മലേഷ്യ ഓപ്പണ്‍: കശ്യപ് ക്വാര്‍ട്ടര്‍ കാണാതെ പുറത്ത്; ചിരാഗ് ഷെട്ടി- സാത്വിക് സായ്‌രാജ് സഖ്യത്തിന് വാക്കോവര്‍
മലയാളിതാരം എച്ച് എസ് പ്രണോയിയും പി വി സിന്ധുവും (P V Sindhu) ക്വാര്‍ട്ടറില്‍ പ്രവേശിച്ചിരുന്നു. തയ്‌വാന്‍ താരം ചൗ ടിയെന്‍ ചെന്നിനെതിരെ പിന്നില്‍ നിന്ന് പൊരുതികയറിയാണ് സിന്ധു ജയിച്ചത്. ആദ്യ ഗെയിമില്‍ സിന്ധു 19-21ന് പിന്നില്‍ പോയിരുന്നുന്നു.
Followക്വാലലംപൂര്‍: മലേഷ്യ ഓപ്പണ്‍ ബാഡ്മിന്റണില്‍ (Malaysia Open) പി കശ്യപ് ക്വാര്‍ട്ടര്‍ കാണാതെ പുറത്ത്. തായ്ലന്‍ഡ് താരം കുന്‍ലാവുറ്റ് വിറ്റിഡ്സാണിനോട് നേരിട്ടുള്ള ഗെയിമുകള്‍ക്കാണ് കശ്യപ് തോറ്റത്. സ്‌കോര്‍ 21-19, 21-10. അതേസമയം, ഡബിള്‍സില്‍ ചിരാഗ് ഷെട്ടി- സാത്വിക് സായ്‌രാജ് സഖ്യത്തിന് അടുത്ത റൗണ്ടിലേക്ക് വാക്ക് ഓവര്‍ ലഭിച്ചു. ഇന്തോനേഷ്യല്‍ സഖ്യം പിന്മാറിയതോടെയാണ് ഇന്ത്യന്‍ സഖ്യം മുന്നേറിയത്.
നേരത്തെ, മലയാളിതാരം എച്ച് എസ് പ്രണോയിയും പി വി സിന്ധുവും (P V Sindhu) ക്വാര്‍ട്ടറില്‍ പ്രവേശിച്ചിരുന്നു. തയ്‌വാന്‍ താരം ചൗ ടിയെന്‍ ചെന്നിനെതിരെ പിന്നില്‍ നിന്ന് പൊരുതികയറിയാണ് സിന്ധു ജയിച്ചത്. ആദ്യ ഗെയിമില്‍ സിന്ധു 19-21ന് പിന്നില്‍ പോയിരുന്നുന്നു. അടുത്ത രണ്ട് ഗെയിമിലും തിരിച്ചടിച്ച സിന്ധു 21-9, 21-14ന് മത്സരം സ്വന്തമാക്കി. 57 മിനിറ്റാണ് മത്സരം നീണ്ടുനിന്നത്. ചൈനീസ് തായ്‌പേയുടെ തായ് സു യിംഗിനെയാണ് സിന്ധു ക്വാര്‍ട്ടറില്‍ നേരിടുക. പ്രണോയ് (H S Prannoy) തയ്‌വാന്‍ താരം ചൗ ടിയെന്‍ ചെന്നിനെയാണ് തോല്‍പ്പിച്ചത്. 21-15, 21-7 എന്ന സ്‌കോറിന് നേരിട്ടുള്ള ഗെയിമുകള്‍ക്കായിരുന്നു പ്രണോയ് തോല്‍പ്പിച്ചത്. ഇന്തോനേഷ്യയുടെ ജോന്‍താന്‍ ക്രിസ്റ്റിയെയാണ് മലയാളി താരം ക്വാര്‍ട്ടറില്‍ നേരിടുക.
എന്നാല്‍, സൈന നെഹ്‌വാള്‍ ആദ്യ റൗണ്ടില്‍ തോറ്റ് പുറത്തായി. അമേരിക്കന്‍ താരം ഐറിസ് വാംഗ് ആണ് സൈനയെ തോല്‍പിച്ചത്. സ്‌കോര്‍ 21-11, 21-17. പി കശ്യപ് നേരിട്ടുള്ള ഗെയിമുകള്‍ക്ക് തെക്കന്‍ കൊറിയയുടെ ഹിയോ ക്വാംഗ് ഹീയെ ആണ് തോല്‍പിച്ചത്. സ്‌കോര്‍ 21-12, 21-17. സിന്ധു പ്രീ ക്വാര്‍ട്ടറില്‍ തായ്ലന്‍ഡ് താരം പോണ്‍പാവീ ചോചുവോംഗിനെ തോല്‍പിച്ചിരുന്നു. നേരിട്ടുള്ള ഗെയിമുകള്‍ക്കായിരുന്നു സിന്ധുവിന്റെ ജയം. സ്‌കോര്‍ 21-13, 21-17.
ഡബിള്‍സില്‍ ഇന്ത്യയുടെ ബി സുമീത് റെഡ്ഡി-അശ്വിനി പൊന്നപ്പ സഖ്യവും ആദ്യ റൗണ്ടില്‍ തോറ്റ് പുറത്തായി. നെതര്‍ലന്‍ഡ്‌സിന്റെ റോബിന്‍ ടബെലിങ്-സലേന പീക് സഖ്യത്തോട് ഒന്നിനെതിരെ രണ്ട് ഗെയിമുകള്‍ക്കായിരുന്നു ഇന്ത്യന്‍ സഖ്യത്തിന്റെ തോല്‍വി. സ്‌കോര്‍ 15-21, 21-19 17-21.
വനിതകളില്‍ ലോക ഒന്നാം നമ്പറായ ജപ്പാന്‍ താരം അകാനെ യെമാഗൂച്ചി ആദ്യ റൗണ്ടില്‍ തോറ്റ് പുറത്തായി. ഇന്തൊനേഷ്യന്‍ താരം ഗ്രിഗോറിയ മരിസ്‌കയാണ് യെമാഗൂച്ചിയെ നേരിട്ടുള്ള ഗെയിമുകള്‍ക്ക് അട്ടിമറിച്ചത്. സ്‌കോര്‍ 21-14,21-14. അതേസമയം, പുരുഷന്മാരില്‍ ലോക ഒന്നാം നമ്പര്‍ വിക്ടര്‍ അക്‌സെല്‍സെന്‍ അനായാസം രണ്ടാം റൗണ്ടില്‍ കടന്നു. ഫ്രഞ്ച് താരം ബ്രൈസ് ലെവര്‍ഡെസിനെയാണ് അക്‌സല്‍സെന്‍ തോല്‍പ്പിച്ചത്. സ്‌കോര്‍ 22-20, 21-7.
