ആദ്യം സ്റ്റെബിലൈസർ കത്തി, പിന്നാലെ വൻ പുക! കാംകോ ജംഗ്ഷനിലെ വീട്ടിലടിച്ച ഇടിമിന്നലിൽ പരിഭ്രാന്തരായി നാട്ടുകാരും

ഇടുക്കി: ഇടുക്കിയിൽ വീട്ടിൽ ഇടിമിന്നലിനെ തുടർന്ന് സ്റ്റെബിലൈസർ കത്തിയമർന്നത് ഭീതി പരത്തി. വീട്ടിനുള്ളിൽ നിന്നും വൻ തോതിൽ പുക ഉയർന്നതോടെ വീട്ടുകാരും നാട്ടുകാരും പരിഭ്രാന്തിയിലായി. എന്നാൽ പിന്നീട് അഗ്നി ബാധക്കോ വലിയ നാശനഷ്ടങ്ങൾക്കോ ഇടയുണ്ടാക്കാതെ പുകയടങ്ങിയതോടെയാണ് വീട്ടുകാർക്കും നാട്ടുകാർക്കും ആശ്വാസമായത്. അടിമാലി ടൗണിനു സമീപം കാംകോ ജംഗ്ഷനിൽ പുളിയിലക്കാട്ട് കശ്യപിന്റെ വീട്ടിൽ വ്യാഴാഴ്ച സന്ധ്യയ്ക്കായിരുന്നു സംഭവം.

കേന്ദ്ര കാലാവസ്ഥ അറിയിപ്പ് ശ്രദ്ധിക്കുക, കേരളത്തിൽ വീണ്ടും അതിശക്ത മഴ എത്തുന്നു; ഓറഞ്ച് അലർട്ട് 2 ജില്ലകളിൽ

മഴയെ തുടർന്നുണ്ടായ ഇടിമിന്നലിൽ ഷോർട്ട് സർക്യൂട്ട് ഉണ്ടായതാണ് കാരണമെന്നാണ് പ്രാഥമിക നിഗമനം. ഫ്രിഡ്ജിന് മുകളിൽ വച്ച് ഉപയോഗിച്ചിരുന്ന സ്റ്റെബിലൈസറിനകത്ത് നിന്നും ആണ് ആദ്യം പുക ഉയർന്നത്. ഇതിനകത്തുള്ള വയറുകൾ പൂർണ്ണമായി കത്തിയമർന്നതോടെ വൻതോതിൽ കെട്ടിടത്തിൽ നിന്നും പുക ഉയർന്നു. ശക്തമായ പുകയ്ക്കൊപ്പം രൂക്ഷഗന്ധവും ഉയർന്നതോടെയാണ് പ്രദേശവാസികൾക്കിടയിൽ ഭീതി പരന്നത്. നാട്ടുകാർ വിവരമറിയിച്ചതോടെ ഫയർഫോഴ്സ് സംഘം സ്ഥലത്ത് എത്തി. മറ്റു വീട്ടുപകരണങ്ങൾക്ക് കേടുപാടുകൾ സംഭവിച്ചിട്ടില്ലെന്ന് ഫയർഫോഴ്സ് ഓഫീസർ അറിയിച്ചു.

ഇടിമിന്നൽ ജാഗ്രതാ നിർദേശം

നവംബർ 03 വരെ കേരളത്തിൽ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.

അടുത്ത 5 ദിവസത്തേക്കുള്ള യെല്ലോ അലർട്ട് ഇപ്രകാരം

01/11/2024 : തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, മലപ്പുറം
02/11/2024 : തിരുവനന്തപുരം, കൊല്ലം, പത്തനംതിട്ട, കോട്ടയം,  ഇടുക്കി, പാലക്കാട്
03/11/2024 : തൃശൂർ, പാലക്കാട്, കോഴിക്കോട്, വയനാട് എന്നീ  ജില്ലകളിലാണ് മഞ്ഞ അലർട്ട് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.

ഏഷ്യാനെറ്റ് ന്യൂസ് വാർത്തകൾ തത്സമയം കാണാം

• Lightning