'ഒരേയൊരു വോട്ടാണ്, പാഴാക്കരുത്'; രാഷ്ട്രീയം തുറന്നു പറയുന്ന ഗാനവുമായി ബംഗാളി സിനിമാ താരങ്ങൾ
വ്യാജവാർത്തകൾ, ചില ന്യൂനപക്ഷ സമുദായങ്ങൾക്കെതിരെയുള്ള വിദ്വേഷ പ്രചാരണം, 'ഗോ റ്റു പാകിസ്ഥാൻ' മുദ്രാവാക്യം എന്നിവയെയും ഈ പാട്ട് തുറന്നു വിമർശിക്കുന്നുണ്ട്.
Followനിയമസഭാ തെരെഞ്ഞെടുപ്പിനു തൊട്ടു മുമ്പായി, തങ്ങളുടെ നയം വ്യക്തമാക്കുന്ന ഒരു ഗാനം റിലീസ് ചെയ്തിരിക്കുകയാണ് ബംഗാളിലെ സിനിമാതാരങ്ങൾ. കേന്ദ്രം ഭരിക്കുന്ന പാർട്ടി കഴിഞ്ഞ ആറു വർഷങ്ങളിൽ സ്വീകരിച്ച നിലപാടുകളോടുള്ള തുറന്ന പ്രതിഷേധമാണ് ഈ ഗാനം. 'നിജെദേർ മാവ്തെ, നിജെദേർ ഗാൻ' എന്നുതുടങ്ങുന്ന ഈ പാട്ടിന്റെ അർത്ഥം 'ഞങ്ങളുടെ വഴി, ഞങ്ങളുടെ പാട്ട്...' എന്നാണ്. സബ്യസാചി ചക്രബർത്തി, പരംബ്രത ചാറ്റർജി, സുരാംഗന ബന്ദോപാധ്യായ്, രൂപാങ്കർ ബാഗ്‌ച്ചി എന്നിങ്ങനെ ജനപ്രിയ ബംഗാളി സിനിമാതാരങ്ങളുടെ ഒരു നിരതന്നെയുണ്ട് ഈ പാട്ടിൽ.
അനിർബൻ ഭട്ടാചാര്യ വരികൾ എഴുതിയ ഈ ഗാനം, ബംഗാളിലെ പൊതുജനങ്ങളോട് ആഹ്വാനം ചെയ്യുന്നത് ഉത്തരവാദിത്തത്തോടെ വോട്ടുചെയ്യാനാണ്. സംഘപരിവാറിനെ, വിശിഷ്യാ ആർഎസ്എസ്, ബിജെപി എന്നിവയെ കടന്നാക്രമിക്കുന്ന ഈ ഗാനം "നിങ്ങൾ ഞങ്ങളുടെ ക്ഷമ പരീക്ഷിക്കുകയാണ്. ഞങ്ങൾ പറയുന്നത് ഒരക്ഷരം നിങ്ങൾ കേൾക്കില്ല, ഞങ്ങളുടെ ഹിതം ഞങ്ങൾക്കറിയാം, ഇനി ചെയ്യേണ്ടത് ഞങ്ങൾ ചെയ്തോളാം..." എന്നാണ് പറയുന്നത്.
വ്യാജവാർത്തകൾ, ചില ന്യൂനപക്ഷ സമുദായങ്ങൾക്കെതിരെയുള്ള വിദ്വേഷ പ്രചാരണം, 'ഗോ റ്റു പാകിസ്ഥാൻ' മുദ്രാവാക്യം എന്നിവയെയും ഈ പാട്ട് തുറന്നു വിമർശിക്കുന്നുണ്ട്. സിറ്റിസൺസ് യുണൈറ്റഡ് എന്ന ബാനറിൽ ആണ് ഈ വീഡിയോ നിർമ്മിക്കപ്പെട്ടിട്ടുള്ളത്. എൻആർസി, പൗരത്വ നിയമ ഭേദഗതി എന്നീ കേന്ദ്ര നയങ്ങളോടുള്ള പ്രതിഷേധം പരോക്ഷമായി രേഖപ്പെടുത്തിക്കൊണ്ട് ഈ പാട്ട് പറയുന്നത്, "ഞങ്ങൾ എങ്ങും പോകില്ല, ഈ മണ്ണിൽ തന്നെ കഴിയും..." എന്നാണ്. "നോ വോട്ട് ഫോർ ബിജെപി"എന്ന പേരിൽ സംസ്ഥാനത്ത് നടക്കുന്ന ഒരു മുന്നേറ്റത്തിന്റെ ഭാഗമായികൂടിയാണ് ഈ പാട്ടിന്റെ വീഡിയോ ഇപ്പോൾ വൈറൽ ആയിക്കൊണ്ടിരിക്കുന്നത്.
