പ്രകൃതിദുരന്തങ്ങള്‍ക്കെതിരായ ഇന്ത്യന്‍ പ്രതിരോധം, കരുത്താകാന്‍ ഇഒഎസ്-08 സാറ്റ്‌ലൈറ്റ്; സവിശേഷതകള്‍ വിശദമായി
ഇന്ത്യ തദ്ദേശീയമായി വികസിപ്പിച്ച അനേകം സാങ്കേതികവിദ്യകള്‍ ഉപയോഗിച്ചാണ് സാറ്റ്‌ലൈറ്റിന്‍റെ നിര്‍മാണം പൂര്‍ത്തിയാക്കിയത്
 )
Followശ്രീഹരിക്കോട്ട: ഐഎസ്ആര്‍ഒ എസ്എസ്എല്‍വി-ഡി3 വിക്ഷേപണ വാഹനം ഉപയോഗിച്ച് ഇഒഎസ്-08 (EOS-08) സാറ്റ്‌ലൈറ്റ് വിജയകരമായി ഭ്രമണപഥത്തില്‍ എത്തിച്ചിരിക്കുകയാണ്. ഇന്ന് രാവിലെയായിരുന്നു രാജ്യം കാത്തിരുന്ന വിക്ഷേപണം. ഇന്ത്യയുടെ ഭൗമനിരീക്ഷണത്തിന് ഉപകരിക്കുന്ന ഇഒഎസ്-08 സാറ്റ്‌ലൈറ്റിന്‍റെ പ്രത്യേകതകള്‍ എന്തൊക്കെയാണ് എന്ന് നോക്കാം. പ്രകൃതിദുരന്തങ്ങളുടെ കാലത്ത് ഇന്ത്യക്ക് കരുത്തും പ്രതിരോധവുമാകാന്‍ ഇഒഎസ്-08 സാറ്റ്‌ലൈറ്റിന് കഴിയുമെന്നാണ് പ്രതീക്ഷ.
175.5 കിലോഗ്രാമാണ് ഇഒഎസ്-08 കൃത്രിമ ഉപഗ്രഹത്തിന്‍റെ ഭാരം. ഭൂമിയില്‍ നിന്ന് 475 കിലോമീറ്റര്‍ ഉയരത്തിലുള്ള ഭ്രമണപഥത്തിലാണ് ഇതിനെ എത്തിച്ചിരിക്കുന്നത്. 420 വാട്ട്സ് ഊര്‍ജമാണ് സാറ്റ്‌ലൈറ്റില്‍ സൃഷ്‌ടിക്കപ്പെടുക. നവീനമായ ആന്‍റിന, കാര്യക്ഷമത കൂടിയ സോളാര്‍ സംവിധാനം, ചൂട് നിയന്ത്രിക്കാനുള്ള നൂതനമായ സംവിധാനം എന്നിങ്ങനെ അനേകം പ്രത്യേകതകള്‍ ഈ ഉപഗ്രഹത്തിനുണ്ട്. സോളാര്‍ സെല്ലും നാനോ സ്റ്റാര്‍ സെന്‍സറും ഉള്‍പ്പടെ ഇന്ത്യ തദ്ദേശീയമായി വികസിപ്പിച്ച അനേകം സാങ്കേതികവിദ്യകള്‍ ഉപയോഗിച്ചാണ് സാറ്റ്‌ലൈറ്റിന്‍റെ നിര്‍മാണം പൂര്‍ത്തിയാക്കിയത് എന്നതാണ് മറ്റൊരു സവിശേഷത.
ഇലക്ട്രോ ഒപ്റ്റിക്കല്‍ ഇന്‍ഫ്രാറെഡ് (EOIR), ഗ്ലോബല്‍ നാവിഗേഷന്‍ സാറ്റ്‌ലൈറ്റ് സിസ്റ്റം റിഫ്ലെക്റ്റമെട്രി (GNSS-R), എസ്ഐസി യുവി ഡോസിമീറ്റര്‍ (SiC UV Dosimeter) എന്നീ സാങ്കേതികവിദ്യകള്‍ സാറ്റ്‌ലൈറ്റില്‍ അടങ്ങിയിരിക്കുന്നു. പകലും രാത്രിയും ഉപഗ്രഹ ചിത്രങ്ങളെടുക്കാന്‍ സഹായിക്കുന്നതാണ് ഇഒഐആര്‍. ഇതില്‍ മിഡ്-വേവ് ഇന്‍ഫ്രാറെഡും ലോംഗ്‌വേവ് ഇന്‍ഫ്രാറെഡും അടങ്ങിയിരിക്കുന്നു. ദുരന്ത നിരീക്ഷണം മുതൽ അഗ്നിപർവ്വതങ്ങളുടെ നിരീക്ഷണം വരെ ഇഒഎസ്-08 സാറ്റ്‌ലൈറ്റ് കൊണ്ട് സാധ്യമാകും. അതേസമയം കടലിന്‍റെ ഉപരിതലത്തിലെ കാറ്റിന്‍റെ നിരീക്ഷണം, മണ്ണിലെ ഈര്‍പ്പത്തിന്‍റെ അവലോകനം, പ്രളയ സാധ്യത തുടങ്ങിയവ അറിയാന്‍ സഹായകമാകുന്ന നവീനമായ റിമോട്ട് സെന്‍സിംഗ് ടെക്‌നോളജിയാണ് ജിഎന്‍എസ്എസ്-ആര്‍ പേലോഡിലുള്ളത്. ഗഗന്‍യാന്‍ ദൗത്യത്തിന്‍റെ കൂടി ഭാഗമായി അള്‍ട്രാവയലറ്റ് രശ്‌മികളെ നിരീക്ഷിക്കാന്‍ ലക്ഷ്യമിട്ടാണ് എസ്ഐസി യുവി ഡോസിമീറ്റര്‍ ഉപഗ്രഹത്തില്‍ ഉള്‍പ്പെടുത്തിയിരിക്കുന്നത്. മനുഷ്യനെ ബഹിരാകാശത്ത് എത്തിക്കുന്ന ഇന്ത്യയുടെ ആദ്യ ദൗത്യമാണ് ഗഗൻയാൻ.
പ്രധാനമായും ഭൗമനിരീക്ഷണം ലക്ഷ്യമിട്ടാണ് ഇഒഎസ്-08 സാറ്റ്‌ലൈറ്റ് ഐഎസ്ആര്‍ഒ വികസിപ്പിച്ചത്. കാലാവസ്ഥ വ്യതിയാനവും പ്രകൃതി ദുരന്തങ്ങളും പഠിക്കാൻ ഇഒഎസ്-08ൽ നിന്നുള്ള വിവരങ്ങൾ സഹായകമാകും. ഇൻഫ്രാറെഡ് ചിത്രങ്ങളെടുക്കാൻ കെൽപ്പുള്ള ഇഒഎസ്-08 മൈക്രോസാറ്റിന് നിലവിൽ ഒരു വർഷത്തെ ദൗത്യകാലാവധിയാണ് നിശ്ചയിച്ചിട്ടുള്ളത്. ഇതിനൊപ്പം എസ്എസ്എല്‍വി-ഡി3 വിക്ഷേപണ വാഹനത്തില്‍ എസ്ആർ-0 എന്ന ഡെമോസാറ്റിനെയും ഐഎസ്ആര്‍ഒ ഭ്രമണപഥത്തിലെത്തിച്ചിട്ടുണ്ട്. എസ്എസ്എൽവി എന്ന ഇസ്രൊയുടെ എറ്റവും ചെറിയ വിക്ഷേപണവാഹനത്തിന്‍റെ മൂന്നാമത്തെ പരീക്ഷണമാണ് വിജയകരമായി പൂര്‍ത്തിയായത്.
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം
