ഓടുന്ന വണ്ടിയില്‍ 'ലൈവ്' ആയി കുളി; യുവാവിന്‍റെ വീഡിയോ വൈറലാകുന്നു

സോഷ്യല്‍ മീഡിയയിലൂടെ ഓരോ ദിവസവും വ്യത്യസ്തവും പുതുമയുള്ളതുമായ ഒരുപാട് വീഡിയോകള്‍ നാം കാണാറുണ്ട്. ഇവയില്‍ പലതും പക്ഷേ കാഴ്ചക്കാരെ കൂട്ടുന്നതിന് മാത്രമായി തയ്യാറാക്കുന്ന ഉള്ളടക്കങ്ങളാകാറുണ്ട്. അതുകൊണ്ട് തന്നെ നിലവാരമില്ലാത്ത പല വീഡിയോകളും വലിയ രീതിയില്‍ വിമര്‍ശനങ്ങളും ഏറ്റുവാങ്ങാറുണ്ട്. 

അതേസമയം വീഡിയോ കണ്ടന്‍റുകള്‍ അത് ചെയ്യുന്നവരുടെ അഭിരുചിക്ക് അനുസരിച്ചുള്ളതാണെന്നും അതിനുള്ള സ്വാതന്ത്ര്യം അവര്‍ക്കുണ്ട്, അതിനെ അംഗീകരിക്കുന്ന ചെറിയൊരു വിഭാഗം പേരെങ്കിലും ഉള്ളിടത്ത് അവരെ റദ്ദ് ചെയ്യുന്നത് ശരിയല്ലെന്ന് വാദിക്കുന്നവരുമുണ്ട്.

എന്തായാലും സമാനമായ രീതിയില്‍ വിമര്‍ശനങ്ങളും പിന്തുണയും ഏറ്റുവാങ്ങിക്കൊണ്ട് സോഷ്യല്‍ മീഡിയയില്‍ വൈറലാകുന്നൊരു വീഡിയോ ആണിനി പങ്കുവയ്ക്കുന്നത്. പരസ്യമായി മറ്റുള്ളവരുടെ മുമ്പില്‍ വച്ച് ഉടുപ്പുകളെല്ലാം മാറ്റി ഒരു യുവാവ് കുളിക്കുന്നതാണ് വീഡിയോയിലുള്ളത്.

ന്യൂയോര്‍ക്കിലാണ് വിചിത്രമായ സംഭവം നടന്നിരിക്കുന്നത്. ഓടിക്കൊണ്ടിരിക്കുന്ന ട്രെയിനില്‍ മറ്റ് യാത്രക്കാര്‍ക്കൊപ്പം ഇരുന്നിരുന്ന യുവാവ് പെട്ടെന്ന് എഴുന്നേറ്റ് ഷര്‍ട്ടും പാന്‍റ്സും ഷൂവുമെല്ലാം അഴിക്കുകയാണ്. ശേഷം കയ്യിലുണ്ടായിരുന്ന വലിയ പെട്ടി തുറന്ന് ഇതില്‍ വെള്ളവും സോപ്പും കലക്കി ഇതില്‍ തന്നെ ഇറങ്ങിനിന്ന് കുളി തുടങ്ങുകയാണ്.

യുവാവ് കുളിക്കുകയാണെന്ന് മനസിലാക്കിയതോടെ മറ്റ് യാത്രക്കാരെല്ലാം അവിടെ നിന്ന് എഴുന്നേറ്റ് മാറിപ്പോകുന്നുണ്ട്. ഇതൊന്നും ശ്രദ്ധിക്കാതെ കുളിക്കുകയാണ് യുവാവ്. വെറുതെ പേരിന് വേണ്ടിയുള്ള കുളിയാണ്. ഇതിന് ശേഷം ടവലെടുത്ത് തുടച്ച് വസ്ത്രങ്ങളെല്ലാം അണിഞ്ഞ് പെട്ടിയുമെടുത്ത് അടുത്ത സ്റ്റേഷനില്‍ ഇറങ്ങിപ്പോവുകയാണ് യുവാവ്.

ആര്‍ക്കും കാര്യമായ ശല്യമുണ്ടാക്കിയില്ല എന്നതിനാല്‍ തന്നെ ആരും രൂക്ഷമായി പ്രതികരിച്ചില്ല. എന്ന് മാത്രമല്ല സഹൃദയരായ ചില യാത്രക്കാര്‍ ഇദ്ദേഹത്തോട് ചിരിക്കുകയും ചെയ്യുന്നുണ്ട്. 

പൊതുവിടത്തില്‍ ഇങ്ങനെയെല്ലാം ചെയ്ത് ശ്രദ്ധ കിട്ടാൻ ശ്രമിക്കുന്നത് ആരോഗ്യകരമായ പ്രവണതയല്ലെന്നാണ് വീഡിയോ കണ്ട ഒരു വിഭാഗം പേര്‍ സ്വാഭാവികമായും വിമര്‍ശിക്കുന്നത്. അതേസമയം ഇതെല്ലാം കലാപരമായ ആവിഷ്കാരമായി കണ്ടാല്‍ മതി, ആര്‍ക്കും മറ്റ് ശല്യമൊന്നും യുവാവ് സൃഷ്ടിച്ചതുമില്ല എന്ന രീതിയില്‍ പിന്തുണയ്ക്കുന്നവരുമുണ്ട്. 

വൈറലായ വീഡിയോ കണ്ടുനോക്കൂ...

Also Read:- ക്യാമറയില്‍ പതിഞ്ഞ വിചിത്രജീവി; എന്താണെന്ന് കണ്ടെത്താമോയെന്ന് അധികൃതര്‍

• Viral