ക്രെഡിറ്റ് കാര്‍ഡ് ബില്ലുകള്‍ അടയ്ക്കുന്നത് തലവേദനയാണോ? ഇനി എളുപ്പത്തിൽ ചെയ്യാം, വഴികൾ ഇതാ...
പ്രതിമാസ ക്രെഡിറ്റ് കാര്‍ഡ് പേയ്മെന്‍റുകള്‍ എളുപ്പത്തില്‍ കൈകാര്യം ചെയ്യുന്നതിനുള്ള ലളിതമായ വഴികളിതാ...
 )
Followക്രെഡിറ്റ് കാര്‍ഡ് ബില്ലുകള്‍ കൃത്യസമയത്ത് അടയക്കുക എന്നത് ഏറെ പ്രാധാന്യമുള്ള കാര്യമാണ്. വൈകിയ പേയ്മെന്‍റിനുള്ള ഫീസും പിഴ പലിശയും ഒഴിവാക്കാന്‍ മാത്രമല്ല, ക്രെഡിറ്റ് സ്കോര്‍ മികച്ചതാക്കാനും ഇതിലൂടെ സാധിക്കും. പ്രതിമാസ ക്രെഡിറ്റ് കാര്‍ഡ് പേയ്മെന്‍റുകള്‍ എളുപ്പത്തില്‍ കൈകാര്യം ചെയ്യുന്നതിനുള്ള ലളിതമായ വഴികളിതാ...
1. നെറ്റ് ബാങ്കിംഗ്
നെറ്റ് ബാങ്കിംഗ് അക്കൗണ്ട് വഴി ക്രെഡിറ്റ് കാര്‍ഡ് ബില്‍ അടയ്ക്കുന്നത് കുടിശ്ശിക തീര്‍ക്കാനുള്ള എളുപ്പവഴിയാണ്. നിലവിലെ നെറ്റ് ബാങ്കിംഗ് അക്കൗണ്ടില്‍ ക്രെഡിറ്റ് കാര്‍ഡ് രജിസ്റ്റര്‍ ചെയ്യുകയും ബില്‍ നേരിട്ട് അടയ്ക്കുകയും ചെയ്യാം
നെറ്റ് ബാങ്കിംഗ് വഴി എങ്ങനെ ക്രെഡിറ്റ് കാര്‍ഡ് ബില്‍ അടയ്ക്കാം?
1.നെറ്റ് ബാങ്കിംഗ് അക്കൗണ്ടിലേക്ക് ലോഗിന്‍ ചെയ്യുക
2. 'ക്രെഡിറ്റ് കാര്‍ഡ്' ബട്ടണ്‍ തിരഞ്ഞെടുക്കുക
3. 'പുതിയ കാര്‍ഡ് രജിസ്റ്റര്‍ ചെയ്യുക' തിരഞ്ഞെടുക്കുക
4. ക്രെഡിറ്റ് കാര്‍ഡ് വിശദാംശങ്ങള്‍ ഉള്‍പ്പെടുത്തി 'സബ്മിറ്റ്' തിരഞ്ഞെടുക്കുക
5. കാര്‍ഡ് രജിസ്റ്റര്‍ ചെയ്തിട്ടുണ്ടെങ്കില്‍, 'ട്രാന്‍സാക്ഷന്‍്' ബട്ടണ്‍ തിരഞ്ഞെടുത്ത് രജിസ്റ്റര്‍ ചെയ്ത കാര്‍ഡ് തിരഞ്ഞെടുക്കുക
6. പേയ്മെന്‍റ് മോഡ് തിരഞ്ഞെടുത്ത് ഇടപാട് പൂര്‍ത്തിയാക്കുക
2. ഐഎംപിഎസ്
മൊബൈല്‍, ഇന്‍റര്‍നെറ്റ്, ബ്രാഞ്ച്, എടിഎം, എസ്എംഎസ് എന്നിവ പോലുള്ള വഴികളിലൂടെ പണം അയയ്ക്കാനും സ്വീകരിക്കാനും ബില്ലുകള്‍ അടയ്ക്കാനും പേയ്മെന്‍റുകള്‍ നടത്താനും ഉപയോക്താക്കളെ അനുവദിക്കുന്ന ഓണ്‍ലൈന്‍ ഫണ്ട് ട്രാന്‍സ്ഫര്‍ സംവിധാനമായ ഐഎംപിഎസ് വഴി ക്രെഡിറ്റ് കാര്‍ഡ് ബില്‍ അടയ്ക്കാം
1. ഐഎംപിഎസ് വഴി ക്രെഡിറ്റ് കാര്‍ഡ് ബില്ലുകള്‍ അടയ്ക്കുന്നതിന്, ബാങ്കിന്‍റെ മൊബൈല്‍ ആപ്ലിക്കേഷന്‍ ഡൗണ്‍ലോഡ് ചെയ്യുക.
2. ആപ്പ് ഡൗണ്‍ലോഡ് ചെയ്ത ശേഷം, ഐഎംപിഎസ് ഓപ്ഷനുള്ള ലിങ്ക് ലഭിക്കാന്‍ 'ബാങ്ക് അക്കൗണ്ട്' ടാബില്‍ ക്ലിക്ക് ചെയ്യുക.
3.ഐഎംപിഎസ് ബട്ടണിലും 'മെര്‍ച്ചന്‍റ് പേയ്മെന്‍റ്' ടാബിലും ക്ലിക്ക് ചെയ്യുക.
4.ബാങ്ക് അക്കൗണ്ട് വിശദാംശങ്ങള്‍, ക്രെഡിറ്റ് കാര്‍ഡ് നമ്പര്‍ മുതലായവ പോലുള്ള വിശദാംശങ്ങള്‍ ചേര്‍ക്കുക.
5. ഇടപാട് പൂര്‍ത്തിയാക്കുക
3. എന്‍ഇഎഫ്ടി
നെഫ്റ്റ് വഴി ബില്ലുകള്‍ അടയ്ക്കുന്നതിന്, ക്രെഡിറ്റ് കാര്‍ഡ് ഒരു 'ബില്ലര്‍ അല്ലെങ്കില്‍ ഗുണഭോക്താവ്' ആയി ചേര്‍ക്കണം. ക്രെഡിറ്റ് കാര്‍ഡ് ഒരു ഗുണഭോക്താവായി ചേര്‍ക്കുന്നതിന് ക്രെഡിറ്റ് കാര്‍ഡ് നമ്പര്‍, കാര്‍ഡ് ഉടമയുടെ പേര്, ക്രെഡിറ്റ് കാര്‍ഡ് പേയ്മെന്‍റുകള്‍ക്കുള്ള ഐ എഫ് എസ് സി കോഡ്, ബാങ്കിന്‍റെ പേര്, ബ്രാഞ്ച്, വിലാസം എന്നിവ പോലുള്ള വിശദാംശങ്ങള്‍ ആവശ്യമാണ്. ഒരു പുതിയ കാര്‍ഡ് ചേര്‍ക്കുന്നതിന് 30 മിനിറ്റ് മുതല്‍ 24 മണിക്കൂര്‍ വരെ എടുത്തേക്കാം
നെഫ്റ്റ് വഴി എങ്ങനെ ക്രെഡിറ്റ് കാര്‍ഡ് ബില്‍ അടയ്ക്കാം?
1. ഓണ്‍ലൈന്‍ ബാങ്കിംഗ് അക്കൗണ്ടില്‍ ലോഗിന്‍ ചെയ്യുക
2. 'ഫണ്ട് ട്രാന്‍സ്ഫര്‍' ഓപ്ഷന്‍ തിരഞ്ഞെടുക്കുക
3. 'മറ്റ് ബാങ്കിലേക്ക് ട്രാന്‍സ്ഫര്‍ ചെയ്യുക' ഓപ്ഷന്‍ തിരഞ്ഞെടുക്കുക
4. ക്രെഡിറ്റ് കാര്‍ഡ് അക്കൗണ്ടും ഗുണഭോക്താവിനേയും ചേര്‍ക്കുക
5. 'നിബന്ധനകളും വ്യവസ്ഥകളും' അംഗീകരിക്കുക
6. പേയ്മെന്‍റ് നടത്താന്‍ 'കണ്‍ഫേം' ബട്ടണ്‍ അമര്‍ത്തുക
4. ഓട്ടോ ഡെബിറ്റ് സൗകര്യം
ഓട്ടോ ഡെബിറ്റ് സൗകര്യം നിശ്ചിത തീയതിയില്‍ ബില്ലുകള്‍ അടയ്ക്കാന്‍ സൗകര്യമൊരുക്കുന്നു. ഒരു നെറ്റ് ബാങ്കിംഗ് അക്കൗണ്ട് ഉപയോഗിച്ചോ ബാങ്കില്‍ ഒരു അപേക്ഷ നല്‍കിയോ ഓട്ടോ-ഡെബിറ്റ് സൗകര്യത്തിനായി രജിസ്റ്റര്‍ ചെയ്യാം. നിശ്ചിത തീയതിയില്‍ തുക സ്വയമേവ ഡെബിറ്റ് ചെയ്യപ്പെടും. ഓട്ടോ-ഡെബിറ്റ് സൗകര്യം ലഭിക്കാനുള്ള വഴികളിതാ..
1. നെറ്റ് ബാങ്കിംഗ് അക്കൗണ്ടില്‍ ലോഗിന്‍ ചെയ്യുക.
2. ബാങ്കിന്‍റെ വെബ്സൈറ്റിലോ മൊബൈല്‍ ആപ്പിലോ 'ക്രെഡിറ്റ് കാര്‍ഡ്' വിഭാഗത്തിലേക്ക് പോകുക
3. 'ഓട്ടോ-ഡെബിറ്റ്' ഓപ്ഷന്‍ പരിശോധിക്കുക
4. 'ഓട്ടോ-ഡെബിറ്റ്' ഫീച്ചര്‍ കണ്ടെത്തിയ ശേഷം, 'എനേബിള്‍' ഓപ്ഷന്‍ തിരഞ്ഞെടുക്കുക
ക്രെഡിറ്റ് കാര്‍ഡ് ബില്‍ അടയ്ക്കുന്നതിനുള്ള ഓഫ്‌ലൈൻ വഴികള്‍
1. കസ്റ്റമര്‍ കെയര്‍
ചില ബാങ്കുകളില്‍ കസ്റ്റമര്‍ കെയര്‍ നമ്പറുകളിലേക്ക് വിളിച്ച് ക്രെഡിറ്റ് കാര്‍ഡ് പേയ്മെന്‍റുകള്‍ അടയ്ക്കാം. ബാങ്ക് അക്കൗണ്ടും ക്രെഡിറ്റ് കാര്‍ഡും ഒരേ ഇഷ്യൂവറില്‍ നിന്നുള്ളതാണെങ്കില്‍, ക്രെഡിറ്റ് കാര്‍ഡ് ബില്‍ അടയ്ക്കുന്നതിന് കസ്റ്റമര്‍ കെയര്‍ നമ്പറുമായി ബന്ധപ്പെടണം.
2. എ.ടി.എം
ക്രെഡിറ്റ് കാര്‍ഡ് ബില്‍ അടയ്ക്കാന്‍ എടിഎമ്മുകളിലും സൗകര്യം ഉണ്ട്
1.കാര്‍ഡ് ഇട്ട ശേഷം 'ക്രെഡിറ്റ് കാര്‍ഡ് ബില്‍ പേയ്മെന്‍റ്' ഓപ്ഷന്‍ തിരഞ്ഞെടുക്കുക
2.ഇടപാട് പൂര്‍ത്തിയാക്കാന്‍ മെഷീനില്‍ പ്രദര്‍ശിപ്പിച്ചിരിക്കുന്ന നിര്‍ദ്ദേശങ്ങള്‍ പാലിക്കുക.
3.ബാങ്ക് ബ്രാഞ്ച് ഓഫീസ്
ബാങ്ക് ശാഖ വഴി നേരിട്ട് ക്രെഡിറ്റ് കാര്‍ഡ് ബില്‍ പേയ്മെന്‍റുകള്‍ നടത്താം
1. ക്രെഡിറ്റ് കാര്‍ഡ് വിശദാംശങ്ങള്‍ക്കൊപ്പം ക്യാഷ് ഡെപ്പോസിറ്റ് സ്ലിപ്പ് പൂരിപ്പിക്കുക.
2. കൗണ്ടറില്‍ പണത്തോടൊപ്പം സ്ലിപ്പ് സമര്‍പ്പിക്കുക, നിങ്ങളുടെ പേയ്മെന്‍റ് പ്രോസസ്സ് ചെയ്യപ്പെടും
4. ചെക്ക്
ഒരു ചെക്കോ ഡിമാന്‍ഡ് ഡ്രാഫ്റ്റോ (ഡിഡി) ഏതെങ്കിലും ബാങ്ക് ശാഖയിലോ എടിഎം ഡ്രോപ്പ് ബോക്സിലോ ഇടാം. പേയ്മെന്‍റ് മൂന്ന് പ്രവൃത്തി ദിവസത്തിനുള്ളില്‍ പ്രോസസ്സ് ചെയ്യും.
