയായ യാതൊരു പ്രശ്നവും ഇതിൽ കാണുന്നില്ലെന്നായിരുന്നു എല്ലാവരുടെയും കമന്റ്. ഇനിയും കൂടുതൽ സംവിധാനം ചെയ്യണമെന്നാണ് ആരാധകരുടെ അഭിപ്രായം. കഥാപാത്രങ്ങളായി എത്തിയ സജിനും ഗോപികയ്ക്കും പ്രേക്ഷകരുടെ കൈയടി ലഭിക്കുന്നുണ്ട്.
അഭിനയിക്കണം എന്നായിരുന്നില്ല, സിനിമ സംവിധാന ചെയ്യണം എന്നതായിരുന്നു അച്ചുവിന്റെ ആഗ്രഹം. അതിന്റെ അടിസ്ഥാനത്തില്‍ ചില സിനിമകളില്‍ അസിസ്റ്റ് ചെയ്തിട്ടുണ്ട്. പിന്നീട്, വാനമ്പാടി എന്ന സീരിയലില്‍ അസോസിയേറ്റ് ആയി പ്രവൃത്തിച്ചു. അതേ ടീം സാന്ത്വനം സീരിയലിന് വേണ്ടി ഒന്നിച്ചപ്പോള്‍ അച്ചുവിന് കണ്ണന്‍ എന്ന കഥാപാത്രത്തെ ലഭിക്കുകയായിരുന്നു.
ALSO READ : അസാധാരണ ത്രില്ലര്‍: 'സൂക്ഷ്‍മദര്‍ശിനി' റിവ്യൂ
