എസ്ബിഐയിൽ നിന്നും വായ്പ എടുത്തിട്ടുണ്ടോ? ഇവയ്ക്ക് പലിശ കൂടും
എസ്ബിഐയുടെ ഭവന, വാഹന വായ്പകളുടെ പലിശ നിരക്ക് വർദ്ധിക്കും. പുതിയ പലിശ നിരക്കുകൾ ഇന്നുമുതൽ പ്രാബല്യത്തിൽ വന്നു.
 )
Followഎം സി എൽ ആർ അധിഷ്ഠിത വായ്പകളുടെ പലിശ നിരക്ക് കൂട്ടി സ്റ്റേറ്റ് ബാങ്ക് ഓഫ് ഇന്ത്യ. പലിശയിൽ 0.10% വർദ്ധനയാണ് വരുത്തിയിരിക്കുന്നത്. ഇതനുസരിച്ച് ഭവന, വാഹന വായ്പകളുടെ പലിശ നിരക്ക് വർദ്ധിക്കും. പുതിയ പലിശ നിരക്കുകൾ ഇന്നുമുതൽ പ്രാബല്യത്തിൽ വന്നു. ഇതോടെ ഒരു വർഷത്തെ എം സി എൽ ആർ അധിഷ്ഠിത വായ്പകളുടെ പലിശ നിരക്ക് 8.75% ആയി ഉയരും. നേരത്തെ ഇത് 8.65% ആയിരുന്നു. ബാങ്കിന്റെ എംസിഎൽആർ അധിഷ്ഠിത വായ്പകളുടെ പലിശ നിരക്ക് 8.10 ശതമാനത്തിനും 8.95 ശതമാനത്തിനും ഇടയിൽ ആയിരിക്കും. ഒരു മാസത്തെ എം സി എൽ ആർ പലിശ നിരക്ക് 8.2 ശതമാനത്തിൽ 8.3% ആയും മൂന്ന് മാസത്തെ എംസിഎൽആർ അധിഷ്ഠിത വായ്പകളുടെ പലിശ നിരക്ക് 8.2 ശതമാനത്തിൽ നിന്നും 8.3 ശതമാനമായും കൂട്ടിയിട്ടുണ്ട്. മൂന്ന് വർഷത്തെ എംസിഎൽആർ അധിഷ്ഠിത പലിശ 8.85 ശതമാനത്തിൽ നിന്നും 8.95 ശതമാനമാക്കി.
അതേസമയം എക്സ്റ്റേണൽ ബെഞ്ച് മാർക്ക് ലെൻഡിങ് റേറ്റ് പ്രകാരമുള്ള വായ്പകളുടെ പലിശ നിരക്ക് 9.15 ശതമാനം ആയി തുടരും.2016 ഏപ്രിൽ 01-ന് ആണ് പലിശ നിരക്ക് നിശ്ചയിക്കുന്നതിനുള്ള അടിസ്ഥാന നിരക്ക് സമ്പ്രദായത്തിന് പകരം ആർബിഐ എംസിഎൽആർ സംവിധാനം ഏർപ്പെടുത്തിയത്. 2016 ഏപ്രിൽ 01-ന് മുമ്പ് വായ്പ നൽകിയ വായ്പക്കാർ ഇപ്പോഴും പഴയ ബെഞ്ച്മാർക്ക് പ്രൈം ലെൻഡിംഗ് റേറ്റ് (ബിപിഎൽആർ) സമ്പ്രദായത്തിന് കീഴിലാണ്. അവർക്ക് എംസിഎൽആർ നിരക്കിലേക്ക് മാറാനും സാധിക്കും.
ഇതിനുപുറമേ സ്ഥിരനിക്ഷേപങ്ങൾക്കുള്ള പലിശ നിരക്കും സ്റ്റേറ്റ് ബാങ്ക് വർദ്ധിപ്പിച്ചിട്ടുണ്ട്. ഇതനുസരിച്ച് 7 മുതൽ 45 ദിവസം വരെയുള്ള സ്ഥിരനിക്ഷേപങ്ങളുടെ പലിശ മൂന്നര ശതമാനം ആക്കി കൂട്ടി. അഞ്ചുവർഷത്തിനും പത്തു വർഷത്തിനും ഇടയ്ക്കുള്ള സ്ഥിരനിക്ഷേപങ്ങളുടെ പലിശ ആറര ശതമാനം ആയിരിക്കും. മുതിർന്ന പൗരന്മാർക്ക് ഏഴര ശതമാനം വരെ പലിശ ലഭിക്കും.
