പ്രവചനങ്ങളെ കാറ്റിൽപ്പറത്തി ഇന്ത്യ വളരും; 7 ശതമാനം വളർച്ചയെന്ന് ഐഎംഎഫ്
ഇന്ത്യയുടെ വളർച്ചാ പ്രവചനം ഐഎംഎഫ് 7 ശതമാനം വരെ ഉയർത്തുകയും ചെയ്തു. ഏപ്രിലിൽ ഐഎംഎഫ് 6.8 ശതമാനം വളർച്ചയാണ് പ്രവചിച്ചിരുന്നത്.
 )
Followആളുകളുടെ ഉപഭോഗം, പ്രത്യേകിച്ച് ഗ്രാമപ്രദേശങ്ങളിൽ ഉയരുന്നത് 2024-25 സാമ്പത്തിക വർഷത്തിൽ രാജ്യത്തിന്റെ വളർച്ചയ്ക്ക് ഉത്തേജനം പകരുമെന്ന് പ്രതീക്ഷിക്കുന്നതായി അന്താരാഷ്ട്ര നാണയ നിധി . ഇന്ത്യയുടെ വളർച്ചാ പ്രവചനം ഐഎംഎഫ് 7 ശതമാനം വരെ ഉയർത്തുകയും ചെയ്തു. ഏപ്രിലിൽ ഐഎംഎഫ് 6.8 ശതമാനം വളർച്ചയാണ് പ്രവചിച്ചിരുന്നത്. 2024 ൽ 3.2 ശതമാനവും 2025 ൽ 3.3 ശതമാനവും വളർച്ചയാണ് ആഗോള സമ്പദ്‌വ്യവസ്ഥയിലുണ്ടാവുകയെന്നും ഐഎംഎഫ് അഭിപ്രായപ്പെട്ടു.ഏഷ്യയിലെ ഇന്ത്യയടക്കമുള്ള രാജ്യങ്ങളുടെ വളർന്നുവരുന്ന സമ്പദ്‌വ്യവസ്ഥകൾ ആണ് ആഗോള സമ്പദ്‌വ്യവസ്ഥയ്ക്ക് കരുത്തേകുന്നത്. അതേ സമയം 2029 ആകുമ്പോഴേക്കും ചൈനയുടെ വളർച്ച 3.3 ശതമാനമായി കുറയുമെന്ന് ഐഎംഎഫ് പ്രവചിക്കുന്നു . ഏഷ്യയുടെ ദീർഘകാല വളർച്ചാ സാധ്യതകൾ ദുർബലമാണെന്നാണ് അന്താരാഷ്ട്ര നാണയ നിധിയുടെ അനുമാനം
2024-25 സാമ്പത്തിക വർഷത്തിൽ ഇന്ത്യയുടെ മൊത്ത ആഭ്യന്തര ഉൽപാദന (ജിഡിപി) വളർച്ചാ നിരക്ക് 7 ശതമാനമായിരിക്കുമെന്ന് ഏഷ്യൻ ഡെവലപ്‌മെന്റ് ബാങ്കും (എഡിബി) പ്രവചിച്ചിട്ടുണ്ട്. കാർഷിക മേഖലയിൽ പുരോഗതി പ്രതീക്ഷിക്കുന്നതായും എഡിബി വ്യക്തമാക്കി. ഗ്രാമപ്രദേശങ്ങളിലെ വളർച്ചയുടെ വേഗത നിലനിർത്താൻ കാർഷികമേഖലയിലെ പുരോഗതി പ്രധാനമാണ്. ഏപ്രിലിൽ എഡിബിയുടെ പ്രവചനം 6.8 ശതമാനമായിരുന്നു. നടപ്പ് സാമ്പത്തിക വർഷത്തെ ഇന്ത്യയുടെ വളർച്ചാ അനുമാനം 7 ശതമാനത്തിൽ നിന്ന് 7.2 ശതമാനമായി ആർബിഐ ഉയർത്തിയിരുന്നു.
ആഗോളതലത്തിലുള്ള വിലക്കയറ്റം ഭീഷണിയുയർത്തുന്നതാണെന്നും ഐഎംഎഫ് വിലയിരുത്തി. വിമാന യാത്ര മുതൽ റസ്റ്റോറന്റ് ഭക്ഷണം വരെയുള്ള സേവനങ്ങൾക്ക് പ്രതീക്ഷിച്ചതിലും കൂടുതൽ വിലക്കയറ്റം ഉണ്ട്. ലോകമെമ്പാടുമുള്ള പുരോഗതിയെ ഇത് മന്ദഗതിയിലാക്കിയെന്നും ഐഎംഎഫ് റിപ്പോർട്ട് പറയുന്നു .
