ഡിഎൻഎ പരിശോധനയ്ക്ക് രക്തസാമ്പിള് ശേഖരിക്കാൻ തുടങ്ങി; ക്യാമ്പുകളിൽ കഴിയുന്നവർ തയ്യാറായാൽ പരിശോധന നടത്തും
മക്കള്, പേരക്കുട്ടികള്, മാതാപിതാക്കള്, മുത്തച്ഛന്, മുത്തശ്ശി, അച്ഛന്റെ സഹോദരങ്ങള്, അമ്മയുടെ സഹോദരങ്ങള് തുടങ്ങിയ അടുത്ത രക്ത ബന്ധുക്കളുടെ സാമ്പിളാണ് പരിശോധനയ്ക്ക് എടുക്കുന്നത്.
![Blood sample collection begins from the relatives of people went missing in landslide to match with samples](https://static-gi.asianetnews.com/images/01j4e3pptr2dcms03qkg155q51/wayanad-landslide--6-.jpg?impolicy=All_policy&im=Resize=(1200) )
കൽപ്പറ്റ: വയനാട് ദുരന്തത്തിൽ മരിച്ചവരുടെ മൃതശരീരങ്ങളും ശരീരഭാഗങ്ങളും തിരിച്ചറിയുന്നത്തിനുള്ള ശാസ്ത്രീയ പരിശോധനയ്ക്കായി ബന്ധുക്കളുടെ രക്തസാമ്പിൾ ശേഖരണം തുടങ്ങി. ആദ്യഘട്ടത്തിൽ ദുരന്ത മേഖലയില് നിന്നും ലഭിച്ച തിരിച്ചറിയാനാവാത്ത മൃതദേഹങ്ങളുടെ ഡിഎന്എ ശേഖരിച്ചിരുന്നു. അടുത്ത ഘട്ടത്തില് ഇപ്പോള് ശേഖരിക്കുന്ന രക്ത സാമ്പിളുകളും ഡിഎന്എകളും തമ്മിലുള്ള പൊരുത്തം പരിശോധിക്കും.
ജില്ലാ ആശുപത്രിയിലെ ബ്ലഡ് ബാങ്ക് മെഡിക്കല് ഓഫീസര് ഡോ ബിനുജ മെറിന് ജോയുടെ നേതൃത്വത്തില് മേപ്പാടി ഗവ. ഹയര്സെക്കന്ഡറി സ്കൂളിലും പഞ്ചായത്ത് ഹാളിലുമാണ് രക്തസാമ്പിള് ശേഖരിക്കുന്നത്. അടുത്ത ദിവസം മുതല് മേപ്പാടി എം.എസ്.എ ഹാളിലും മരണപ്പെട്ടവരുടെ ബന്ധുക്കളുടെ രക്തസാമ്പിളുകൾ ശേഖരിക്കും. ദുരിതാശ്വാസ ക്യാമ്പുകളിലുള്ള ബന്ധുക്കളില് രക്ത പരിശോധനയ്ക്ക് തയ്യാറായിട്ടുള്ളവര്ക്ക് കൗണ്സിലിങ് നല്കിയ ശേഷമാണ് സാമ്പിള് ശേഖരിക്കുന്നത്.
മക്കള്, പേരക്കുട്ടികള്, മാതാപിതാക്കള്, മുത്തച്ഛന്, മുത്തശ്ശി, അച്ഛന്റെ സഹോദരങ്ങള്, അമ്മയുടെ സഹോദരങ്ങള് തുടങ്ങിയ അടുത്ത രക്ത ബന്ധുക്കളുടെ സാമ്പിളാണ് പരിശോധനയ്ക്ക് എടുക്കുന്നത്. ഡിഎന്എ സാമ്പിളെടുക്കുന്നതിന് മാനസികാരോഗ്യ പിന്തുണയ്ക്കുള്ള പ്രോട്ടോകോള് ആരോഗ്യ വകുപ്പ് തയ്യാറാക്കിയതായി ആരോഗ്യ മന്ത്രി വീണാ ജോര്ജ് കഴിഞ്ഞ ദിവസം അറിയിച്ചിരുന്നു.
ഏഷ്യാനെറ്റ് ന്യൂസ് ലൈവ് യുട്യൂബിൽ കാണാം