കനത്ത മഴയും കാറ്റും, ഒറ്റ നിമിഷത്തിൽ അപകടം; നൊമ്പരമായി തൊഴുത്തിൽ കെട്ടിയിട്ടിരുന്ന പശുക്കളുടെ കാഴ്ച
പുന്നപ്ര കൂട്ടുങ്കല്‍ സോമരാജന്‍റെ പഴുത്തൊഴുത്തിലാണ് അപകടമുണ്ടായത്
Followആലപ്പുഴ: കനത്ത മഴയിലും കാറ്റിലും കേരളത്തിന്‍റെ വിവിധ മേഖലകളിൽ നിന്നും അപ്രതീക്ഷിത അപകടങ്ങളുടെ വാർത്തയാണ് ഓരോ നിമിഷവും പുറത്തുവരുന്നത്. അതിനിടയിലാണ് ആലപ്പുഴയിലെ പശുത്തൊഴുത്തിൽ നിന്നുള്ള കാഴ്ചയും നൊമ്പരമാകുന്നത്. കനത്ത മഴയിലും കാറ്റിലും അപ്രതീക്ഷിതമായി പുളിമരം വീണുണ്ടായ അപകടത്തിൽ തൊഴുത്തിൽ കെട്ടിയിരുന്ന കറവപശു ചത്തു. പുന്നപ്ര കൂട്ടുങ്കല്‍ സോമരാജന്‍റെ പഴുത്തൊഴുത്തിലാണ് അപകടമുണ്ടായത്. നാല് പശുക്കളെയാണ് തൊഴുത്തില്‍ കെട്ടിയിരുന്നത്. പുളിമരം വീണ് തൊഴുത്ത് തകര്‍ന്ന് 3 വയസുള്ള കറവപശുവാണ് ചത്തു. ആലപ്പുഴയില്‍ നിന്നും ഫയര്‍ഫോഴ്സ് സംഘം എത്തിയാണ് രക്ഷാപ്രവർത്തനം നടത്തിയത്. ഫയർ ഫോഴ്സ് സംഘമാണ് പശുക്കളെ പുറത്തെടുത്തത്. എസ് ബി ഐയില്‍ നിന്നും വായ്പ എടുത്താണ് സോമരാജൻ പശുവളര്‍ത്തൽ നടത്തിവന്നിരുന്നത്.
കേരളത്തിന് ശുഭവാർത്ത! കാലാവസ്ഥ വകുപ്പിന്‍റെ ഏറ്റവും പുതിയ സൂചന, അതിതീവ്രമഴക്ക് ഇന്ന് അറുതിയായേക്കും
അതേസമയം സംസ്ഥാനത്ത് മഴ ശക്തമായി തുടരുന്ന സാഹചര്യത്തിൽ സുരക്ഷാ നിർദ്ദേശങ്ങൾ കൃത്യമായി പാലിക്കാനും സർക്കാർ സംവിധാനങ്ങളോട് സഹകരിക്കാനും ഈ ഘട്ടത്തിൽ വൈമനസ്യം കൂടാതെ എല്ലാവരും തയ്യാറാകണമെന്ന ആവശ്യവുമായി മുഖ്യമന്ത്രി പിണറായി വിജയൻ രംഗത്തെത്തി. നിരവധിയിടങ്ങളിൽ നാശനഷ്ടങ്ങളുണ്ടാവുകയും ആളുകളെ വീടുകളിൽ നിന്നു ഒഴിപ്പിക്കുകയും ചെയ്തിട്ടുണ്ട്. എന്നാൽ ഗുരുതരമായ ദുരന്ത സാഹചര്യത്തെ ഭയപ്പെടേണ്ട അവസ്ഥ ഇല്ല എന്നാണ് കേന്ദ്ര കാലാവസ്ഥ വകുപ്പ് വിലയിരുത്തിയിട്ടുള്ളതെന്നും അദ്ദേഹം പറഞ്ഞു. കണ്ണൂർ, കാസർഗോഡ് ജില്ലകളിൽ ഇന്ന് റെഡ് അലര്‍ട്ടും ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്. മലയോര മേഖലകളിലും തീരദേശങ്ങളിലും കൂടുതൽ ശ്രദ്ധ ആവശ്യമാണ്. കടൽ പ്രക്ഷുബ്ധമാകാനും ഉയർന്ന തിരമാലയ്ക്കും സാധ്യതയുള്ളതിനാൽ മത്സ്യബന്ധനത്തിനു പോകാൻ പാടില്ല. ജലജന്യരോഗങ്ങളെയും പകർച്ചവ്യാധികളെയും കരുതിയിരിക്കണം. ആവശ്യമായ സുരക്ഷാ മുൻകരുതലുകൾ കൈക്കൊള്ളണം. എല്ലാ ജില്ലകളിലും 24 മണിക്കൂർ പ്രവർത്തിക്കുന്ന താലൂക്ക്, ജില്ലാ കണ്ട്രോൾ റൂമുകൾ പ്രവർത്തിക്കുന്നുണ്ട്. അടിയന്തര സഹായങ്ങൾക്കായി 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാവുന്നതാണെന്നും മുഖ്യമന്ത്രി അറിയിച്ചു.
ഏഷ്യാനെറ്റ് ന്യൂസ് യൂട്യൂബിൽ തത്സമയം കാണാം...
