Malayalam Poem : കണ്ണില്‍ കോറിയത്, ഷംല ജഹ്ഫര്‍ എഴുതിയ കവിത
ചില്ല, എഴുത്തിന്റെ ചിറകനക്കങ്ങള്‍. ഇന്ന് ഷംല ജഹ്ഫര്‍ എഴുതിയ കവിത
Followചില്ല. മികച്ച എഴുത്തുകള്‍ക്ക് ഒരിടം. സൃഷ്ടികള്‍ submissions@asianetnews.in എന്ന വിലാസത്തില്‍ അയക്കൂ. ഒപ്പം ഫോട്ടോയും വിശദമായ വിലാസവും അയക്കണം. എഡിറ്റോറിയല്‍ ബോര്‍ഡ് തെരഞ്ഞെടുക്കുന്ന സൃഷ്ടികള്‍ പ്രസിദ്ധീകരിക്കും
കണ്ണില്‍ കോറിയത്
ദേശാടനത്തിലെ
കാഴ്ച്ചയില്‍
കോറിയ ചിത്രം
ആകാശം തേടിയ
അയാളെ
പൊള്ളിയടര്‍ത്തി.
ഉള്‍ച്ചുഴിയിലെ
ഇരുള്‍ വഴികളിലാകെ
നോവലകള്‍;
തീക്കാറ്റില്‍
ആടിയുലയുന്ന
വിശപ്പിന്റെ വിളികള്‍
നെഞ്ചു തുളക്കുന്ന
ദൈന്യതയുടെ നോട്ടം.
ചിറക് പറിച്ചെറിയപ്പെട്ടു
നിസ്സഹായത
വരിഞ്ഞു
മുറുക്കിയൊരുവള്‍,
കൊക്കില്‍
ഓക്കാനിച്ച എച്ചില്‍;
ചിതറിവീണ
ചില്ലകളില്‍
പിടയുന്ന ജീവന്‍
ആ ജീവനില്‍
ചേര്‍ത്തുപിടിച്ച
നെഞ്ചകം.
അധികാരത്തിന്റെ
കൂര്‍ത്ത നഖങ്ങളില്‍
തൂങ്ങുന്നത്
ജനാധിപത്യത്തിന്റെ
കറുത്ത എല്ലുകള്‍.
മതില്‍കെട്ടിനുള്ളില്‍
അടുക്കി വെച്ചിരിക്കുന്നു
രക്തസാക്ഷികളുടെ
ചിതലരിച്ച ഓര്‍മ്മകള്‍;
കെട്ടിനിറുത്തിയ
വെള്ളത്തില്‍
ചത്തുപൊങ്ങുന്ന
കുമിളകള്‍,
നിശ്ശബ്ദരാക്കപ്പെട്ടവരുടെ
ഒച്ചപൊങ്ങാത്ത
നിലവിളികള്‍ .
