Malayalam Poem : കുളക്കരയിലെ പെണ്‍കുട്ടി, സുധീഷ് സുബ്രഹ്മണ്യന്‍ എഴുതിയ കവിത
ചില്ല, എഴുത്തിന്റെ ചിറകനക്കങ്ങള്‍. സുധീഷ് സുബ്രഹ്മണ്യന്‍ എഴുതിയ കവിത
Followചില്ല. മികച്ച എഴുത്തുകള്‍ക്ക് ഒരിടം. സൃഷ്ടികള്‍ submissions@asianetnews.in എന്ന വിലാസത്തില്‍ അയക്കൂ. ഒപ്പം ഫോട്ടോയും വിശദമായ വിലാസവും അയക്കണം. എഡിറ്റോറിയല്‍ ബോര്‍ഡ് തെരഞ്ഞെടുക്കുന്ന സൃഷ്ടികള്‍ പ്രസിദ്ധീകരിക്കും
കല്ലില്‍
കാലുരച്ചുകഴുകുകയാണ്,
ഒരു പെണ്‍കുട്ടി.
അവളുടെ പാദസരം;
ഒരു തുടലാണെന്ന്,
അവള്‍ക്കൊഴികെ
ആര്‍ക്കും തോന്നുന്നതേയില്ല.
കലങ്ങിയ വെള്ളം;
ഒരു വള്ളിച്ചെടിപോലെ,
അവളുടെ കാലുകളെ
വന്നു മൂടുന്നു.
തോട്ടയെറിഞ്ഞ
മീന്‍പിടുത്തക്കാരന്‍,
ജലപ്പരപ്പില്‍;
മീനുകളുടെ
ജഡം കാത്ത്,
കണ്ണു തറച്ചിരിക്കുകയാണ്.
പെണ്‍കുട്ടി നോക്കുമ്പോള്‍;
വെന്തുചത്ത മനുഷ്യരുടെ,
ശരീരങ്ങള്‍ മാത്രം
കാണുന്നു.
മീനുകള്‍ക്ക്
കാത്തിരിക്കുന്നവന്റെ
ചിരിക്കുപിന്നില്‍,
നിലവിളിയുടെ
നേര്‍ത്ത ശബ്ദം.
തിരിഞ്ഞുനടക്കവേ;
അവള്‍
തറയില്‍നിന്നെന്തോ
കുനിഞ്ഞെടുക്കുന്നു.
കാത്തിരിപ്പുകാരന്റെ
തലയില്‍നിന്ന്,
ചുവന്നൊരു മത്താപ്പ്
വിരിഞ്ഞുയരുമ്പോള്‍,
തിരിഞ്ഞുനോക്കാതെ
അവള്‍
നടന്നുപൊയ്‌ക്കൊണ്ടേയിരിക്കുന്നു.
കുളം
പിന്നെയും
കലങ്ങിയിരിക്കുന്നു.
ഇവിടെ ക്ലിക്ക് ചെയ്താല്‍ വായിക്കാം, മികച്ച കഥകള്‍, മികച്ച കവിതകള്‍...
